ភ្នំពេញ៖ ដូចការគ្រោងទុក នៅថ្ងៃទី២១ ខែវិច្ឆិកានេះ ក្រសួងការពារជាតិ បានរៀបចំបើកវគ្គហ្វឹកហ្វឺន​គ្រូបង្គោលថ្នាក់អាស៊ាន ​និងថ្នាក់តំបន់ស្តីពីការបោសសម្អាតមីន រយៈពេល១៩ថ្ងៃ ដែលមាន​សិក្ខាកាម​យោធាចូលរួម ១០ប្រទេស។

នាយឧត្តមសេនីយ៍ សែម សុវណ្ណនី ថ្លែងថា វគ្គហ្វឹកហ្វឺននេះ​បាន​បង្ហាញ​ការ​ប្តេជ្ញាចិត្តរបស់កម្ពុជា បន្តចូលរួមចំណែកក្នុងបេសកកម្មរក្សាសន្តិភាពអង្គការសហប្រជាជាតិUN ស្មើភាពគ្នា​ក្រោមឆ័ត្រUN ។

នាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីន ​និងជាអគ្គនាយកមជ្ឈមណ្ឌលជាតិ​រក្សាសន្តិភាព ​បានថ្លែងថា ​នេះជាលើកទី៥ ​ដែលកម្ពុជា​ក្រោម​ជំនួយ​ឧបត្ថម្ភ​ពី​រដ្ឋាភិបាលបារាំង និង​អូស្ត្រាលី រៀបចំវគ្គហ្វឹកហ្វឺនគ្រូបង្គោលថ្នាក់អាស៊ាន ​និង​ថ្នាក់​តំបន់របស់UN ស្តីពីបច្ចេកទេស​បោសម្អាត​មីន និងគ្រប់គ្រងចំការមីន​ រយៈពេល១ឆ្នាំម្តង ​ខណៈការរៀបចំលើកដំបូង ​គឺកម្ពុជា បានធ្វើឡើង​នៅឆ្នាំ២០១៧ ​ហើយក្រោយមកកម្ពុជា ​បានអាកខានរៀបចំនួន២ឆ្នាំ​ដោយសារ​ការ​រាតត្បាត​មេរោគកូវីដ១៩។

ឯកឧត្តម​នាយឧត្តមសេនីយ៍​ សែម សុវណ្ណនី ថ្លែងថា ​យ៉ាងណាក៏ដោយកម្ពុជា ​មានមោទនភាព ដែល​មជ្ឈដ្ឋាន​អន្តរជាតិផ្តល់ការគាំទ្រ ​រៀបចំវគ្គ​ហ្វឹកហ្វឺន​ចែក​រំលែកបទពិសោធន៍ និង​ចំណេះដឹង​ស្តីពីការងារមីន ​ជូនបណ្តាប្រទេស​ក្រោមឆ័ត្រUN ដើម្បីពង្រីកការចូលរួមសកម្មភាពមនុស្សធម៌​លើ​អន្តរជាតិ ស្តីពីការងារបោសសំអាតមីននេះ។

ឯកឧត្តម បានថ្លែងដែរ ក្នុងរយៈពេល១៦ឆ្នាំកន្លងមកនេះ​ នាយទាហានកម្ពុជា​ ចំនួន៨៣០២នាក់ ក្នុងនោះ​នារី ៥៨០នាក់ ​បានចូលរួមបំពេញបេសកកម្មថែរក្សាសន្តិភាពអង្គការប្រជាជាតិ ប្រកប​ដោយ​ភាពជោគជ័យ ​ហើយបច្ចុប្បន្នកម្ពុជា​ មាននាយទាហានជា ៨០០នាក់ ក្នុងនោះនារី១១៨នាក់ បាន​និងកំពុងបេសកកម្មថែរក្សាសន្តិភាព​នៅតាមបណ្តាប្រទេសចំនួន​ ៤រួមមាន ៖ ប្រទេស​ស៊ូដង់ខាងត្បូង លីបង់ ម៉ាលី ​និងអាហ្វ្រឹកកណ្តាល ​ ហើយកងកម្លាំងទាំងនោះគឺបានក្លាយ​ជាគ្រួសារ​អង្គការសប្រជាជាតិ ​និងជា​បងប្អូន​លើ​សកល​លោក ​ដែល​បានជួយផ្តល់សេ្ថរភាពមួយផ្នែក​ជូន​ពិភពលោកនេះផងដែរ។

សូមបញ្ជាក់ថា ​សិក្ខាកាមយោធា ១០ប្រទេស​ដែល​បានចូលរួមវគ្គ​ហ្វឹកហ្វឺន​ថ្នាក់​អាស៊ាន និងថ្នាក់​តំបន់រយៈ១៩ថ្ងៃនេះរួមមាន៖ ប្រទេសឥណ្ឌូនេស៊ី ថៃ វៀតណាម ហ្វីលីពីន ម៉ាឡេស៊ី នេប៉ាល់ បង់ក្លាដែស ឡាវ ម៉ុងហ្គោលី និងកម្ពុជាខ្លួនឯងសរុបជាង៣១រូប៕ អត្ថបទ ស៊ុម សុខជា