សៀមរាប៖ អាជ្ញាធរខេត្តសៀមរាបលើកឡើងថា ការបិទខ្ទប់តំបន់ណាមួយដើម្បីទប់ស្កាត់ការចម្លងជំងឺកូវីដ-១៩ វាគឺជាជម្រើសចុងក្រោយដើម្បីស្តារស្ថានភាពឡើងវិញ យ៉ាងណាក៏ដោយកិច្ចប្រជុំបន្ទាន់មួយបានបង្ហាញ នូវផែនការត្រៀមបម្រុងឆ្លើយតបចំពោះស្ថានភាពនោះ ដោយផ្ដោតជាសំខាន់ទៅលើបញ្ហារក្សាស្ថិរភាព ផ្គត់ផ្គង់ស្បៀងអាហារលើទីផ្សារ និងការចម្លងជំងឺរាលដាលក្នុងសហគមន៍។
ផែនការត្រៀមទប់ស្កាត់ការរីករាលដាលនៃជំងឺកូវីដ-១៩ រួមទាំងផែនការត្រៀមបម្រុងឆ្លើយតប ក្នុងករណីមានការបិទខ្ទប់តំបន់ណាមួយ បញ្ចៀសហានិភ័យធ្ងន់ធ្ងរនោះ អាជ្ញាធរខេត្តសៀមរាបបានបើកកិច្ចប្រជុំបន្ទាន់មួយ ដែលពាក់ព័ន្ធជាសំខាន់គឺរឹតបន្តឹងការអនុវត្តវិធានការសុវត្ថិភាព ក្នុងនោះត្រូវបានផ្តោតទៅលើផែនការផ្គត់ផ្គង់ត្រីសាច់ បន្លែ គ្រឿងទេស កាត់បន្ថយការប្រមូលផ្តុំមនុស្សច្រើននៅទីប្រជុំផ្សារ ធានាឲ្យបានការគ្រប់គ្រងហានីភ័យនៃការចម្លងរវាងអាជីវករ និងអតិថិជនជាអ្នកទិញ។ កិច្ចប្រជុំនេះធ្វើឡើងនាព្រឹកថ្ងៃទី១៥ ខែមេសា ឆ្នាំ២០២១ ដោយមន្ត្រីពាក់ព័ន្ធ រួមមានអនុគណៈកម្មការស្រាវជ្រាវ តាមដានបុគ្គលសង្ស័យមានមេរោគកូវីដ-១៩ មន្ទីរពាណិជ្ជកម្ម មន្ទីរព័ត៌មាន និងសមាគមសហគ្រិនវ័យក្មេងសាខាប្រចាំខេត្ត រដ្ឋបាលក្រុងសៀមរាបក៏មានវត្តមានផ្ដល់ការពិភាក្សាក្នុងកិច្ចប្រជុំនោះដែរ។
តាមប្រសាសន៍របស់ឯកឧត្ដម ទៀ សីហា អភិបាលខេត្តសៀមរាបបានបង្ហាញថា ចាំបាច់មន្ត្រីជំនាញពាក់ព័ន្ធ ត្រូវបង្កើតឲ្យមានខ្សែបណ្ដាញទំនាក់ទំនងរវាងអ្នកលក់បោះដុំ និងអ្នកលក់ចែកចាយបន្ត ដើម្បីធានាថាក្នុងអំឡុងពេលនៃការបិទខ្ទប់ ពុំមានបញ្ហាចោទឡើងអំពីស្បៀង ម្ហូបអាហារ និងតម្រូវការផ្សេងៗទៀតនោះឡើយ។ កិច្ចប្រជុំនេះបានបង្ហាញវិធីសាស្ត្រ បង្កភាពងាយស្រួលដល់ការទំនាក់ទំនងរវាងអ្នកអ្នកលក់ និងអ្នកទិញ លើកទឹកចិត្តដល់សេវាដឹកជញ្ជូនសំដៅទៅដល់អ្នករ៉ឺម៉កម៉ូតូ ត្រីចក្រយានយន្តផាស់អាប់ អ្នករត់ម៉ូតូឌុប ដែលទទួលបានការចាក់វ៉ាក់សាំងបង្ការរួចហើយ។ ការទិញលក់តាមអនឡាញ ការទិញលក់ទំនិញគ្រប់ប្រភេទ ត្រូវបានដាក់ឲ្យប្រើប្រាស់ ការទូទាត់សាច់ប្រាក់តាមប្រព័ន្ធធនាគារ ដែលនេះជាវិធីសាស្ត្រ ជួយបង្ការហានីភ័យផងដែរ ចំពោះការចម្លងជំងឺកូវីដ-១៩ ចូលក្នុងសហគមន៍។
យោងតាមករណីយរកឃើញវិជ្ជមានកូវីដ-១៩ លើអាជីវករផ្សាក្រោមត្រូវបានកិច្ចពិភាក្សាគ្នានេះ ដាក់ចេញនូវផែនការស្រង់ស្ថិតិអាជីវករ នៅក្នុងផ្សារទាំងអស់នៃខេត្តសៀមរាប ដោយចាត់ទុកថា ជាក្រុមមនុស្សអាទិភាពសម្រាប់ទទួល យកការចាក់វ៉ាក់សាំងបង្ការជំងឺកូវីដ-១៩ រួមទាំងប្រតិបត្តិករទេសចរណ៍ផងដែរ ដើម្បីត្រៀមលក្ខណៈសម្រាប់ថ្ងៃអនាគត ដែលវិស័យមួយនេះអាចនឹងក្រោកឈរឡើងវិញ នៅពេលដែលការចាក់វ៉ាក់សាំងឈានដល់ភាគរយ នៃការកាត់បន្ថយហានីភ័យចម្លងនោះ។ យ៉ាងណាក៏ដោយ ការបិទខ្ទប់តំបន់ណាមួយដែលផ្ទុះការចម្លងជំងឺកូវីដ១៩ វាគឺជាជម្រើសចុងក្រោយដើម្បីទប់ទល់ស្តារស្ថានភាពឡើងវិញ ក៏ប៉ុន្តែមានតែការចូលរួមរបស់ប្រជាពលរដ្ឋប៉ុណ្ណោះ ដែលជម្រើសចុងក្រោយនេះមិនត្រូវបានយកមកប្រើប្រាស់ ព្រោះវាមិនមានការចម្លងនៅក្នុងសហគមន៍៕ អត្ថបទ៖ ងឹន គឹមឡេង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
