ភ្នំពេញ៖ ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន នៅថ្ងៃទី២១ ខែវិច្ឆិកានេះ បានអញ្ជើញចូលរួមជាអធិបតីភាពក្នុងពិធីបើកសន្និបាតខួប ៣០ឆ្នាំ នៃសកម្មភាពមីននៅកម្ពុជា ក្រោមប្រធានបទ “ផ្តល់ដីសុវត្ថិភាព បង្កើតស្នាមស្នាមញញឹម” ដោយមានចូលរួមពីសំណាក់ភ្ញៀវជាតិ អន្តរជាតិ ប្រតិបត្តិករបោសសម្អាតមីន និងដៃគូពាក់ព័ន្ធមួយចំនួនទៀតផងដែរ។ ពិធីនេះ ប្រារព្ធ​ឡើងនៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

នៅក្នុងឱកាសនោះ ឯកឧត្តម ទេសរដ្ឋមន្រ្តី លី ធុជ បានថ្លែងថា រយៈពេល ៣០ឆ្នាំ ពោលចាប់តាំងពីឆ្នាំ១៩៩២ ដល់ឆ្នាំ២០២២ កម្ពុជាសម្រេចបានសមិទ្ធផលជាច្រើន ក្នុងនោះរួមមាន៖ ការបោសសម្អាតមីន និងសំណល់ជាតិផ្ទុះ ពីសង្រ្គាមនៅទូទាំងប្រទេស ដែលបានរំដោះផ្ទៃដីជាច្រើនពាន់ហិកតា បានរកឃើញនិងបំផ្លាញមីន និងសំណល់ជាតិផ្ទុះពីសង្រ្គាមជាច្រើនលានគ្រាប់ សម្រាប់ការតាំងលំនៅដ្ឋាន ការធ្វើកសិកម្ម និងការកសាងហេដ្ឋារចនាសម្ព័ន្ធជាច្រើនទៀត។

ឯកឧត្តមបន្តទៀតថា កម្ពុជាក្នុងនាមជាប្រទេសរងគ្រោះ រាជរដ្ឋាភិបាលពុំបានព្រងើយកន្ដើយ ក្នុងការចូលរួមថវិកាដោយផ្ទាល់ ផ្ដល់ដល់សកម្មភាពមីននោះទេ។ ក្នុងរយៈពេលជាង ៣០ឆ្នាំនេះ រាជរដ្ឋាភិបាល បានផ្ដល់ថវិកាប្រមាណជាង ២០០លានដុល្លារអាមេរិក សម្រាប់ចូលរួមក្នុងការងារសកម្មភាពមីននៅកម្ពុជា ព្រមទាំងទ្រទ្រង់ដល់ដំណើរការស្ថាប័ន និងការត្រួតពិនិត្យ តាមដានការអនុវត្តផែនការយុទ្ធសាស្ត្រជាតិ។

ដើម្បីសម្រេចឲ្យបាននូវជោគជ័យ និងឈានដល់ការប្រកាសរួមគ្នា “ឆ្ពោះទៅរកកម្ពុជាមួយដែលគ្មានមីនឆ្នាំ២០២៥” តាមចក្ខុវិស័យរបស់រាជរដ្ឋាភិបាល សកម្មភាពមីននៅកម្ពុជា ក្រោមការសម្របសម្រួលរបស់អាជ្ញាធរមីន ដែលជាសេនាធិការរបស់រាជរដ្ឋាភិបាល ត្រូវការជាចាំបាច់ភាពជាដៃគូ និងកិច្ចសហប្រតិបត្តិការគ្រប់រូបភាព ជាមួយក្រសួងស្ថាប័ន ប្រទេសជាមិត្ត ដៃគូអភិវឌ្ឍន៍ ប្រតិបត្តិករជាតិ-អន្តរជាតិ វិស័យឯកជន សប្បុរសជន និងភាគីពាក់ព័ន្ធ ក្នុងការដោះស្រាយបញ្ហាប្រឈមនានា ឆ្លើយតបនឹងតម្រូវការចំាបាច់ និងគោលដៅអាទិភាពនៃគោលនយោបាយ របស់រាជរដ្ឋាភិបាលប្រកបដោយប្រសិទ្ធភាព និងប្រសិទ្ធផល។

បើតាមរបាយការណ៍របស់អាជ្ញាធរមីន បានឲ្យដឹងថា ក្នុងរយៈពេល ៣០ឆ្នាំ ផ្ទៃដីជាង ២ពាន់គីឡូម៉ែត្រក្រឡា ត្រូវបានបោសសម្អាត និងប្រែក្លាយជាដីសុវត្ថិភាព សម្រាប់ប្រជាជនប្រមាណ ៩លាននាក់ ប្រើប្រាស់ដោយរាប់បញ្ចូលទាំងការសាងសង់លំនៅដ្ឋាន សាលារៀន មន្ទីរពេទ្យ ស្ពានថ្នល់ និងកសិកម្មជាដើម។អត្ថបទ៖ទូច សោភ័ណ ​