ភ្នំពេញ៖ ក្រសួងវប្បធម៌ និងវិចិត្រសិល្បៈ និងក្រសួងសង្គមកិច្ច អតីតយុទ្ធជន និងយុវនីតិសម្បទា បានសហការផ្សព្វផ្សាយច្បាប់ ​និងលិខិតបទដ្ឋានគតិយុត្តិនានារបស់ជនការភាព ដើម្បីបង្កើនការ​អនុវត្ត និងជម្រុញការគាំទ្រសក្តានុពល និងធនធាននានារបស់ជនពិការដែលអាចប្រើប្រាស់បាន នៅក្នុងសង្គមវប្បធម៌ សិល្បៈ សាសនា កីឡា ការលម្ហែកាយ ​និងសកម្មភាពនានាទៀត។

នៅក្នុងពិធីផ្សព្វផ្សាយច្បាប់ ​និងលិខិតបទដ្ឋានគតិយុត្តិនានាទាក់ទងនឹងពិការភាព​នៅទីស្តីការក្រសួង​វប្បធម៌ ថ្ងៃទី២៣ ខែវិច្ឆិកានេះ លោកជំទាវ នេត ភូម៉ារី រដ្ឋលេខាធិការ​ក្រសួងវប្បធម៌ និងវិចិត្រសិល្បៈ ថ្លែងថា ដើម្បីជម្រុញការលើកកម្ពស់សិទ្ធជនពិការ និងចូលរួម​អនុវត្តផែនការយុទ្ធសាស្ត្រជាតិស្តីពីជនពិការភាពឆ្នាំ២០១៩ ឆ្នាំ២០២៣​ នៅក្នុងផែ្នកវប្បធម៌បច្ចុប្បន្ន គឺក្រសួង​បានបើកឱកាសឲ្យជនពិការទទួលបានការអប់រំ ​ជំនាញវិជ្ជាជីវៈ ដែលជាអ្នកបង្កើត​នូវ​គំនិត​ប្រាជ្ញាក្នុងការលើកតម្លៃវប្បធម៌ជាតិ អត្តសញ្ញាណជាតិកាន់តែខ្ពស់ថែមទៀតក្នុង​ក្របខ័ណ្ឌជាតិ​ជាតិអន្តរជាតិ។

លោកជំទាវ បន្តថា ដោយឡែក​នៅក្នុងផ្នែកសេដ្ឋកិច្ចវិញ ក្រសួងក៏បានបើកឱកាសផ្តល់លទ្ធភាព​គ្រប់បែប​យ៉ាងជនពិការចូលរួមក្នុងសកម្មភាពវិនិយោគផលិតផល ​សេវាកម្មផ្នែកវប្បធម៌ និង​ទាញ​យកផលចំណិញពីផលិតផលវប្បធម៌ជាតិ ​ដូចជាការបង្កើតស្នាដៃសិល្បៈ ​សោតទស្សន៍ ​ តូរ្យតន្ត្រី ការសម្តែង ​និងបច្ចេកវិទ្យាព័ត៌មានជាដើម។

ឯកឧត្តម ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ថ្លែងថា បច្ចុប្បន្ន​រាជរដ្ឋាភិបាលកម្ពុជា ​កំពុងអនុវត្តយុទ្ធសាស្ត្រមួយចំនួន បង្កឱកាសឲ្យជនមានពិការភាព​ចូលរួមស្មើគ្នា នៅក្នុងសកម្មភាពសង្គម និង​កៀរគរ​ប្រភពធនធាននានារបស់ជនមានពិការភាព​ដែល​មានលទ្ធផលអាចប្រើប្រាស់បាន ​និងមានសក្តានុពល ដូចជា ​ការចូលរួមសម្តែងសិល្បៈ បង្ហាញ​សមត្ថភាព​និងការប្រកួតប្រជែងជាដើម។

ឯកឧត្តម ឯម ច័ន្ទមករា ថ្លែងថា ក្រសួងវប្បធម៌ និងវិចិត្រសិល្បៈ ​បច្ចុប្បន្នគឺមានតួនាទីសំខាន់ណាស់ សម្រាប់កែប្រែស្ថានភាពជីវភាពការរស់នៅរបស់ជនពិការភាព ជាពិសេសភាពស្មើគ្នានៃឱកាស​ក្នុង​វិស័យវប្បធម៌ និងសិល្បៈ និងធនាថា ជនមានពិការភាពមានឱកាសប្រើប្រាស់​សក្តានុពល​ច្នៃប្រឌិត​សិល្បៈនិងបញ្ហារបស់គេដើម្បីបង្កើតឱកាសសម្រាប់សង្គមជាតិទាំងមូល៕ អត្ថបទ ស៊ុម សុខជា