ភ្នំពេញ៖ ឯកឧត្តមទេសរដ្ឋមន្រ្តី លី ធុជ ប្រធានគណៈកម្មាធិការជាតិអេស្កាប់ នៃរាជរដ្ឋាភិបាល​កម្ពុជា មានប្រសាសន៍ថា កម្ពុជាគឺជាករណីជាក់ស្តែងមួយដែលបង្ហាញថា សន្តិភាព និង​ស្ថិរភាព​នយោបាយ​ គឺជាកត្តាចាំបាច់សម្រាប់ការកសាងមូលដ្ឋានសេដ្ឋកិច្ច និងអភិវឌ្ឍន៍សង្គម។

ថ្លែងបែបនេះក្នុងពិធីបើកសិក្ខាសាលាថ្នាក់តំបន់ ស្តីពី “ការពង្រឹងសមត្ថភាពផលិតភាព និងការ​សម្រួល​បរិវត្តកម្មរចនាសម្ព័ន្ធរបស់ប្រទេសដែលមានការអភិវឌ្ឍតិចតួចក្នុងតំបន់អាស៊ីប៉ាស៊ីហ្វិក” ដែលសហការរៀបចំដោយ គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី​និងប៉ាស៊ីហិ្វក​របស់​អង្គការសហប្រជាជាតិ (UN ESCAP) សន្និសីទសហប្រជាជាតិស្ដីពីពាណិជ្ជកម្មនិងការអភិវឌ្ឍ (UNCTAD) ​និងគណៈកម្មាធិការជាតិអេស្កាប់នៃ ​រាជរដ្ឋាភិបាលកម្ពុជា ដែលប្រព្រឹត្តទៅ​នៅថ្ងៃ​ទី២៣-២៤ ខែវិច្ឆិកា ​ឆ្នាំ២០២២ ​នាសណ្ឋាគារកាំបូឌីយ៉ាណារាជធានីភ្នំពេញ។

សិក្ខាសាលានេះ ​មាន​សមាសភាពអ្នកចូលរួមពីគណៈប្រតិភូ​មកពីប្រទេសដែល​មានការ​អភិវឌ្ឍ​តិចតួច​ក្នុងតំបន់អាស៊ី និងប៉ាស៊ីហ្វិក ​រួមមាន៖ បង់ក្លាដែស ប៊ូតាន ឡាវ នេប៉ាល់ ទីម័រឡេស្តេ និងរួមទាំងកម្ពុជាផងដែរ។

ក្នុងឱកាសនោះ ​ឯកឧត្តមទេសរដ្ឋមន្ត្រី បានលើកឡើងបន្ដថា បន្ទាប់ពីទទួលបាន​ សន្តិភាពពេញ​លេញនៅចុងឆ្នាំ១៩៩៨ ​និងមុនការរីករាលដាលនៃជំងឺកូវីដ-១៩ សេដ្ឋកិច្ចកម្ពុជាមានការរីកចម្រើន​ជា​ទីកត់សម្គាល់ ដោយបានងាកចេញពីវិស័យកសិកម្ម ​ដោយសារការរីកលូតលាស់​នៃ​វិស័យ​ឧស្សាហកម្ម ពោលគឺការនាំចេញ​សំលៀកបំពាក់ និងការរីកលូតលាស់នៃវិស័យសេវាកម្ម ដោយការរីក​ចម្រើននៃវិស័យទេសចរណ៍។ ​កម្ពុជាមានកំណើនសេដ្ឋកិច្ចជាមធ្យមក្នុងរង្វង់ ៧,៧% ក្នុងមួយឆ្នាំ ក្នុងចន្លោះឆ្នាំ ១៩៩៨ និង២០១៩ ​ដែលធ្វើឱ្យកម្ពុជាក្លាយជាប្រទេសមួយក្នុង​ចំណោម​ប្រទេស​ដែលមានការអភិវឌ្ឍលឿនបំផុតក្នុងពិភពលោក។ អត្រាភាពក្រីក្រនៅកម្ពុជា​បានបន្ត​ធ្លាក់​ចុះពី ៥៣% ក្នុងឆ្នាំ ២០០៤ មកត្រឹម ១៧,៨% ក្នុងឆ្នាំ ២០១៩។

