ភ្នំពេញ ៖ ក្រុមការងារគ្រូពេទ្យ នៃការិយាល័យសុខាភិបាល ស្រុកប្រតិបតិ្តមេគង្គ ហៅកាត់OD Mekong បានបន្តយុទ្ធនាការចុះអប់រំ ផ្សព្វផ្សាយ និងចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន រហូតដល់ដូសជំរុញ និងចាក់វ៉ាក់សាំងបង្ការជំងឺ១១មុខ ជូនកុមារអាយុចាប់ពីកើត រហូតដល់អាយុ២ឆ្នាំ ព្រមទាំងផ្តល់ថ្នាំទម្លាក់សត្វល្អិត ជូនប្រជាពលរដ្ឋ សិស្សានុសិស្ស តាមសហគមន៍ វត្តអារាម និងសាលារៀន ទីប្រជុំជន ក្នុងខណ្ឌចំនួន០២។

​លោកវេជ្ជបណ្ឌិត ផាន ភារ័ត្ន ប្រធានការិយាល័យសុខាភិបាល ស្រុកប្រតិបតិ្តមេគង្គ ប្រាប់BTV ព័ត៌មាន នាព្រឹកថ្ងៃទី២៣ ខែវិចិ្ឆកា ឆ្នាំ២០២២នេះថា ការិយាល័យស្រុកប្រតិបតិ្តមេគង្គ គ្របដណ្តប់ក្នុងរដ្ឋបាលខណ្ឌចំនួន០២ គឺខណ្ឌប្ញស្សីកែវ និងខណ្ឌជ្រោយចង្វារ។ ជាក់ស្តែងនាព្រឹកនេះ OD មេគង្គ រួមជាមួយនិងថ្នាក់មនី្ទរសុខាភិបាលរាជធានីភ្នំពេញទាំងមូល បានបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ និងវ៉ាក់សាំងបង្ការជំងឺ១១មុខ ជូនដល់កុមារចាប់ពីកើត រហូតដល់អាយុ២ឆ្នាំ។ ក្នុងនោះដោយអនុវត្តន៍តាមផែនការ គឺយើងចាប់ផ្តើមពីថ្ងៃទី២១ ខែវិចិ្ឆកា រហូតដល់ថ្ងៃទី៤ ខែធ្នូ ឆ្នាំ២០២២ ទន្ទឹមនឹងនោះគឺក្រុមការងារបច្ចេក ដើម្បីបង្កើនការគ្របដណ្តប់ ការចាក់វ៉ាក់សាំងកូវីដ-១៩ ជូនក្រុមគោលដៅ ដូចជានៅតាមមូលដ្ឋានសហគមន៍ សាលារៀន វត្តអារាម ទីប្រជុំជន រោងចក្រ ហើយក៏មានរៀបចំបែងចែកជាច្រើនក្រុម រួមមាន៖ ក្រុមផ្សព្វផ្សាយ ក្រុមចុះចាក់វ៉ាក់សាំង ជាពិសេសប្រជាពលរដ្ឋរស់នៅតាមជួរមាត់ទន្លេ ក៏ក្រុមយើងមានទូក បើកតាមផ្ទះប្រជាពលរដ្ឋ ដើម្បីធ្វើយ៉ាងណាកៀរគរផ្តល់វ៉ាក់សាំងជូនពួកគាត់ទាំងព្រម ទាំងកុមារទើបនឹងកើតរហូតដល់អាយុ២ឆ្នាំ តាមគោលដៅ និងកាលវិភាគត្រូវផ្តល់ជូន ដោយអនុវត្តន៍តាមផែនការដែលបានកំណត់។ អ្វីដែលសំខាន់នោះ ថ្វីត្បិតថាកូវីដ-១៩ មានការថមថយស្ងប់ស្ងាត់ ប៉ុន្តែទោះជាយ៉ាងណាក៏ដោយ ក្រុមការងារគ្រូពេទ្យរបស់យើង មិនធ្វេសប្រហែស និងបង្កើនសកម្មភាព ដើម្បីឲ្យបងប្អូនប្រជាពលរដ្ឋ តាមក្រុមគោលដៅទាំងអស់បានទទួលវ៉ាក់សាំង តាមការណែនាំរបស់រាជរដ្ឋាភិបាល និងក្រសួងសុខាភិបាល និងក្រុមក្មេង ចាប់ពីកើតរហូតដល់អាយុ២ឆ្នាំ ក៏ទទួលបានការគ្របដណ្តប់វ៉ាក់សាំងបង្ការជំងឺ១១មុខផងដែរ។ ចំណែកក្មេងអាយុ២ឆ្នាំ រហូតដល់អាយុ១៥ឆ្នាំ ក៏ផ្តល់ជូនថ្នាំទម្លាក់សត្វល្អិត ដោយហេតុថាយុទ្ធនាការនេះ ចំពេលវេលាមួយដែលត្រូវផ្តល់ថ្នាំ តាមគោលការណ៍របស់ក្រសួងសុខាភិបាល ដែលក្រុមគ្រូពេទ្យយើងផ្តល់ជូនពីរដងក្នុងមួយឆ្នាំ ជាក់ស្តែងក្រុមគ្រូពេទ្យ កំពុងចាក់វ៉ាក់សាំងបង្ការជំងឺកូវីដ-១៩ និងថ្នាំទម្លាក់សត្វល្អិត ជូនសិស្សានុសិស្ស ក្នុងសាលាបឋមសិក្សាប្ញស្សីកែវផងដែរ។

​បើតាមលោក វ៉ា វិសាល លេខាធិការនៃសាលាបឋមសិក្សាប្ញសី្សកែវ បានឲ្យដឹងថា សាលាបឋមសិក្សាប្ញស្សីកែវ មានអគារសិក្សាចំនួន០៧អគារ និងសិស្សានុសិស្សមានចំនួន៣១៤៧នាក់ ស្រី១៤៨៦នាក់ លោកគ្រូ អ្នកគ្រូ មានចំនួន៧៦នាក់ ស្រី៧១នាក់ ទន្ទឹមនឹងនោះលោកគ្រូ អ្នកគ្រូ ទទួលការចាក់វ៉ាក់សាំងកូវីដ១៩ គ្រប់ដូស ស្ទើតែ១០០% សម្រាប់ដូសទី៥ ចំណែកសិស្សានុសិស្ស ក៏ចាក់វ៉ាក់សាំងបង្ការជំងឺកូវីដ១៩ បានច្រើន តាមកាលកំណត់របស់ក្រសួងសុខាភិបាលផងដែរ៕ អត្ថបទ ៖ រដ្ឋា