ភ្នំពេញ៖ អគ្គស្នងការរងនគរបាលជាតិ បានក្រើនរំលឹកដល់កងកម្លាំងនគរបាលការពារទាំងអស់ ឱ្យត្រៀមលក្ខណៈការពារព្រឹត្តិការណ៍ជាតិធំៗ នាពេលខខាងមុខ ។

ឧត្តមសេនីយ៍ឯក លន់ សុផាត នៅថ្ងៃទី១៨ ខែវិច្ឆិកា ឆ្នាំ២០២២នេះ បាន​ជួប​សំណេះសំណាល​ជាមួយ​កងកម្លាំងនគរបាលការពារ ​បន្ទាប់ពីបានចូលរួមការពារកិច្ចប្រជុំកំពូលអាស៊ាន​លើកទី៤០-៤១ ​និងកិច្ចប្រជុំកំពូលពាក់ព័ន្ធទទួលបានជោគេជ័យ ​និងប្រកបដោយភាពរលួននោះ។

ឧត្តមសេនីយ៍ឯក ​បានសម្តែងនូវការកោតសរសើរ ​និងថ្លែងអំណរគុណ ដែលកងកម្លាំងនាយកដ្ឋាន​នគរបាលការពារ​ បានអនុវត្តកិច្ចការងាររក្សាសន្តិសុខសណ្តាប់ធ្នាប់ជូនប្រទេសជាតិកន្លងមក។ ជាក់ស្តែង ​បានសហការជាមួយកម្លាំងពាក់ព័ន្ធការពារសន្និសីទ​អាស៊ានណាប៉ូល ការពារ​ការ​បោះឆ្នោតក្រុមប្រឹក្សាឃុំ-សង្កាត់ ពិសេសការពារកិច្ចប្រជុំកំពូលអាស៊ានលើកទី៤០-៤១ និង​កិច្ចប្រជុំកំពូល​ពាក់ព័ន្ធ ​ដែលមានប្រមុខដឹកនាំកំពូលៗចូលរួម និងការពារព្រឹត្តិការផ្សេងៗទទួល​បាន​សុវត្ថិភាព និងជោគជ័យគួរជាទីមោទនៈ។

អគ្គស្នងការរងនគរបាលជាតិ ​បានក្រើនរំលឹកដល់កម្លាំងការពារទាំងអស់ត្រៀម​លក្ខណៈចូលរួមការ​ពារ​ព្រឹត្តិការណ៍​សំខាន់ៗបន្តទៀត ត្រៀមលក្ខណៈដើម្បីចូលរួមការពារ​ការបោះឆ្នោតជ្រើស​តាំង​តំណាងរាស្រ្ត ​ការពារ​ព្រឹត្តិការណ៍​ប្រកួត​កីឡាស៊ីហ្គេម និងប្រព្រឹត្តការណ៍ផ្សេងៗទៀត​នាពេល​ខាងមុខ ​ហើយដើម្បីឲ្យកិច្ចការពារព្រឹត្តការណ៍សំខាន់​នាពេលខាងមុខទទួលបានជោគជ័យ ប្រធាន​អង្គភាព ក៏ដូចជាកងកម្លាំងទាំងអស់ ​ត្រូវធ្វើការហ្វឹកហាត់​បំប៉នជំនាញ ដើម្បីបង្កើន​សមត្ថភាពបន្ថែមទៀត ។

ឧត្តមសេនីយ៍ឯក លន់ សុផាត បានក្រើនរំលឹកដល់ថ្នាក់ដឹកនាំ ​និងមន្រ្តីទាំងអស់ នៃនាយកដ្ឋាន​នគរបាលការពារ ត្រូវប្រុងប្រយ័ត្នខ្ពស់ ​និងបន្តចូលរួមការពារជំងឺកូវីដ-១៩ ពិសេស​អនុវត្តឲ្យបាន​ខ្ជាប់ខ្ជួន​នូវវិធានការ ៣កុំ ៣ការពារ ​និងវិធានការសុខាភិបាលនានា ៕អត្ថបទ៖ បាន ចក់