ភ្នំពេញ៖ ផ្សារភ្ជាប់ជាមួយអេកូទេសចរណ៍ និងទេសចរណ៍ រដ្ឋាភិបាលកម្ពុជារំពឹងថា នៅឆ្នាំ​២០២៣ខាងមុខ នឹង​អាចទាក់ទាញភ្ញៀវទេសចរផ្ទៃក្នុងធ្វើដំណើរ​កម្សាន្តតាមតំបន់​រមណីយដ្ឋាន​នានា​ក្នុង​ប្រទេស​កម្ពុជា​ចំនួន​ប្រមាណ ១១លាននាក់។

នៅក្នុងពិធីបើកវេទិកាជាតិអេកូទេសចរណ៍​ លើកទី៣ នៅព្រឹកថ្ងៃទី២១ ​វិច្ឆិកា ឆ្នាំ២០២២នេះ ឯកឧត្តម​បណ្ឌិត ថោង ខុន រដ្ឋមន្រ្តីក្រសួងទេសចរណ៍​ និងជាប្រធានគណៈកម្មាធិការជាតិគ្រប់គ្រង និង​អភិវឌ្ឍន៍សហគមន៍ទេសចរណ៍ និងអេកូទេសចរណ៍ (គ.ជ.អ.អ) ​មានប្រសាសន៍ឲ្យដឹងថា រាជ​រដ្ឋាភិបាល​បាន​អនុម័តដាក់ឲ្យប្រើប្រាស់ផែនទីចង្អុលផ្លូវស្តីពីផែនការស្ដារ និងលើកស្ទួយវិស័យ​ទេសចរណ៍កម្ពុជាក្នុង ​និងក្រោយវិបត្តិជំងឺកូវីដ-១៩ កាលពី ឆ្នាំ២០២១ ដោយក្នុងនោះអនុវិស័យ​អេកូទេសចរណ៍ ​គឺជាសសរស្តម្ភមួយក្នុងចំណោមសសរស្តម្ភទាំង៤ (ទេសចរណ៍ វប្បធម៌ ទេសចរណ៍ឆ្នេរ ​អេកូទេសចរណ៍ ​និងភាពជាខ្មែរ) ក្នុងការស្តារ និងលើកស្ទួយវិស័យ​ទេសចរណ៍​កម្ពុជា។

ឯកឧត្តម បានបន្តថា តាមផែនការដែលបានដាក់ចេញ ​និងភ្ញៀវទេសចរអន្តរជាតិប្រមាណ ៧លាន​នាក់ រហូតដល់ឆ្នាំ២០២៦ ឬឆ្នាំ២០២៧ ​ជាមួយភាព​មិនប្រាកដ​ប្រជានៃវិបត្តិជំងឺកូវីដ-១៩ និង​វិបត្តិ​សកលលោកនានា ​ខណៈដែលរយៈពេល​ ១០ខែ ឆ្នាំ២០២២នេះ យើងទទួលបានភ្ញៀវ​អន្តរជាតិ​ប្រមាណ ១,៥ លាននាក់ និងរំពឹងថានឹងទទួលបានប្រមាណ ​២លាននាក់ ​សម្រាប់ឆ្នាំ២០២២នេះ។

ឯកឧត្តម ថោង ខុន​ បានបញ្ជាក់ថា ​កម្ពុជាគឺសំបូរទៅដោយសក្តានុពលធម្មជាតិ និងអេកូ​ទេសចរណ៍​នៅទូទាំងប្រទេស រាប់ចាប់ពីតំបន់ឆ្នេរសមុទ្រដែលជាសមាជិកក្លឹបឆ្នេរសមុទ្រដែលស្អាត​បំផុត​លើសាកលលោក ​តំបន់ជួរភ្នំក្រវ៉ាញ រួម​ បញ្ចូល​ទាំងតំបន់អារ៉ែង​ តំបន់បឹងទន្លេសាប និងតំបន់ភូមិ​ភាគឦសាន ដែលមានសត្វផ្សោតដ៏កម្រជាដើម។

ក្នុងន័យនេះ ការអភិវឌ្ឍជាសហគមន៍ទេសចរណ៍ ​និងអេកូទេសចរណ៍ ​ដែលមានចរិតយុទ្ឋសាស្ត្រ និង​នយោបាយ ពិតជាបានរួមចំណែកសំខាន់​ក្នុងការអភិវឌ្ឍ​នៅតាមមូលដ្ឋាន។

តាមរយៈវេទិកាថ្ងៃនេះ ​ឯកឧត្តមរដ្ឋមន្រ្តី ​បានស្នើឲ្យក្រសួង ស្ថាប័នពាក់ព័ន្ធ ​បង្ហាញជូនអង្គវេទិកាឲ្យ​បាន​គ្រប់ជ្រុងជ្រោយ​ នូវគោលនយោបាយ ​និងផែនការសកម្មភាពអាទិភាព ក្នុងការជំរុញការ​ដោះ​ស្រាយទៅលើបញ្ហាសំខាន់ៗ ​ដូចជាការស្ថាបនាផ្លូវតភ្ជាប់ទៅតំបន់សហគមន៍ ​ការផ្គត់ផ្គង់អគ្គិសនី ការផ្គត់ផ្គង់ទឹកស្អាត ​ការបន្តតំឡើងប្រព័ន្ធទូរស័ព្ទ ​និងប្រព័ន្ឋអ៊ីនធើណែត ​ការគ្រប់គ្រងសំរាម ការ​ដោះមីន និងគ្រាប់មិនទាន់ផ្ទុះ ការព្យាបាលជំងឺគ្រុនចាញ់ ​និងបញ្ហាផ្សេងៗរបស់សហគមន៍ ពិសេស​ឆ្លើយតបតាមតម្រូវការជាក់ស្តែងរបស់ប្រជាពលរដ្ឋមូលដ្ឋាន ដើម្បីចូលរួមចំណែកដល់ការ​អភិវឌ្ឍវិស័យអេកូទេសចរណ៍ ​និងទេសចរណ៍សហគមន៍ប្រកបដោយប្រសិទ្ធភាព៕ អត្ថបទ៖ បូរ៉ាវី