ភ្នំពេញ៖ សមិទ្ធផលដ៏ធំធេង នៅស្រុកខ្សាច់កណ្ដាល ដែលត្រូវបានសាងសង់ជាបន្តបន្ទាប់ គឺសំដៅ​លើក​កម្ពស់សោភ័ណ្ឌភាព, ផាសុខភាព ​និងជីវភាពរស់នៅរបស់ប្រជាពលរដ្ឋរស់នៅក្នុងមូលដ្ឋាន ក៏ដូចជាប្រជាពលរដ្ឋជាច្រើនដទៃទៀត ​ដែលប្រើប្រាស់ប្រាស់ ​និងការទទួលផលប្រយោជន៍​ពី​សមិទ្ធផល​ទាំងអស់នោះ ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ ប្រធានក្រុមការងារថ្នាក់ជាតិចុះជួយខេត្តកណ្ដាល លើកឡើងក្នុងពិធីសម្ពោធដាក់​ឲ្យ​ប្រើប្រាស់ជាផ្លូវការផ្លូវបេតុង​ និងបើកការដ្ឋានសាងសង់ស្ពានព្រែកកុងវាន់ និងស្ថាបនាកំណត់​ផ្លូវជាតិ ៧០បេ ក្រាលកៅស៊ូ DBST និងដាក់លូ នៅស្រុកខ្សាច់កណ្តាល ខេត្តកណ្ដាលថ្ងៃទី១៨ ខែវិច្ឆិកាឆ្នាំ ​២០២២ នេះថា រាជរដ្ឋាភិបាល​ ក្រោមការដឹកនាំប្រកបដោយភាពឈ្លាសវៃ និង​ចក្ខុវិស័យ​វែងឆ្ងាយ​របស់សម្តេចអគ្គមហាសេនាបតីតេជោ ​ហ៊ុន សែន នាយករដ្ឋមន្រ្តី កម្ពុជាអាចគ្រប់គ្រង​ស្ថានការណ៍​នៃជំងឺកូវីដ-១៩ ​និងផលប៉ះពាល់នៃវិបត្តិនៃជំងឺដ៏កាច-សាហាវនេះ មកលើសង្គម-សេដ្ឋកិច្ច​បានយ៉ាងល្អប្រសើរ ​និងប្រកបដោយប្រសិទ្ធភាពខ្ពស់ បើធៀបនឹងបណ្តាប្រទេសនៅក្នុង​តំបន់​ ក៏ដូចជានៅលើសកលលោកទាំងមូល ។

ទាក់ទងបញ្ហានេះដែរ ឯកឧត្តមអគ្គបណ្ឌិតសភាចារ្យ ស្នើឱ្យរដ្ឋបាលខេត្ត គណៈបញ្ជាការឯកភាព​គ្រប់​លំដាប់ថ្នាក់, រដ្ឋបាលស្រុកខ្សាច់កណ្តាល ក៏ដូចជាប្រជាពលរដ្ឋទូទៅ, បន្តយកចិត្តទុកដាក់លើ​ការងារសំខាន់ៗមួយចំនួនដូចជា៖ ​បន្តចុះមូលដ្ឋានឱ្យបានទៀងទាត់ជាប់ជាប្រចាំ និងត្រូវបន្ត​សហការគ្នារៀបចំវេទិកាសាធារណៈនៅតាមឃុំនីមួយៗ។

រដ្ឋបាលស្រុក​ និងសមត្ថកិច្ចពាក់ព័ន្ធគ្រប់លំដាប់ថ្នាក់ ត្រូវបន្តរួមគ្នាខិតខំដោះស្រាយសំណើ, សំណូមពរ ​និងបញ្ហាប្រឈមនានានៅតាមមូលដ្ឋាន ប្រកបដោយតម្លាភាព, ​ជាពិសេសសំណើ, សំណូមពរ ​និងបញ្ហាប្រឈម ។ បន្តយុទ្ធនាការបង្រ្កាបលែ្បងស៊ីសងខុសច្បាប់គ្រប់ប្រភេទ នៅ​គ្រប់ទីកន្លែងទូទាំងខេត្ត ។

