ភ្នំពេញ: ឯកឧត្តម សាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល នារសៀលថ្ងៃទី១៩ ខែវិច្ឆិកា ឆ្នាំ២០២២នេះ បានដឹកនាំក្រុមការងារ រួមនិងអាជ្ញាធរពាក់ព័ន្ធ បានអញ្ជើញពិនិត្យ និងកាត់វិញ្ញាសា ប្រឡងជ្រើសរើសមន្រ្តីក្របខណ្ឌសុខាភិបាល ឆ្នាំ២០២២ ដោយធ្វើឡើនៅក្នុងវិទ្យាល័យបាក់ទូក រាជធានីភ្នំពេញ។

ឯកឧត្តមសាស្ត្រាចារ្យ ម៉ម ប៊ុនហេង បានថ្លែងថា ក្រសួងសុខាភិបាល បានបើកការប្រឡងក្របខ័ណ្ឌមន្ដ្រីរាជការសុខាភិបាលនៅទូទាំងប្រទេស ដែលមានបេក្ខជនចំនួន១១,៨៩៨នាក់ ហើយយើងត្រូវការជ្រើសរើស ៣,៣២៤នាក់ សម្រាប់នៅថ្នាក់កណ្ដាល (អង្គភាពថ្នាក់មជ្ឈឹម) ចំនួន៩១៣នាក់ អង្គភាពរាជធានី-ខេត្ដ ចំនួន២,៤១១នាក់ ដែលជ្រើសរើសចំនួន២០មុខវិជ្ជា។

ចំណែកការប្រឡងជ្រើសរើសក្របខ័ណ្ឌមន្រ្តីរាជការ ធ្វើឡើងរយៈពេល ២ថ្ងៃ ចាប់ពីថ្ងៃទី១៩-២០ ខែវិច្ឆិកា ឆ្នាំ២០២២ នឹងមានមណ្ឌលប្រឡងចំនួន០៤ មណ្ឌល រួមមាន៖ មណ្ឌលសាកលវិទ្យាល័យវិទ្យាសាស្រ្តសុខាភិបាល, មណ្ឌលសាលាបច្ចេកទេសថែទាំវេជ្ជសាស្ត្រ, មណ្ឌលវិទ្យាល័យ បាក់ទូក និងមណ្ឌលសាលាបឋមសិក្សាបាក់ទូក។

ឯកឧត្តមសាស្ត្រាចារ្យ ម៉ម ប៊ុនហេង បានជម្រាបជូនទៀតថា ការអញ្ជើញមកបើកវិញ្ញាសារប្រឡងនេះ ក៏មានការចូលរួមពីក្រសួងមុខងារសាធារណៈ ឧបការីតំណាងអង្គភាពប្រឆាំងអំពើពុករលួយ ដើម្បីជាសាក្សីក្នុងការពិនិត្យការងារប្រឡង ដើម្បីប្រាកដថា យើងផ្ដល់ភាពយុត្ដិធម៌ដល់បេក្ខជន បេក្ខនារី ក៏ដូចជាប្រជាពលរដ្ឋរបស់យើង ពិសេសឱ្យប្រាកដប្រជាថា យើងធ្វើបានត្រឹមត្រូវទៅតាមគោលនយោបាយរបស់រាជរដ្ឋាភិបាល ហើយធ្វើឱ្យប្រជាជនមានជំនឿទុកចិត្ដ លើប្រព័ន្ធប្រឡងជ្រើសរើសក្របខ័ណ្ឌមន្រ្តីរាជការរបស់រាជរដ្ឋាភិបាល។

ជាក់ស្តែងការប្រឡងក្របខ័ណ្ឌមន្រ្តីរាជការសុខាភិបាល ឆ្នាំ២០២២ មានអ្នកគ្រប់គ្រង និងអនុរក្ស ចំនួន ៧១៣នាក់ ក្នុងនោះ មានអ្នកសង្កេតការណ៍របស់អង្គភាពប្រឆាំងអំពើពុករលួយ ចំនួន ២០០នាក់ផងដែរ។

ចំណែកចំពោះការធ្វើកំណែ នៃការប្រឡងជ្រើសរើសមន្រ្តីរាជការក្របខ័ណ្ឌសុខាភិបាល ឆ្នាំ២០២២នេះ អាចកែបានឆាប់ៗ ព្រោះប្រើប្រាស់ប្រព័ន្ធអេឡិចត្រូនិច។ ដូច្នេះសូមឲ្យក្មួយៗយកចិត្តទុកដាក់ខិតខំប្រឹងប្រែង ក៏សូមជូនពរដល់បេក្ខជន បេក្ខនារី ដែលបានមកប្រឡងទាំងអស់សូមជាប់គ្រប់ៗគ្នា៕ អត្ថបទ: រដ្ឋា