នៅព្រឹកថ្ងៃទី២១វិច្ឆិកានេះ ក្រសួងទេសចរណ៍ បានរៀបចំ​វេទិកាជាតិអេកូទេសចរណ៍ លើកទី៣ ក្រោម​វត្តមានរបស់ឯកឧត្តម បណ្ឌិត ថោង ខុន រដ្ឋមន្រ្តីក្រសួងទេសចរណ៍ និង​ជា​ប្រធាន​គណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (គ.ជ.អ.អ) និងការអញ្ជើញចូលរួមថ្លែង​សុន្ទរកថារបស់ ឯកឧត្តម ឌិត ទីណា រដ្ឋមន្រ្តី​ក្រសួង​កសិកម្ម រុក្ខាប្រមាញ់ និងនេសាទ និងជាអនុប្រធាន គ.ជ.អ.អ , ឯកឧត្តម សាយ សំអាល់ រដ្ឋមន្រ្តី​ក្រសួង​បរិស្ថាន និងជាអនុប្រធានអចិន្រ្តៃយ៍ គ.ជ.អ.អ និងការអញ្ជើញ​ចូលរួម​ពី​ថ្នាក់​ដឹកនាំ​អន្តរ​ក្រសួង មន្ទីរពាក់ព័ន្ធ សមាគម សហគមទេសចរណ៍ និងភ្ញៀវកិត្តិយសជាច្រើននាក់ទៀត។

យោងតាមរបៀបវារៈ នៃការរៀបចំវេទិកានៅព្រឹកថ្ងៃនេះ បានឲ្យដឹងថា ក៏​នឹង​មាន​រៀបចំ​ពិធី​ចុះហត្ថ​លេខា​ចំនួន ៣ផងដែរ មានដូចជា៖ ពិធីចុះហត្ថលេខាលើកិច្ចព្រមព្រៀងស្តីពី “ការ​គ្រប់​គ្រង​សហគមន៍តំបន់ការពារធម្មជាតិ” រវាងអគ្គនាយកដ្ឋានសហគមន៍មូលដ្ឋាននៃក្រសួងបរិស្ថាន និង​សហគមន៍ចំនួន៦ , ពិធីចុះហត្ថលេខា​លើ​អនុស្សារណៈ​យោគយល់​រវាង​គណៈកម្មាធិការ​ជាតិ​គ្រប់​គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (គ.ជ.អ.អ.) និង​អង្គការ​សម្ព័ន្ធ​ភាព ដើម្បីអភិរក្សធនធានជលផល (FACT) និងពិធី​ចុះហត្ថ​លេខា​លើ​ផែនការ​សកម្មភាព​រួម​ សម្រាប់ឆ្នាំ២០២៣ រវាង គណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និង​អេកូទេសចរណ៍ (គ.ជ.អ.អ.) និងនាយកដ្ឋាន សេដ្ឋកិច្ចស្ត្រីនៃក្រសួងកិច្ចការនារី។

សូមបញ្ជាក់ថា តាមរយៈការរៀបចំវេទិកាជាតិអេកូទេសចរណ៍​ លើកទី៣នេះ គឺដើម្បី​ជា​ការ​ជួប​ជុំ​ថ្នាក់​​ជាតិដ៏ធំ រវាងថ្នាក់ដឹកនាំរាជរដ្ឋាភិបាល ក្រសួង ស្ថាប័នពាក់ព័ន្ធ ផ្នែកឯកជន តំណាង​សហគមន៍​ទូទាំងប្រទេស អង្គការជាតិ-អន្តរជាតិ និងដៃគូពាក់ព័ន្ធនានា ដើម្បីបន្តរួមគ្នា ពិភាក្សា​ផ្លាស់​ប្តូរ​មតិយោបល់ និងបទពិសោធន៍លើការងារអេកូទេសចរណ៍ និងទេសចរណ៍សហគមន៍ ក្នុង​បរិបទ​គន្លងថ្មី នៃ​ការរស់នៅ (New Normal Life)។