កូរ៉េខាងជើង៖ ទោះបីជាមានការបង្ហាញខ្លួនដោយចៃដន្យ របស់កូនស្រីមេដឹកនាំកូរ៉េខាងជើងលោក Kim Jong Un បានបង្កើនពីការរំពឹងទុកថា នាងអាចជាអ្នកបន្តវេនក៏ដោយ អ្នកវិភាគនិយាយថា វានឹងក្លាយជាការព្យាយាមដ៏ពិបាកដែលមិនធ្លាប់មានពីមុនមកនៅក្នុងត្រកូលដែលយកបុរសជាធំ។
ការផ្លាស់ប្តូរមួយលើកៗនៅថ្នាក់កំពូលក្នុងប្រទេសកូរ៉េខាងជើង បានបង្កើនការរំពឹងទុកនៃតំណែងដឹកនាំនៅទំនេរ ឬការដួលរលំនៃអំណាចរបស់ត្រកូល Kim ដែលបានគ្រប់គ្រងប្រទេសចាប់តាំងពីការបង្កើតឡើងក្នុងឆ្នាំ១៩៤៨។ កូនស្រីរបស់លោក Kim Jong Un ដែលមិនត្រូវបានបញ្ជាក់ឈ្មោះនៅក្នុងប្រព័ន្ធផ្សព្វផ្សាយរដ្ឋ បានបង្ហាញខ្លួននៅក្នុងព្រឹត្តិការណ៍បាញ់មីស៊ីលបាលីស្ទីកកាលពីថ្ងៃសៅរ៍ ទី១៩ ខែវិច្ឆិកា ដែលតាមដានមើលការបាញ់មីស៊ីល និងកាន់ដៃឪពុករបស់នាង ខណៈលោក Kim ពិនិត្យមើលមីស៊ីល។ ក្រុមអ្នកវិភាគបាននិយាយថា នេះបានផ្តល់ការបញ្ជាក់ជាផ្លូវការលើកដំបូងថា លោក Kim មានកូនច្រើន និងជាសារបញ្ជាក់ថា គ្រួសារនៅទីនេះនៅតែមានអ្នកបន្តវេន។ យោងតាមអ្នកផ្តាច់ខ្លួនកូរ៉េខាងជើងម្នាក់បាននិយាយថា ការបង្ហាញខ្លួនកូនស្រីរបស់លោក Kim ទំនងមិនមែនជាភស្តុតាងដែលបង្ហាញថា របបស្ថិតក្នុងភាពឯកោមួយនេះបានត្រៀមខ្លួន សម្រាប់ស្ត្រីជាមេដឹកនាំនាពេលអនាគតរបស់ខ្លួននោះទេ។ នៅក្នុងប្រទេសកូរ៉េខាងជើង យ៉េនឌ័រនៅតែជាកត្តាសំខាន់ដើម្បីក្លាយជាមេដឹកនាំ។
វាអាចធ្វើទៅបាន ប្រសិនបើលោក Kim Jong Un មិនមានកូនប្រុស ប៉ុន្តែតាមដែលគេដឹងគឺលោកមានកូនប្រុស។ លោក Hyun In-ae ដែលបច្ចុប្បន្នបម្រើការនៅវិទ្យាស្ថាន Ewha នៃការសិក្សាការបង្រួបបង្រួមក្នុងទីក្រុងសេអ៊ូលបាននិយាយថា ក្រោមកាលៈទេសៈនេះលោក Kim មិនអាចមិនអើពើចំពោះកូនប្រុសរបស់លោក និងអនុញ្ញាតឱ្យកូនស្រីធ្វើជាមេដឹកនាំនៅពេលអនាគតនោះទេ។ នៅប្រទេសកូរ៉េខាងជើងគេនិយាយថា ស្ត្រីមានសិទ្ធិស្មើគ្នា ប៉ុន្តែស្ត្រីនៅតែត្រូវបានគេមើលឃើញថា ជាឥស្សរជនគាំទ្រសម្រាប់បុរស។ អ្នកវិភាគមួយចំនួននិយាយថា យ៉េនឌ័រមិនអាចធ្វើឱ្យកូនស្រី ឬស្ត្រីផ្សេងទៀតមិនអាចកាន់តំណែងបាននោះទេ។ លោក Kim បានដំឡើងឋានៈស្ត្រីជាច្រើនរូបឱ្យកាន់តំណែងដ៏មានឥទ្ធិពល រួមទាំងប្អូនស្រីរបស់លោកគឺលោកស្រី Kim Yo Jong និងលោកស្រី Choe Son Hui ជារដ្ឋមន្ត្រីការបរទេសស្ត្រីដំបូងរបស់ប្រទេស៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
