ភ្នំពេញ៖ ថ្ងៃទី២២ ខែវិច្ឆិកានេះ ឯកឧត្តម កិត្តិនីតិកោសលបណ្ឌិត ឱម យិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ បានបើកកិច្ចប្រជុំថ្នាក់ដឹកនាំប្រឆាំងអំពើពុករលួយអាស៊ាន PAC លើកទី១៨ ក្រោមប្រធានបទ៖ រួមគ្នាប្រឆាំងអំពើពុករលួយ ការពង្រឹងសមត្ថភាពស្ថាប័ន​ប្រឆាំងអំពើពុករលួយ​ និងកិច្ចសហប្រតិបត្តិការក្នុងប្រទេសនីមួយៗ​ ក្នុងក្របខ័ណ្ឌអាស៊ាន PAC(ផេក)។

ឯកឧត្តម ទេសរដ្ឋមន្ត្រី ឱម យិនទៀង ថ្លែងថា ប្រធានបទដែលថ្នាក់ដឹកនាំប្រឆាំងអំពើពុករលួយ​អាស៊ាន​លើកទី១៨ លើកយកមកពិភាក្សានេះ គឺធ្វើឡើងស្របតាមគោលបំណង និងផ្នែកនៃកិច្ច​សហប្រតិបត្តិការ ដែលមានចែងនៅក្នុងខ្លឹមសារអនុសារណៈនៃយោគយល់គ្នា ​រវាងអាស៊ាន PAC ដែលអាស៊ាន​បានខិតខំប្រឹងប្រែងរៀបចំបន្តវេនគ្នា​ពីអណត្តិមួយទៅអាណត្តិមួយទៀត ដើម្បីធ្វើការ​អភិវឌ្ឍ និងសម្រួលខ្លឹមសារ សម្រាប់អនុវត្តរួមគ្នា​ ក្នុងកិច្ចប្រយុទ្ធប្រឆាំងអំពើពុករលួយនៅក្នុង​តំបន់។

សម្រាប់ភាពម្ចាស់ផ្ទះរៀបចំកិច្ចប្រជុំអាស៊ានPACឆ្នាំ២០២២នេះ ឯកឧត្តម ឱម យិនទៀង ក៏បាន​ថ្លែង​កោតសរសើរថ្នាក់ដឹកនាំប្រឆាំងអំពើពុករលួយអាស៊ាន ដែលបានប្តេជ្ញាចិត្តរួមគ្នាជា​បន្តបន្ទាប់ ក្នុងសកម្មភាពកិច្ចសហប្រតិបត្តិការប្រឆាំងអំពើពុករលួយ និងចូលរួមកែសម្រួលខ្លឹមសារ​អនុសារណៈការ​យោគយល់គ្នា ​នៃកិច្ចប្រជុំអាស៊ានPAC​ ហើយ​ ឯកឧត្តម ​ក៏ស្នើអាស៊ានPAC បង្កើន​កិច្ចសហប្រតិបត្តិការក្នុងកិច្ចកសាងសមត្ថភាពស្ថាប័ន​ប្រឆាំងអំពើពុករលួយ​ប្រទេសនីមួយៗ​របស់​អាស៊ានPAC និងស្នើពង្រីកកិច្ចសហប្រតិបត្តិការទ្វេរភាគី​ និងពហុភាគី ក្នុងចំណោមភាគី​អាស៊ានPAC ​តាមរយៈយន្តការនានាដែលមានស្រាប់ ​និងយន្តការតាមប្រទេសដែលចង់ធ្វើ។

ឯកឧត្តម ​ក៏បានបញ្ជាក់ពីសាររបស់ប្រមុខថ្នាក់ដឹកនាំរាជរដ្ឋាភិបាលជូនកិច្ចប្រជុំអាស៊ាន​PAC ដែរថា តាមរយៈកិច្ចប្រជុំអាស៊ានPAC នេះ នឹងបន្តការខិតខិតប្រឹងប្រែងពង្រីងពង្រីកកិច្ច​សហប្រតិបត្តិការ​ក្នុងការប្រយុទ្ធប្រឆាំងអំពើពុករលួយ ​ទាំងក្នុងក្របខ័ណ្ឌប្រទេសនិង តំបន់ ហើយនេះក៏ជាសក្ខីភាព​នៃ​ការប្តេជ្ញាចិត្តរួមគ្នា​ របស់បណ្តាប្រទេសនីមួយៗក្នុងតំបន់អាស៊ាន ដើម្បីចូលរួមលើកស្ទួយ​អភិបាលកិច្ចល្អ ​បង្កើតបរិយាកាសស្អាតស្អំ របស់ស្ថាប័នរដ្ឋ ​និងវិស័យឯកជន ក្នុងបំណង ជម្រុញ​ការរួមគ្នាអភិវឌ្ឍន៍ប្រកបដោយចិរភាព ដែលទាំងនេះសុទ្ធសឹងជាបំណងប្រាថ្នារបស់រដ្ឋាភិបាល និងប្រជាជនយើងទាំងអស់គ្នា។

សូមបញ្ជាក់ថា នេះជាលើកទី២ ដែលអង្គភាពប្រឆាំងអំពើពុករលួយកម្ពុជា បានធ្វើជាម្ចាស់ផ្ទះរៀបចំ​កិច្ចប្រជុំថ្នាក់ដឹកនាំប្រឆាំងអំពើពុករលួយអាស៊ាន ​ ខណៈការកម្ពុជា រៀបចំលើកដំបូង​នៅឆ្នាំ២០១០៕ អត្ថបទ ស៊ុម សុខជា