ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីន បានថ្លែងថា ក្នុងរយៈពេល៣០ឆ្នាំមកនេះ ការងារបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះ គឺជាការងារ ដ៏សំខាន់ ដែលមិនអាចខ្វះបាន ក្នុងការជួយកាត់បន្ថយគ្រោះថ្នាក់ និងប្រែក្លាយដីចម្ការមីន ឱ្យទៅជាដីមាន សុវត្ថិភាព សម្រាប់ពលរដ្ឋប្រើប្រាស់ ។

ក្នុងឱកាសអញ្ជើញបិទសន្និបាតជាតិ ខួប៣០ឆ្នាំ នៃសកម្មភាពមីននៅកម្ពុជា ក្រោមប្រធានបទ “ផ្ដល់ដីសុវត្ថិភាព ផ្ដល់ស្នាមញញឹម” នៅថ្ងៃទី២២ ខែវិច្ឆិកា នេះ សម្ដេចតេជោ ហ៊ុន សែន បានបញ្ជាក់ថា កម្ពុជាបានអនុវត្តសកម្មភាពមីនមនុស្សធម៌ ចាប់ពីឆ្នាំ១៩៩២ ដើម្បីឆ្លើយតបបន្ទាន់ នឹង​ការធ្វើមាតុភូមិ និវត្តន៍របស់ជនភៀសខ្លួន ហើយក្នុងនាមជាប្រទេសស្រឡាញ់សន្តិភាព នៅ​ឆ្នាំ១៩៩៧ កម្ពុជា បានចុះហត្ថលេខា និងបានក្លាយជារដ្ឋភាគី នៃអនុសញ្ញា ស្តីពី ការហាមការ​ប្រើប្រាស់ ការរក្សាទុកការផលិត និងការផ្ទេរគ្រាប់មីនប្រឆាំងមនុស្ស (ឬហៅកាត់ថា អនុសញ្ញាអូតវ៉ា) ក្នុងឆ្នាំ២០០០ ។

សម្ដេចតេជោ បានបញ្ជាក់ទៀតថា នៅឆ្នាំ១៩៩៨ តាមរយៈការអនុវត្តនយោបាយ “ឈ្នះ ឈ្នះ” សង្គ្រាមរ៉ាំរ៉ៃរាប់​ទសវត្សរ៍​ ត្រូវបានបញ្ចប់ រចនាសម្ព័ន្ធយោធារបស់កម្ពុជាប្រជាធិបតេយ្យ ត្រូវបាន​ផ្ដួលរំលំ ហើយប្រទេសជាតិ ​ក៏ទទួលបានមកវិញយ៉ាងពេលលេញនូវសុខសន្តិភាព ការឯកភាពជាតិ និងបូរណភាព ទឹកដី ​ដែលមិនធ្លាប់មានក្នុងប្រវត្តិសាស្ត្រជាង៥០០ឆ្នាំ នៅកម្ពុជា ។

អតីតយុទ្ធជន ដែលបានរងគ្រោះដោយសារគ្រាប់មីន បានថ្លែងអំណរគុណចំពោះសម្ដេចតេជោ ហ៊ុន សែន និងកងកម្លាំងបោសសម្អាតមីនទាំងអស់​ ដែលបាននឹងកំពុងបោសសម្អាតមីន និង​គ្រាប់យុទ្ធ ភណ្ឌមិនទាន់ផ្ទុះនៅទូទាំងប្រទេស ដើម្បីឲ្យដីមានសុវត្ថិភាព និងកុំឲ្យពលរដ្ឋមាន​គ្រោះថ្នាក់ ​ដោយសារ​កាកសំណល់ពីសង្គ្រាមនេះបន្តទៀត ។

ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានឱ្យដឹងថា ​កម្ពុជា នៅមានរយៈពេល បីឆ្នាំទៀត​ ដែលត្រូវបន្តការបោសសម្អាតមីន ​ដើម្បីឈានទៅសម្រេចបានគោលដៅចុងក្រោយ គឺ​ការប្រកាសប្រាប់ពិភពលោកថា ក​ម្ពុជា​ នឹងមិនមានមីនប្រឆាំងមនុស្ស ចាប់ពីឆ្នាំ២០២៥ ហើយ​ការ​គំរាមដោយ ​សារសំណល់ជាតិផ្ទុះពីសង្គ្រាមផ្សេងទៀត ​នឹងត្រូវបានកាត់បន្ថយដល់កំរិតអប្បរមា រីឯការកសាងហេដ្ឋា ​រចនាសម្ព័ន្ធ ​និងការបង្កបង្កើនផល នឹងអាចប្រព្រឹត្តិទៅបាន ដោយ​ពុំមាន​ការភ័យខ្លាចពីការគំរាមកំហែង ​ដោយគ្រាប់ទាំងនោះទៀតទេ ៕ អត្ថបទ៖ បាន សុខរិទ្ធិ