ភ្នំពេញ៖ នៅទីស្តីការក្រសួង នាព្រឹកថ្ងៃទី២៤ ខែវិច្ឆិកា ឆ្នាំ២០២២នេះ មានរៀប​ចំ​សិក្ខា​សាលា​ផ្សព្វ​ផ្សាយស្តីពី ការអនុវត្តកិច្ចព្រមព្រៀងពាណិជ្ជកម្មសេរី​កម្ពុជា-កូរ៉េ សម្រាប់ការនាំចេញក្រោម​វត្តមាន​របស់ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងលោក Lee Hyuk-Sang លេខាទី១ តំណាងឯកឧត្តម Park Heung-Kyeong ឯកអគ្គរដ្ឋទូត នៃ​សាធារណ​កូរ៉េ​ប្រចាំ​នៅ​កម្ពុជា​។

សិក្ខាសាលានេះ មានសិក្ខាកាមអញ្ជើញចូលរួមជាច្រើននាក់ មកពីក្រុមហ៊ុន សហគ្រាស តំណាង​តំបន់​សេដ្ឋកិច្ច​ពិសេស និងតំណាងអ្នកនាំចេញផ្សេងៗទៀតសរុបប្រមាណជិត ២០០នាក់។ សិក្ខា​សាលានេះ រៀបចំឡើង​ក្នុង​គោល​បំណង​ ដើម្បី​ផ្សព្វ​ផ្សាយ​ឲ្យ​ទូលំ​ទូលាយ​អំពី​កិច្ច​ព្រមព្រៀង​នេះ​ឲ្យ​បាន​ជ្រាប​អំពី​ការងារ​សំខាន់ៗ​ដែល​ប្រទេស​ទាំងពីរ​ឈាន​សម្រេច​បាន​ក្នុង​កិច្ច​ចរចា​លើ​ការងា​រនេះ និងឈានចូលជាធរមានជាផ្លូវការ។

សូមរម្លឹកថា ការចរចាបង្កើតកិច្ចព្រមព្រៀងពាណិជ្ជកម្មសេរីកម្ពុជា-កូរ៉េនេះ ត្រូវបាន​ផ្តួច​ផ្តើម​បង្កើត​ឡើង​ដោយ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ក្នុងអំឡុង​ពេល​នៃ​ដំណើរ​ទស្សន​កិច្ច​ផ្លូវ​រដ្ឋរបស់ ឯកឧត្តម Moon Jae-in ប្រធានាធិបតីនៃសាធារណរដ្ឋកូរ៉េប្រចាំនៅកម្ពុជា កាល​ពី​ថ្ងៃ​ទី១៥ ខែមីនា ឆ្នាំ២០១៩ ដែលប្រមុខដឹកនាំ​ទាំងពីរ​បាន​ឯកភាព​គ្នា​បង្កើត​កិច្ច​ព្រម​ព្រៀង​ពាណិជ្ជកម្ម​សេរី​ទ្វេភាគី ដើម្បីពង្រឹងកិច្ចសហប្រតិបត្តិការ និងពង្រីកទំហំ​ពាណិជ្ជកម្ម​ទ្វេភាគី​រវាង​ប្រទេស​ទាំងពីរ។

យោងតាមការសិក្សារួម បានបង្ហាញថា ប្រទេសទាំងពីរ​នឹង​អាច​ទទួល​បាន​ផល​ប្រយោជន៍​ពី​គ្នា​ទៅ​វិញ​ទៅ​មក​លើវិស័យសំខាន់ៗ ដូចជា ពាណិជ្ជកម្មទំនិញ ពាណិជ្ជកម្មសេវាកម្ម វិនិយោគ និង​កិច្ច​សហប្រតិបត្តិការ​សេដ្ឋកិច្ច និងជារួមកិច្ចព្រមព្រៀងនេះ នឹងក្លាយ​ជា​កាតាលីករ​ក្នុង​ការ​ជួយ​ពង្រឹង​ទំនាក់​ទំនង​សេដ្ឋកិច្ច និងនយោបាយបន្ថែមទៀត ព្រមទាំងបង្កើនទំហំពាណិជ្ជកម្មនិងវិនិយោគ និង​កិច្ច​សហប្រតិបត្តិការសេដ្ឋកិច្ចនិងបច្ចេកទេស និងវិស័យដទៃទៀតរវាងប្រទេសទាំងពីរ។