ឯកឧត្តមទេសរដ្ឋមន្ត្រី ក៏បានគូសបញ្ជាក់ផងដែរថា ភាពរុងរឿងរបស់កម្ពុជា ដែលរួមមានកំណើន​សេដ្ឋកិច្ច​ខ្ពស់​ប្រកបដោយ​ចីរភាព ​ការកាត់បន្ថយភាពក្រីក្រ ​និងភាពប្រសើរឡើងនៃកម្រិតជីវភាព​របស់​ប្រជាពលរដ្ឋ ដែលយើងកំពុងមាននាពេលបច្ចុប្បន្ន មិនមែនបានមកដោយចៃដន្យនោះទេ តែវាជាលទ្ធផល​នៃគោលនយោបាយ “ឈ្នះ-ឈ្នះ” របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ​ព្រះរាជាណាចក្រកម្ពុជា ដែលបានបញ្ចប់សង្គ្រាមស៊ីវិល និងលើកកម្ពស់​បរិយាប័ន្ន​សម្រាប់ប្រជាជនកម្ពុជា គ្រប់ស្រទាប់វណ្ណៈ និងនិន្នាការនយោបាយ។ ប្រទេសកម្ពុជា បាន​ទទួលសន្តិភាព និងការផ្សះផ្សាជាតិជាលើកដំបូងក្នុងប្រវត្តិសាស្ត្រនៅចុងឆ្នាំ ១៩៩៨ ​ហើយសង្រ្គាម​ដែលអូសបន្លាយជាង ៣០ ឆ្នាំបានបញ្ចប់នៅពេលដែលខ្មែរក្រហមបានបាក់បែក និងចូលរួមជាមួយ​រដ្ឋាភិបាលស្របច្បាប់។

ឯកឧត្តមទេសរដ្ឋមន្ត្រី ក៏បានលើកឡើងអំពីវិបត្តិមួយចំនួន ដែលក្នុងនោះមានដូចជា វិបត្តិជំងឺកូវីដ-១៩ សង្គ្រាមនៅអ៊ុយក្រែន ការប្រកួតប្រជែងភូមិសាស្ត្រនយោបាយ និងការប្រកួតប្រជែង​រវាង​ប្រទេសមហាអំណាច សង្គ្រាម​ពាណិជ្ជកម្មនិងបច្ចេកវិទ្យា ជម្លោះប្រដាប់អាវុធ ភេរវកម្មនិងឧក្រិដ្ឋកម្ម​ឆ្លងដែន​ និងការប្រែប្រួលអាកាសធាតុ ដែលទាំងអស់នេះគឺជាសម្ពាធដ៏ខ្លាំងមកលើសន្តិភាព និងសន្តិសុខពិភពលោក។

ឯកឧត្តម បានបន្ថែមថា ក្នុងអំឡុងវិបត្តិជំងឺកូវីដ-១៩ ផលិតផលក្នុងស្រុកសរុបរបស់កម្ពុជាមាន​កំណើន​អវិជ្ជមាន​ ក៏ប៉ុន្តែវាបានចាប់ផ្តើមងើបឡើងវិញបន្តិចម្តងៗក្នុងឆ្នាំ ២០២១ និង ២០២២។ ការចាកចេញពីឋានៈប្រទេសមាន​ចំណូលទាប ក្លាយជាប្រទេសមានចំណូលមធ្យមកម្រិតទាបរបស់​កម្ពុជា​ក្នុងឆ្នាំ២០១៥ ក៏ជា​សញ្ញាមួយបង្ហាញថា កម្ពុជានឹងអាចសម្រេចបានឋានៈប្រទេសមាន​ចំណូល​មធ្យមកម្រិត​ខ្ពស់ត្រឹមឆ្នាំ ២០៣០។

