កំពង៉ឆ្នាំង៖ ផ្លូវមួយខ្សែប្រវែងជិត២ពាន់ម៉ែត្រ ចាប់ពីមុខវត្តធម្មយុត្តិ រហូតដល់ផ្លូវជាតិលេខ៥ ត្រង់​​ចំណុច​រូបសំណាកដំរីស ក្រុងកំពង់ឆ្នាំង កំពុងជួសជុលអ៊ុតជាកៅស៊ូAC បាន​ប្រមាណ​៦០%​ហើយ ដែលអាចនឹងរួចរាល់នៅក្នុងចុងខែវិច្ឆិកា ឆ្នាំ២០២២ខាងមុខ។ ការ​ជួស​ជុល​ផ្លូវ​ចាស់​ដោយ​ចាក់​កៅស៊ូ ACបែបនេះ នាំអោយប្រជាពលរដ្ឋនៅក្នុងក្រុងកំពង់ឆ្នាំង មានចិត្តត្រេកអរយ៉ាងខ្លាំង ជា​​ពិសេសសិស្សានុសិស្សដែលធ្វើដំណើរទៅមកសាលារៀន។

លោក ហ៊ីង ភ័ព្វមីនា អភិបាលក្រុងកំពង់ឆ្នាំងបានអោយដឹងថា៖ ផ្លូវមួយខ្សែនេះ ជា​ផ្លូវ​ចាស់​ចាក់​កៅ​ស៊ូ DBST ក៏ប៉ុន្តែបានរងការខូចខាតស្ទើទាំងស្រុងកាលពីកន្លងទៅ តែដោយសារ​មាន​ការ​យកចិត្ត​ទុកដាក់ពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បាន​ចំណាយ​ថវិកា​ខេត្ត​សាងសង់​ផ្លូវ​មួយខ្សែនេះក្លាយជាផ្លូវកៅស៊ូAC ដើម្បីអោយបងប្អូនប្រជាពលរដ្ឋ និងសិស្សានុសិស្ស​ធ្វើ​ដំណើរ​ទៅមកបានងាយស្រួល មិនលំបាកដូចមុនទៀតឡើយ។ ផ្លូវកៅស៊ូមួយខ្សែដែលត្រូវជួសជុលថ្មីឡើងវិញនេះមានប្រវែងជិត ២ពាន់ម៉ែត្រ ខ្នងលើចាក់​កៅស៊ូ​AC​មាន​ទទឹង ៦ម៉ែត្រ ស្ថិតក្នុងសង្កាត់កំពង់ឆ្នាំង ជាថវិការបស់រដ្ឋបាលខេត្តកំពង់ឆ្នាំង។ លោក​អភិបាល​ក្រុងកំពង់ឆ្នាំង បានអំពាវនាវដល់ក្រុមហ៊ុនអគ្គិសនី ក្រុមហ៊ុនខ្សែកាប និងក្រុមហ៊ុន​ទឹក​ស្អាត​មេត្តា​សហការត្រួតពិនិត្យមើលខ្សែភ្លើង ខ្សែកាប និងទុយោ​ទឹកស្អាត​របស់​ខ្លួន​ដែល​មាន​ការ​ពាក់ព័ន្ធ ដើម្បី​ឲ្យដំណើរការជួសជុលផ្លូវកៅស៊ូខាងលើនេះទទួលបានជោគជ័យ។ ចំណែក​ប្រជាពលរដ្ឋ​រស់​នៅតាមដងផ្លូវខាងលើនេះ ត្រូវចូលរួមដាក់​លូ​ដែល​មាន​មុខ​កាត់​៦តឹក​នៅ​តាម​មុខ​ផ្ទះ​របស់​ខ្លួនឲ្យបានគ្រប់ៗគ្នា ។

ឯកឧត្តម ស៊ុន សុវណ្ណារិទ្ធិ អភិបាលខេត្តបានអោយដឹងថា រដ្ឋបាលខេត្តកំពង់ឆ្នាំង បាន​បើក​ការដ្ឋាន​ជួស​ជុល​ផ្លូវ​កៅ​ស៊ូថ្មីប្រភេទACឡើងវិញ ប្រវែងជិត២ពាន់ម៉ែត្រនៅក្នុងសង្កាត់កំពង់ឆ្នាំង ដើម្បី​ជួយ​សម្រួលឲ្យប្រជាពលរដ្ឋយើងបានធ្វើដំណើរដោយងាយស្រួលឡើងវិញ បន្ទាប់​ពី​ផ្លូវ​មួយ​ខ្សែ​នេះ​បាន​រងការខូចខាតដោយជំនន់ទឹកភ្លៀងកន្លងមក។ ជាមួយគ្នានេះដែរ ឯកឧត្តម​អភិបាល​ខេត្ត ក៏បាន​សំណូមពរ​ដល់​ប្រជាពលរដ្ឋ​នៅ​ក្នុង​មូលដ្ឋាន​សូម​ចូលរួម​ជួយ​ដាក់​លូ​នៅ​តាម​មុខ​ផ្ទះ​រៀង​ៗខ្លួន ដើម្បី​រំដោះ​ទឹក​ភ្លៀង​កុំ​ឲ្យ​លិច​លើ​ផ្លូវ​ដែល​នាំ​ឲ្យ​ផ្លូវ​កៅស៊ូ​រង​ការ​ខូចខាត​ប្រើប្រាស់​មិន​បាន​យូរ​អង្វែង។ ដោយឡែក ក្រោយគឺធ្វើផ្លូវកៅស៊ូនេះរួចរដ្ឋបាលខេត្តក្រុមនឹងដាំដើមក្ងោក និង​រៀប​ការ៉ូឡាតាមចិញ្ចើមផ្លូវ ដើម្បីប្រែក្លាយក្រុងកំពង់ឆ្នាំងមានសោភ័ណភាពល្អទាក់ទាញភ្ញៀវទេ សចរ​មកលេងកម្សាន្ត៕ ហុង វាស្នា