ស្ទឹងត្រែង៖ កម្លាំងសមត្ថកិច្ចចម្រុះចុះទប់ស្កាត់ការធ្វើចរាចរ របស់ប្រជាពលរដ្ឋនៅពេលយប់ និងផ្អាកអាជីវកម្មលក់ដូរដែលមិនចាំបាច់នានាជាបណ្ដោះអាសន្ន ដើម្បីអនុវត្តវិធានការរដ្ឋបាល និងវិធានការសុខាភិបាល ក្នុងការទប់ស្កាត់ការឆ្លងជំងឺកូវីដ១៩ នៅក្នុងភូមិសាស្ត្រខេត្តភាគឦសានមួយនេះ។
រដ្ឋបាលខេត្តស្ទឹងត្រែងបានដាក់ចេញនូវបម្រាមគោចរ និងការធ្វើអាជីវកម្មលក់ដូរដែលមិនចាំបាច់ ជាពិសេសការលក់ដូរគ្រឿងស្រវឹង នៅពេលយប់ជាបណ្ដោះអាសន្ន ក្នុងកាលបរិច្ឆេទរយៈពេលពី ៥ថ្ងៃទៅ ៧ថ្ងៃចាប់ពីថ្ងៃទី១៤ ដល់ថ្ងៃទី២០ ខែមេសានេះ ដោយភ្ជាប់ជាមួយនឹងការដាស់តឿនប្រជាពលរដ្ឋ អ្នកដំណើរ ក្រុមហ៊ុន ម្ចាស់អាជីវកម្ម ម្ចាស់រថយន្តដឹកជញ្ជូន អាជីវកម្មរមណីយដ្ឋាន និងគ្រប់ផ្នែកពាក់ព័ន្ធទាំងអស់ ឲ្យចូលរួមអនុវត្តវិធានការសុខាភិបាល និងវិធានការរដ្ឋបាល ក្នុងគោលដៅធានាទប់ស្កាត់ការឆ្លងរាលដាលជំងឺកូវីដ-១៩ ចូលភូមិសាស្ត្រខេត្តស្ទឹងត្រែង។ ក្នុងការអនុវត្តវិធានការបម្រាមគោចរនេះ កម្លាំងសមត្ថកិច្ចបានឃាត់អ្នកធ្វើដំណើរពេលយប់ និងយានយន្តគ្រប់ប្រភេទ ដែលបានធ្វើចរាចរលើសម៉ោងកំណត់នៅក្នុងក្រុងស្ទឹងត្រែង ហើយបានអនុវត្តវិធានការរដ្ឋបាលដោយបានធ្វើការផាកពិន័យ ហើយពន្យល់ណែនាំដល់ប្រជាពលរដ្ឋ អ្នកដំណើរ អំពីគោលបំណងនៃការដាក់បម្រាមគោចរនេះ។ អ្នកនាំពាក្យរដ្ឋបាលខេត្តស្ទឹងត្រែង លោក ម៉ែន គង់ បានឲ្យដឹងថា ការដាក់ចេញនូវបម្រាមគោចរនេះបានធ្វើឡើង បន្ទាប់ពីទទួលបាននូវការណែនាំ របស់ប្រមុខរាជរដ្ឋាភិបាលតាមការចាំបាច់ និងបន្ទាន់។
លោកបានបញ្ជាក់ថា រាល់ការអនុវត្តវិធានការរដ្ឋបាល ប្រសិនបើមានបុគ្គលណាមួយមិនព្រមអនុវត្តតាមនោះទេ បុគ្គលនោះនឹងទទួលការផាកពិន័យអន្តរការណ៍ ដែលស្របតាមស្មារតីនៃប្រកាសអន្តរក្រសួងលេខ១០៤៥ ប្រក ចុះថ្ងៃទី៨ ខែមេសា ឆ្នាំ២០២១ របស់ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ និងបទបញ្ញត្តិច្បាប់ លិខិតបទដ្ឋានគតិយុត្តិជាធរមាន។ លោកបានបន្តទៀតថា ការដាក់ចេញនូវសេចក្តីសម្រេច របស់រដ្ឋបាលខេត្តនាពេលនេះ គឺដើម្បីធានាការទប់ស្កាត់ការឆ្លងរាលដាលជំងឺកូវីដ-១៩ និងដើម្បីការពារអាយុជីវិតប្រជាជន សុខភាពសាធារណៈ និងសន្តិសុខសាធារណៈក្នុងមូលដ្ឋានភូមិសាស្ត្រខេត្តស្ទឹងត្រែង ស្របពេលដែលរាជធានី-ខេត្តមួយចំនួនកំពុងរងនូវការរីករាលដាលជំងឺកូវីដ-១៩ នៅក្នុងសហគមន៍ដ៏គួរឲ្យព្រួយបារម្ភបំផុត បើទោះបីខេត្តស្ទឹងត្រែងពុំទាន់មានអ្នកវិជ្ជមានមេរោគកូវីដ-១៩ ក៏មែនពិត៕
អត្ថបទ៖ មាស ផល្លា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
