ភ្នំពេញ៖ រាជរដ្ឋាភិបាលកម្ពុជា សម្រេចផ្តល់ថវិកាបន្ថែមចំនួន ១០ លានដុល្លារអាម៉េរិក លើមូលនិធិសម្រាប់ទិញស្រូវចំនួន ៨៣ លានដុល្លារអាម៉េរិក ដើម្បីគាំទ្រដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំចេញអង្ករ ក្នុងការប្រមូលទិញស្រូវពីប្រជាកសិករតាមតម្លៃសមស្រប ជៀសវៀង​ការទិញទម្លាក់ថ្លៃពីឈ្មួញខិលខូចមួយចំនួន។

ធនាគារអភិវឌ្ឍន៍ជនបទ និងកសិកម្ម ប្រកាសជូនដំណឹងដល់សាធារណជន បងប្អូនប្រជាកសិករ រោងម៉ាស៊ីនកិនស្រូវ ​ក្រុមហ៊ុនកែច្នៃនាំចេញអង្ករ និងស្ថាប័នពាក់ព័ន្ធ នៃផែនការជំរុញការប្រមូល​ទិញស្រូវ ​និងជួយរក្សាស្ថិរភាពតម្លៃស្រូវជូនប្រជាកសិករ ក្នុងនោះរាជរដ្ឋាភិបាលកម្ពុជា ដែលមាន​ក្រសួងសេដ្ឋកិច្ច និងហិរញ្ញវត្ថុជាសេនាធិការ​ បានគិតគូរយ៉ាងយកចិត្តទុកដាក់ខ្ពស់ និងសម្រេចផ្តល់​ថវិកាបន្ថែមចំនួន ១០ លានដុល្លារអាម៉េរិក លើមូលនិធិសម្រាប់ទិញស្រូវចំនួន ៨៣ លាន​ដុល្លារ​អាមេរិក តាមរយៈធនាគារអភិវឌ្ឍន៍ជនបទ ​និងកសិកម្ម សម្រាប់គាំទ្រ​ដល់​រោងម៉ាស៊ីន​កិនស្រូវ និងក្រុមហ៊ុនកែច្នៃនាំចេញអង្ករ ក្នុងការប្រមូលទិញស្រូវពីប្រជាកសិករតាម​តម្លៃសមស្រប ជៀសវៀង​ការទិញទម្លាក់ថ្លៃពីឈ្មួញខិលខូចមួយចំនួន។

ជុំវិញការផ្តល់ថវិកាបន្ថែមថវិកានេះ លោក លន់ យ៉េង អគ្គលេខាធិការសម្ព័ន្ធស្រូវអង្ករកម្ពុជា ថ្លែងនូវការសាទរចំពោះរាជរដ្ឋាភិបាល ​ដែលបានទម្លាក់កញ្ចប់ថវិការបន្ថែម សម្រាប់ការ​ផ្តល់​ជាកម្ចីដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំចេញអង្ករផ្សេងៗ មានលទ្ធភាពយក​ថវិកា​ទាំងនោះទៅប្រមូលទិញស្រូវបន្ថែម ​នៅក្នុងរដូវច្រូតកាត់ដែលកំពុង​ជួប​ប្រទះ ជំរុញប្រមូល​ទិញ​ឲ្យបានទាន់ពេលវេលា ​ដែលជាផ្នែកមួយជួយលើកកម្ពស់វិស័យស្រូវអង្ករកម្ពុជា ជាពិសេស​ការជួយដល់កសិករដែលកំពុងជួបប្រទះ។

សូមបញ្ជាក់ថា​ ក្នុងរយៈពេលប៉ុន្មានថ្ងៃនេះ ​តម្លៃស្រូវមានការ​ប្រែប្រួល​នៅ​តាមបណ្តារខេត្ត​ផលិត​ស្រូវមួយចំនួន ​ជាពិសេសខេត្តបាត់ដំបង ​និងខេត្តបន្ទាយមានជ័យ ដែលបណ្តាលមកពីរដូវប្រមូល​ផលធំ ​ហើយមានការច្រូតកាត់ព្រមគ្នា ជាហេតុធ្វើឱ្យបរិមាណស្រូវដែលត្រូវលក់មាន​ចំនួនច្រើន​ក្នុងពេលតែមួយ ។

ការណ៍នេះធ្វើឱ្យរោងម៉ាស៊ីន​កិនស្រូវពុំអាចប្រមូលទិញស្រូវទាំងអស់នោះបាន ​ដែលនាំឱ្យតម្លៃ​ស្រូវ​មានការប្រែប្រួលធ្លាក់ចុះ​ បើធៀបទៅនឹងដើមរដូវ។ ​ជុំវិញបញ្ហានេះ ធនាគារអភិវឌ្ឍន៍ជនបទ និង​កសិកម្ម ក៏សូមអំពាវនាវឱ្យប្រជាកសិករតាមតំបន់ ​ដែលត្រូវប្រមូលផលស្រូវ សូមដាក់កម្មវិធី​ច្រូតកាត់ជាមួយរោងម៉ាស៊ីនកិនស្រូវ​ នៅក្នុងតំបន់របស់ខ្លួន ដើម្បីជៀសវៀងការប្រមូលផល​ក្នុង​ពេលតែមួយព្រមគ្នា ​ដែលអាចបណ្តាលឱ្យមានការបង្គាប់ថ្លៃស្រូវ៕អត្ថបទ៖ សុន រ៉ាឌី