ភ្នំពេញ៖ ឯកឧត្ដម ហេង រតនា ប្រធានក្រុមការងារចុះជួយស្រុកលើកដែក ខេត្តកណ្ដាល បានជំរុញទៅសិស្សានុសិស្សទាំងអស់ត្រូវខិតខំរៀនសូត្រ ខណៈរាជរដ្ឋាភិបាលកំពុងយកចិត្តទុកដាក់ខ្លាំង លើការបណ្ដុះធនធានមនុស្ស ដើម្បីឲ្យចូលរួមអភិវឌ្ឍប្រទេស ឲ្យកាន់តែរីកចម្រើន។
ក្នុងពិធីសំណេះសំណាលលោកគ្រូ អ្នកគ្រូ និងសិស្សានុសិស្សត្រៀមប្រឡងថ្នាក់ទី១២ នាថ្ងៃទី១៨ ខែវិច្ឆិកា ឆ្នាំ២០២២ ឯកឧត្ដម ហេង រតនា មានប្រសាសន៍ថា កត្តាសុខសន្តិភាព ស្ថិរភាពនយោបាយនៅកម្ពុជា បានធ្វើឲ្យកំណើន នៃការចុះឈ្មោះចូលរៀន មានការកើនឡើងពីមួយឆ្នាំទៅមួយឆ្នាំ ហើយរាជរដ្ឋាភិបាល ក៏បានបង្កើតបន្ថែមនូវសាលារៀន សាងសង់អគារសិក្សា និង ជ្រើសរើសបន្ថែមនូវបុគ្គលិកអប់រំ រួមទាំងការបង្កើននូវប្រាក់បៀវត្សរ៍ជាបន្តបន្ទាប់ ។
ឯកឧត្ដម បានបន្តថា សម្រាប់យុវជនជាទំពាំងស្នងឫស្សី ឬកំពុងតែសិក្សាតាមគ្រឹះស្ថានអប់រំនានា ត្រូវមើលឃើញពីតម្លៃ នៃការខិតខំរបស់រាជរដ្ឋាភិបាលនេះ តាមរយៈការប្រឹងប្រែងរៀនសូត្រ និងយកចំណេះដឹងមកចូលរួមអភិវឌ្ឍប្រទេសជាតិ រួមទាំងមានការភ័យខ្លាច ចំពោះសង្គ្រាម ដែលវាបង្កការរំខាន ដល់ការអភិវឌ្ឍធនធានមនុស្ស ។
ជាមួយនេះ ឯកឧត្តម ហេង រតនា បានអំពាវនាវផងដែរ ដល់សិស្សានុសិស្ស ដែលត្រៀមខ្លួនប្រឡងថ្នាក់ទី១២ឆ្នាំនេះ ត្រូវខិតខំមើលមេរៀន ចៀសវាងសកម្មភាព និងទង្វើដែលរំខានដល់ការសិក្សា ហើយត្រូវចង់ចាំនូវទិសស្លោកគឺ “អ្នកចេះគឺជាប់” ។
បើតាមលោក ចាប ច័ន្ទវិទ្យា អភិបាលស្រុកលើកដែក បានឲ្យដឹងថា ស្រុកលើកដែក មានវិទ្យាល័យចំនួន៣ និងសិស្សកំពុងសិក្សាថ្នាក់ទី១២ ចំនួនជាង ៣០០នាក់ ហើយសម្រាប់បេក្ខជនត្រៀមប្រឡងបាក់ឌុបថ្នាក់វិទ្យាសាស្ត្រចំនួន ១១៧នាក់ និងថ្នាក់សង្គមចំនួន ២៥៨នាក់។
លោកអភិបាលស្រុក បានបញ្ជាក់ថា កាលពីឆ្នាំ២០២១ ក្នុងស្រុកមួយនេះ មានសិស្សត្រូវប្រឡងបាក់ឌុបចំនួន ២៨៩នាក់ ដោយប្រឡងជាប់ចំនួន ៧៧,៤៨ភាគរយ ហើយមានអ្នកជាប់និទ្ទេសអេ (A) ចំនួន៧នាក់ ទទួលបាននូវការឧបត្ថម្ភលើកទឹកចិត្តផ្សេងៗ ពីអាជ្ញាធរ និងក្រុមការងារចុះជួយមូលដ្ឋានផងដែរ៕ អត្ថបទ៖ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
