សៀមរាប៖ ក្នុងឱកាសអញ្ជើញមកចូលរួមកិច្ចប្រជុំរដ្ឋមន្ត្រីការពារជាតិអាស៊ានបូកលើកទី៩ នៅខេត្តសៀមរាប នាព្រឹកថ្ងៃទី២៣ ខែ​វិច្ឆិកា ឆ្នាំ​២០២២នេះ បណ្តារដ្ឋមន្ត្រីការពារជាតិអាស៊ាន និង​រដ្ឋមន្ត្រីការពារជាតិដៃគូ ​ដឹកនាំដោយ ដាតុ ផាឌូកា សឺរី ហាជី អាវ៉ាង ហាលប៊ី ប៊ីន ហាជី ម៉ូ យូសូហ្វ នៃប្រទេសព្រុយណេដារ៉ូសាឡាម ត្រូវបានសម្តេចតេជោ ហ៊ុន សែន ​នាយករដ្ឋមន្ត្រីកម្ពុជា និងជា​ប្រធានអាស៊ានប្តូរវេនឆ្នាំ២០២២ អនុញ្ញាត​ឱ្យចូល​ជួបសំដែងការគួរសម មុនពេលអញ្ជើញចូលរួម​បើកកិច្ច​ប្រជុំរដ្ឋមន្ត្រីការពារជាតិអាស៊ានបូកលើកទី៩ជាផ្លូវការ។

ឯកឧត្តម អ៊ាង សុផល្លែត ​ជំនួយការផ្ទាល់សម្តេចតេជោ ​បានឱ្យដឹងថា ជួសមុខឱ្យរដ្ឋមន្ត្រីការពារ​ជាតិ​អាស៊ាន​យូសូហ្វ បានសាទរចំពោះសម្តេចដែលបានដឹកនាំកិច្ច​ប្រជុំកំពូលអាស៊ាន​និងកិច្ចប្រជុំកំពូល​ពាក់ព័ន្ធកន្លងទៅបានជោគជ័យ។

ជាការឆ្លើយតប សម្ដេចតេជោ ​បានស្វាគមន៍រដ្ឋមន្ត្រីការពារជាតិអាស៊ាននិង​ដៃគូដែលបានមកកាន់​ទីក្រុងសៀមរាប​រួមគ្នាដោះស្រាយបញ្ហាសន្តិសុខ។

សម្ដេចក៏បានថ្លែងអំណរគុណផងដែរដល់ថ្នាក់​ដឹកនាំកំពូល​និងរដ្ឋមន្ត្រីការពារជាតិអាស៊ាន ​និងដៃគូ​ដែល​បានគាំទ្រ​ភាពជាប្រធានអាស៊ាន និងប្រធានកិច្ចប្រជុំពាក់​ព័ន្ធរួមទាំង​កិច្ចប្រជុំរដ្ឋមន្ត្រី​ការពារជាតិ​អាស៊ាន​របស់កម្ពុជាផងដែរ។

សម្ដេចតេជោ ឆ្លៀតក្នុងឱកាសនោះ​បានសំដែងនូវការអបអរសាទរចំពោះជំនួប​រវាងរដ្ឋមន្ត្រី​ការពារជាតិ​ចិន​ និងរដ្ឋមន្ត្រីការពារជាតិសហរដ្ឋអាមេរិក​ហើយក៏​បាន​មានប្រសាសន៍ថា ទីក្រុង​សៀមរាប ​ជាកន្លែងដែលសក្តិសមសម្រាប់ជំនួបនេះ៕អត្ថបទ៖ មុត​ សុទ្ធ