ភ្នំពេញ៖ គិតមកដល់ពេលនេះ បេក្ខជនប្រលងបាក់ឌុបឆ្នាំនេះ ​បានត្រៀមខ្លួនរួច ខណៈការប្រឡង នឹងចាប់ ផ្តើមនៅដើមធ្នូខែក្រោយនេះ។

សិស្សថ្នាក់ទី១២ សិក្សានៅវិទ្យាល័យសម្តេច ហ៊ុន សែន ប៊ុនរ៉ានី ច្បារអំពៅ នៅថ្ងៃទី២២ ខែវិច្ឆិកា នេះ បានប្រាប់BTVឲ្យដឹងថា បច្ចុប្បន្ន ពួកគេ កំពុងមមាញឹករៀនបំប៉នក្រៅម៉ោងសិក្សារបស់សាលារដ្ឋ ទៅ តាមមុខវិជ្ជាសំខាន់ៗមួយចំនួន ដើម្បី​ឱ្យ​ទទួលបានជោគជ័យក្នុងការប្រឡងឆ្នាំនេះ។ ពួកគេ បានលើកពី បច្ចេកធ្វើឲ្យខួរក្បាល​ចងចាំផងដែរ ។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងសន្និសីទ ស្តីពីការប្រឡងបាក់ឌុប ​កាលពីថ្ងៃទី២១ ខែវិច្ឆិកា ម្សិលមិញ បានបញ្ជាក់ថា ការប្រឡងបាក់ឌុប​ឆ្នាំនេះ នៅទូទាំងប្រទេស មានបេក្ខជនចូលរួមប្រឡងប្រមាណជាង ១២ម៉ឺននាក់ ហើយការ​ប្រឡង​នឹងប្រព្រឹត្តទៅនៅថ្ងៃទី៥ និងទី៦ ខែធ្នូ ឆ្នាំ២០២២។

ចំពោះការប្រឡងនេះរាល់បទបញ្ញតិ្ត ឬបទបញ្ជាទាំងអស់ ត្រូវអនុវត្តតាម ដែលមាន ដូចជា៖ ហាមមិន​ឲ្យយកសំណៅ​ ឬឯកសារសំណេរ ការលួចចម្លង​ ឬចម្លងតាមគ្នា ​ការប្រឡងជំនួស និង ការ​សូកប៉ាន់ជាដើម។ សម្រាប់លទ្ធផលនៃការប្រឡងបាក់ឌុប ​នៅរាជធានីភ្នំពេញ​ និងខេត្តកណ្ដាល នឹង ​ត្រូវប្រកាសនៅថ្ងៃទី២៧ ខែធ្នូ ​ហើយសម្រាប់ខេត្តផ្សេងៗទៀត នឹងត្រូវប្រកាសនៅថ្ងៃទី២៨ ខែធ្នូ ឆ្នាំ២០២២។

នៅឆ្នាំ២០២១ ​បេក្ខជនប្រលងសញ្ញាបត្រមធ្យមសិក្សាទុតិភូមិ ​បានប្រឡងជាប់ ​ចំនួន៧២,០១៦ នាក់ ត្រូវជា៦៥.៦៥% ​ក្នុងនោះបេក្ខជនដែលទទួលបាននិទ្ទេស ​A​ មានចំនួនជាង១ពាន់នាក់​ និទ្ទេស B មាន​ចំនួនជាង៥ពាន់នាក់ និទ្ទេស C មានចំនួនជាង១ម៉ឺន និទ្ទេស D មានចំនួនជាង២ម៉ឺននាក់ និង និទ្ទេសE មានចំនួនជិត៣ម៉ឺននាក់ ៕អត្ថបទ៖ ទូច សោភ័ណ