ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍ថា ទំនាក់ទំនងរវាងសហរដ្ឋអាមេរិកនិងកម្ពុជានៅពេលនេះគឺល្អជាងពេលណាៗទាំងអស់ដែលពេលនេះអាមេរិកមានស្ថានទូតដ៏ល្អដែលមិនធ្លាប់មានពីមុនមក។

ក្នុងជំនួបពិភាក្សាការងាររវាងសម្តេចតេជោនិងឯកឧត្តម Gregory Meeks ប្រធានគណៈកម្មការកិច្ចការបរទេសសភាសហរដ្ឋអាមេរិក នៅវិមានសន្តិភាពនាល្ងាចថ្ងៃទី២៣វិច្ឆិកានេះ ឯកឧត្តមMeeksបានគោរពសំដែងនូវការកោតសរសើរសម្តេចតេជោដែលដឹកនាំកម្ពុជាមានការរីកចម្រើន។

ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោបានឱ្យដឹងថា នៅក្នុងជំនួបនេះឯកឧត្តម Meeks បានគោរពសម្ដែងនូវការថ្លែងអំណរគុណជូនចំពោះសម្ដេចតេជោដែលបានរៀបចំនិងដឹកនាំកិច្ចប្រជុំកំពូលអាស៊ានកិច្ចប្រជុំកំពូលពាក់ព័ន្ធនឹងកិច្ចប្រជុំអាយប៉ាជាពិសេសនៅពេលដែលពិភពលោកកំពុងមានបញ្ហាតានតឹងខាងភូមិសាស្ត្រនយោបាយ។

ទោះជាយ៉ាងណាក៏ដោយឯកឧត្តមបាន បន្ថែមថា ឯកឧត្តមបានសង្កេតឃើញកម្ពុជាបានដឹកនាំកិច្ចប្រជុំខាងលើ បានយ៉ាងជោគជ័យ ដែលសបញ្ចាំងនូវភាពជាអ្នកដឹកនាំដែលអ្នកដទៃទៀតពិបាកនឹងធ្វើដូច។

ឯកឧត្តមបន្តថា ដំណើររបស់ឯកឧត្តមមកកាន់កម្ពុជា ដើម្បីចូលរួមកិច្ចប្រជុំអាយប៉ានៅពេលនេះ គឺដើម្បីពង្រីកទំនាក់ទំនងជាមួយកម្ពុជាបន្ថែមទៀត តាមរយៈការអញ្ជើញមកចូលរួមប្រជុំកំពូលអាស៊ាននិងកិច្ចប្រជុំពាក់ព័ន្ធរបស់ឯកឧត្តមប្រធានាធិបតីចូលបៃដិន តាមរយៈការអញ្ជើញមករបស់ឯកឧត្តមរដ្ឋមន្ត្រីក្រសួងការពារជាតិអាមេរិក មកចូលរួមប្រជុំរដ្ឋមន្ត្រីការពារជាតិអាស៊ានបូកនិងតាមរយៈការមកចូលរួមប្រជុំអាយប៉ាដែលលោកជំទាវអនុប្រធានាធិបតីបានសំដែងការរីករាយយ៉ាងខ្លាំងហើយរូបឯកឧត្តម បានជួបសន្ទនាជាមួយសម្ដេចតេជោគឺជាការប្ដេជ្ញាចិត្តរបស់អាមេរិកចំពោះកម្ពុជានិងអាស៊ានដើម្បីជួយពង្រឹងគ្នាទៅវិញទៅមកនិងទាំងផ្នែកនីតិប្បញ្ញាត្តិ និងផ្នែកនីតិប្រតិបត្តិ។

ជាការឆ្លើយតប សម្ដេចតេជោបានថ្លែងអំណរគុណជូនចំពោះសហរដ្ឋអាមេរិកដែលបានគាំទ្រកម្ពុជាក្នុងភាពជាប្រធានអាស៊ានរៀបចំឲ្យមានកិច្ចប្រជុំកំពូល នៅសហរដ្ឋអាមេរិកផងនិងមកចូលរួមកិច្ចប្រជុំកំពូលនៅកម្ពុជាផង។មិនត្រឹមតែប៉ុណ្ណោះបានរៀបចំឲ្យមានជំនួបរវាងរដ្ឋមន្ត្រីការពារជាតិសហរដ្ឋអាមេរិកនិងរដ្ឋមន្ត្រីការពារជាតិចិននៅទីក្រុងសៀមរាបទៀតផង។

ពាក់ព័ន្ធទំនាក់ទំនងរវាងសហរដ្ឋអាមេរិកនិងកម្ពុជានៅពេលនេះគឺល្អជាងពេលណាទាំងអស់សហរដ្ឋអាមេរិកនៅពេលនេះមានស្ថានទូតដ៏ល្អមួយដែលកន្លងមកមិនធ្លាប់មានហើយចំណែកពាណិជ្ជកម្មរវាងប្រទេសទាំងពីរវិញគឺទំហំពាណិជ្ជកម្មរវាងប្រទេសទាំងពីរគឺមានការកើនឡើងប្រមាណ ១៨% ជាមួយវត្តមានរបស់ក្រុមហ៊ុនFord និងក្រុមហ៊ុន GEដែលកំពុងប្រតិបត្តិការយ៉ាងសកម្មនៅក្នុងព្រះរាជាណាចក្រកម្ពុជា៕