កំពង់ចាម៖ នៅថ្ងៃទី១៨ ខែវិច្ឆិកា ម្សិលមិញនេះ ឯកឧត្តមបណ្ឌិត ម៉ឹង មករា ​ប្រធាន​សមាគម​យុវជន​ក្រុម៨​តំណាងដ៏ខ្ពង់ខ្ពស់​ឯកឧត្តមបណ្ឌិត​ ហ៊ុន ម៉ាណែត ​និងលោកជំទាវ ​ពេជ ចន្ទមុន្នី ​បាន​អញ្ជើញ​ជា​ក្នុងកម្មវិធី "លែងកូនត្រីពូជធម្មជាតិ​ ចំនួន ៦៥.០០០ក្បាល" ជា​អំណោយ​ដ៏ថ្លៃថ្លា​របស់​ឯកឧត្ត​មបណ្ឌិត ហ៊ុន ម៉ាណែត ​និងលោកជំទាវ ​តាមរយៈសមាគមយុវជនក្រុម៨ ដើម្បីលែង​ក្នុង​អាងទឹកអូរតាកេរ្តិ៍ នៃគម្រោង "សហគមន៍កសិករសែនជ័យ" ក្នុងភូមិដំណាក់អំពិល ឃុំស្ដើងជ័យ ស្រុកជើងព្រៃ ខេត្តកំពង់ចាម។

កម្មវិធីលែងកូនត្រីនេះ គឺជាផ្នែកមួយនៅក្នុងអនុវិស័យទាំងបីនៃវិស័យកសិកម្ម របស់​សហគមន៍​កសិករ​សែនជ័យ ដែលផ្តោតជា​ចម្បង​ ដូចជា ​វារីវប្បកម្ម ស្រូវ​ និងបន្លែសុវត្ថិភាព។

គម្រោង "សហគមន៍កសិករសែនជ័យ" បង្កើតឡើង​ក្នុងគោលបំណង ជួយជម្រុញវិស័យកសិកម្ម​ក្នុង​ស្រុកជើងព្រៃ ឱ្យកាន់តែមានសក្ដានុពល ​និងកាលានុវត្តភាពនៃការធ្វើ​ពាណិជ្ជូបនីយកម្ម​កសិកម្ម ដើម្បី​ធានាបាននូវសន្តិសុខស្បៀង ​បង្កើនប្រាក់ចំណូល និងលើកស្ទួយជីវភាពសេដ្ឋកិច្ចគ្រួសារ​ប្រជាពលរដ្ឋ​ឲ្យកាន់​តែប្រសើឡើង។

កម្មវិធីនេះ ក៏មានការចូលរួមពីសំណាក់អាជ្ញាធរមូលដ្ឋាន ​ថ្នាក់​ដឹកនាំ​សម្ព័ន្ធ​សហគមន៍​កសិកម្ម ក្រុមហ៊ុន​ត្រូពិកខែម ​ផលិតបន្លែសុវត្ថិភាព ​ធនាគារ​វីង​ ក្រុមការងារយុវជនក្រុម៨ សកម្មជន​យុវជនមូលដ្ឋាន ​និងប្រជាពលរដ្ឋមូលដ្ឋាន ​ក្នុងស្រុកជើងព្រៃ​ ខេត្តកំពង់ចាមផងដែរ៕