ភ្នំពេញ៖ ដូចការគ្រោងទុក នៅថ្ងៃទី២១ខែវិច្ឆិកានេះ ពិព័រណ៍ខួប៣០ឆ្នាំ នៃសកម្មភាពមីននៅកម្ពុជា បានឲ្យសាធារណជនចូលទស្សនា ​ដើម្បីឈ្វេងយល់ពីសកម្មភាពមីន។

ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន នៅព្រឹកថ្ងៃទី២១ខែវិច្ឆិកានេះ អញ្ជើញ​ចូលរួម​ជាអធិបតីភាពក្នុងពិធីបើកពិព័រណ៍ខួប៣០ឆ្នាំ ​នៃសកម្មភាពមីននៅកម្ពុជា ​ស្ថិតនៅមុខ​មហោស្រព​កោះពេជ្រ ​ដោយមានការចូលរួមពីសំណាក់ភ្ញៀវជាតិ ​និងអន្តរជាតិ ព្រមទាំង​សិស្សានុសិស្ស​ប្រមាណ ៣០០នាក់ផងដែរ។

នៅក្នុងឱកាសនោះ ឯកឧត្តមទេសរដ្ឋមន្រ្តីលី ធុជ បានថ្លែងថា ក្រោមការដឹកនាំរបស់សម្តេចតេជោ​ ហ៊ុន សែន នាយករដ្ឋមន្រ្តីកម្ពុជា ប្រជាជនកម្ពុជា​ត្រូវបានរំដោះពីរបបប្រល័យពូជសាសន៍ កម្ពុជា​ទទួលបាន​សន្តិភាពពេញលេញ ​បានបោសសម្អាតមីន ​និងសំណល់ជាតិផ្ទុះពីសង្គ្រាម ដើម្បី​ការពារ​អាយុជីវិតប្រជាជនកម្ពុជា ​និងទប់ស្កាត់គ្រោះថ្នាក់។

លើសពីនេះ ​ឯកឧត្តម បន្តទៀតថា បេសកម្មភាពមីនរួមគ្នា របស់រាជរដ្ឋាភិបាល ប្រទេសផ្តល់ជំនួយ ដៃគូអភិវឌ្ឍន៍ ​ប្រតិបត្តិករជាតិ-អន្តរជាតិ ​និងគ្រប់ភាគីពាក់ព័ន្ធ ក្នុងរយៈពេល៣០ឆ្នាំនេះ ពិតជា​បាន​រួមចំណែក​យ៉ាងធំធេងក្នុងការដោះស្រាយផលបះពាល់ដោយសារមីន និងសណល់ជាតិផ្ទុះ​ពី​សង្គ្រោមនៅកម្ពុជា។ ជារួមផ្ទៃដីជាង២ពាន់គីឡូម៉ែត្រក្រឡា ត្រូវបានបោសសម្អាតនិងប្រែក្លាយ​ជា​ដីសុវត្ថិភាព​សម្រាប់ប្រជាជនប្រើប្រាស់ ​រាប់​បញ្ចូល​ទាំងការសាងសង់លំនៅដ្ឋាន សាលារៀន មន្ទីរពេទ្យ និងកសិកម្មជាដើម។

ពិព័រណ៍ខួប៣០ឆ្នាំ នៃសកម្មភាពមីននៅកម្ពុជា ​ចាប់ពីថ្ងៃទី២១ និង២២ ខែវិច្ឆិកា ឆ្នាំ២០២២ ដោយ​អនុញ្ញាត​ឲ្យសាធារណៈជន​ ចូលរួមទស្សនា ដោយសេរីនិងមានដាក់តាំងបង្ហាញពីសមិទ្ធផល​សកម្មភាព​មីន​ក្នុងរយៈពេល៣០ឆ្នាំ មានដូចជា៖ ​ឧបករណ៍ ម៉ាស៊ីន គ្រឿងចក្របោសសម្អាតមីន ការបង្ហាញ​ការដោះមីនដោយដៃ​ ព្រមទាំងការប្រើប្រាស់ប្រព័ន្ធហិតរកមីន និងសំណល់​ជាតិផ្ទុះពីសង្គ្រាម ដោយសត្វ សុនខ និងកណ្តុរ។

បន្ថែមលើនេះ ​ក៏មានការបង្ហាញពីកិច្ចសង្គ្រោះជនរងគ្រោះ ការអប់រំកាត់បន្ថយគ្រោះថ្នាក់ ការ​ប្រើប្រាស់​បច្ចេកវិទ្យាគ្រប់គ្រងព័ត៌មាន ​និងឧបករណ៍បច្ចេកទេសទំនើបៗ ក្នុងការដោះស្រាយ​បញ្ហាមីន​ និងសំណល់ជាតិផ្ទុះពីសង្រ្គាម៕ អត្ថបទ៖ទូច សោភ័ណ