នាឱកាសនោះផងដែរ ទេសរដ្ឋមន្ត្រី លី ធុជ បានលើកឡើងអំពី “ក្របខណ្ឌគោលនយោបាយជាតិ​ផលិតភាព​សេដ្ឋកិច្ចកម្ពុជា ២០២២-២០៣៥” ដែលរាជរដ្ឋាភិបាលកម្ពុជា បានប្រកាសដាក់​ឱ្យ​អនុវត្ត​ជាផ្លូវការនាពេលថ្មីៗនេះ ​ដើម្បីបង្កើនការទាក់ទាញការវិនិយោគ ​និងពាណិជ្ជកម្ម និងលើកកម្ពស់ ផលិតភាព​សេដ្ឋកិច្ចជាតិរបស់កម្ពុជា ឱ្យកាន់តែប្រសើរឡើង ព្រមទាំងដោះស្រាយបញ្ហាប្រឈម និង ហានិភ័យ​នៃការបង្អាក់ខ្សែច្រវាក់ផ្គត់ផ្គង់​សកលផងដែរ។ ក្របខណ្ឌគោលនយោបាយនេះ បាន​កំណត់​ចក្ខុវិស័យ​កសាង និងលើកកម្ពស់ផលិតភាពសេដ្ឋកិច្ចជាតិ ដោយផ្អែកលើកម្លាំងពលកម្ម​ជំនាញ​ខ្ពស់ ​ដើម្បីជំរុញសន្ទុះការអភិវឌ្ឍសង្គម-សេដ្ឋកិច្ច ឱ្យកាន់តែប្រសើរ​សំដៅពង្រឹងសន្តិសុខ សេដ្ឋកិច្ច និងសុខុមាលភាពសង្គម ប្រកបដោយចីរភាព និងបរិយាប័ន្ន និងត្រូវសម្រេច​ឱ្យបាន​ក្នុងរយៈពេល ១៤ឆ្នាំខាងមុខ។

ទេសរដ្ឋមន្ត្រី បានបន្ថែមថា ដើម្បីសម្រេចបាននូវចក្ខុវិស័យនេះ កម្ពុជាត្រូវការការចូលរួម និងគាំទ្រ​ពីដៃគូអន្តរជាតិគ្រប់ទិសទី ហើយសមិទ្ធិផលជាច្រើនដែលកម្ពុជាសម្រេចបាននាពលកន្លងមក បាន​បង្ហាញឱ្យឃើញថា ការចូលរួមរបស់ដៃគូអភិវឌ្ឍន៍ និងវិស័យឯកជន ពិតជានាំមកនូវភាពជោគជ័យ ហេតុនេះ ឆ្ពោះទៅមុខបន្តទៀត ​វាទាមទារឱ្យមានកិច្ចសហប្រតិបត្តិការរវាងក្រសួង ស្ថាប័ន វិស័យ​ឯកជន ដៃគូអភិវឌ្ឍន៍ និងគ្រប់ភាគីពាក់ព័ន្ធ ដើម្បីសម្រេចបានគោលដៅកំណត់ដោយ​រាជ​​រដ្ឋាភិបាល។

លោកទេសរដ្ឋមន្ត្រី លី ធុជ បានបង្ហាញពីក្តីសង្ឃឹមដ៏មុតមាំរបស់ឯកឧត្តមសម្រាប់ការពង្រឹង​ពហុភាគី​​និយម​ជាមួយអង្គការសហប្រជាជាតិ ដើម្បីពង្រឹងសាមគ្គីភាពអន្តរជាតិសម្រាប់ពិភពលោក ដើម្បីទទួល​បានជ័យជម្នះលើវិបត្តិកូវីដ-១៩ ជំរុញសន្តិភាព ការអភិវឌ្ឍប្រកបដោយចីរភាព និងវិបុលភាពរួមគ្នាសម្រាប់ទាំងអស់គ្នា៕