គណៈអភិបាលខេត្ត និងស្រុក ​ក៏ដូចជាអាជ្ញាធរគ្រប់លំដាប់ថ្នាក់ ត្រូវចាត់វិធានការបង្ក្រាបឧក្រិដ្ឋកម្ម​គ្រឿងញៀន, ​ការជួញដូរ ​និងរត់ពន្ធមនុស្សជាដើម និងបន្តជំរុញបំផុសប្រជាជនឱ្យចូលរួមសកម្មក្នុង​ការ​អនុវត្តគោលនយោបាយ ភូមិ-ឃុំមានសុវត្ថិភាព ។

ក្រៅពីគោលការណ៍ខាងលើ, ​អាជ្ញាធរគ្រប់លំដាប់ថ្នាក់ បន្តជំរុញ និងលើកកម្ពស់ការផ្តល់​សេវា​សាធារណៈនានា​ជូនប្រជាពលរដ្ឋ ​ប្រកបដោយប្រសិទ្ធភាព, ដើម្បីឆ្លើយតបទៅនឹងតម្រូវការ​របស់​ប្រជាពលរដ្ឋ ។ បន្តយកចិត្តទុកដាក់សម្អាតបរិស្ថាន និងដាំដើមឈើនៅតាមទីសាធារណៈ, សាលារៀន និងវត្តអារាម ព្រមទាំងបំផុសប្រជាពលរដ្ឋឱ្យចូលរួមដាំដើមឈើ លើដីទំនេរ​ក្នុង​បរវេណផ្ទះ​ ក្នុងគោលបំណងបង្កើនគម្រងបៃតង​ និងចូលរួមទប់ស្កាត់ការឡើងកំដៅផែនដី ។ អាជ្ញាធរមានសមត្ថកិច្ចពាក់ព័ន្ធ​ ត្រូវមានភាពម៉ឺងម៉ាត់ចំពោះរថយន្តដឹកដីគ្រប់ប្រភេទ ដែលបើក​នៅ​លើផ្លូវ ដោយត្រូវចៀសវាងនូវការជ្រុះដីតាមផ្លូវ​ ដែលបណ្តាលឱ្យឆាប់ស្ទះលូ ​និងឆាប់ខូចផ្លូវ និង​ធ្វើឱ្យផ្លូវបេតុងក្លាយជាផ្លូវដីវិញដោយសារដីគ្របពីលើ ។

សូមបញ្ជាក់ថា ពិធីសម្ពោធដាក់ឲ្យប្រើប្រាស់ និងបើកការដ្ឋានសាងសង់ហេដ្ឋារចនាសម្ព័ន្ធផ្លូវ និង​ស្ពាននានា​រួមមាន៖​ សម្ពោធដាក់ឲ្យប្រើប្រាស់ជាផ្លូវការផ្លូវបេតុងអាមេប្រវែងជាង ៦​ ពាន់ម៉ែត្រ កម្រាស់ ០.១៨ ម៉ែត្រ, ដាក់លូអមសងខាងផ្លូវជាង ៥ ​ពាន់ម៉ែត្រ, ដាក់រឺហ្គាចំនួន​ ២០០ កន្លែង, និង​ដាក់លូបង្ហូរទឹកចូលទន្លេជាង ១ ពាន់ម៉ែត្រ។ ចំណែកបើកការដ្ឋានស្ថាបនា, ផ្លូវជាតិ ៧០B ក្រាលកៅស៊ូ DBST ប្រវែង ៤ ពាន់ម៉ែត្រ ទទឹង ១ ម៉ែត្រ និងដាក់លូរំដោះទឹកសងខាងផ្លូវប្រវែងជាង ៨ ពាន់ម៉ែត្រ ​និងផ្លូវសំបុកមាន់ប្រវែង ២០ ម៉ឺនម៉ែត្រ ​ដោយកៅស៊ូ DBST ស្ថិតក្នុងឃុំពុកឬស្សី, និងការជួសជុលកែលម្អស្ពានព្រែកកុងវាន់ផងដែរ៕ អត្ថបទ៖ សុន រ៉ាឌី