UN៖ ប្រមុខអង្គការសហប្រជាជាតិ (UN) លោក Antonio Guterres បានព្រមានកាលពីថ្ងៃអង្គារថា វោហារសាស្ត្រគ្រោះថ្នាក់នឹងបង្កើតឲ្យមានភាពតានតឹង នៅក្នុងចំណោមគូប្រជែងមហាអំណាចនុយក្លេអ៊ែរ។
លោក Guterres បាននិយាយប្រាប់សន្និសីទសារព័ត៌មាននៅប្រទេសម៉ារ៉ុកថា កំណើនការបែងចែកកំពុងគំរាមកំហែងដល់សន្តិភាព និងសន្តិសុខសកលលោកបង្កឲ្យមានការប្រឈមថ្មី និងធ្វើឲ្យវាកាន់តែពិបាកជាងមុនក្នុងការដោះស្រាយជម្លោះ។ អគ្គលេខាធិការរូបនេះបានព្រមានថា វោហារសាស្ត្រគ្រោះថ្នាក់នឹងបង្កើតឲ្យមានភាពតានតឹងនុយក្លេអ៊ែរ។ ក្នុងពេលតែមួយ ពួកយើងខិតកាន់តែជិតមាត់ជ្រោះដ៏គ្រោះថ្នាក់ទៅក្នុងវិបត្តិអាកាសធាតុ ខណៈដែលពាក្យសំអប់ និងព័ត៌មានមិនពិតកំពុងរីកសាយភាយខ្លាំង។ លោក Guterres បានថ្លែងបែបនេះ ខណៈដែលសង្គ្រាមរុស្ស៊ីនៅអ៊ុយក្រែនជិតឈានដល់ខែទី១០ ដោយគ្មានសញ្ញាណាមួយនៃការបញ្ចប់ ធ្វើឲ្យកើតមានក្តីកង្វល់ដល់សង្គ្រាមនុយក្លេអ៊ែរ។
លោកបន្តថា កម្លាំងនៃការពុំចុះសម្រុងគ្នាកំពុងតែដាស់អារក្សចាស់ ដែលរួមទាំងការប្រឆាំងនឹងជនជាតិយូដា និងសាសនាអ៊ីស្លាមនិយម។ នៅក្នុងពិភពលោកពោរពេញដោយបញ្ហានេះ ពួកយើងត្រូវតែបញ្ឈប់ភាពតានតឹង ជំរុញការរួបរួមសង្គម និងនាំមកនូវសង្គមរឹងមាំកាន់តែខ្លាំងជាងមុន។ សូមបញ្ជាក់ថា លោក Guterres បានថ្លែងសុន្ទរកថានៅជំនួបរបស់សម្ព័ន្ធអរិយធម៌អង្គការសហប្រជាជាតិ ដែលមានគោលដៅបង្កើនវិធានការអន្តរជាតិប្រឆាំងនឹងភាពជ្រុលនិយម និងជាកិច្ចប្រជុំលើកដំបូងគេធ្វើឡើងលើទឹកដីអាហ្វ្រិក៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
