ភ្នំពេញ៖ អន្តរក្រសួង និងUNICEF នៅថ្ងៃទី ២៤ ខែវិច្ឆិកា ឆ្នាំ២០២២នេះ បាន​រៀបចំ​កិច្ចប្រជុំចុង​ក្រោយ ​ដើម្បីពិនិត្យឯកភាព ​លើសេចក្ដីព្រាងផែនការយុទ្ធសាស្រ្ត​ដើម្បីអភិវឌ្ឍប្រព័ន្ធគ្រប់គ្រង​ព័ត៌មាន​កិច្ចការពារកុមារ ២០២៣-២០២៧។

អន្តរក្រសួង​ក្រោមការដឹកនាំរបស់ក្រសួងសង្គមកិច្ច​ អតីតយុទ្ធជន និងយុវនីតិសម្បទា រួមទាំង​អង្គការ UNICEF ប្រចាំកម្ពុជា បានរៀបចំកិច្ចប្រជុំចុងក្រោយ ដើម្បីពិនិត្យឯកភាព លើសេចក្ដីព្រាង​ផែនការយុទ្ធសាស្រ្ត ដើម្បីអភិវឌ្ឍប្រព័ន្ធគ្រប់គ្រងព័ត៌មានកិច្ចការពារកុមារ ​២០២៣-២០២៧ មុននឹងបោះពុម្ពផ្សព្វផ្សាយដាក់ឱ្យប្រើប្រាស់ជាផ្លូវការ។

សម្រាប់កិច្ចប្រជុំនេះ ​ឯកឧត្តម ទាវ សុគន្ធ រដ្ឋលេខាធិការក្រសួងសង្គមកិច្ច លើកឡើងថា ប្រព័ន្ធ​គ្រប់គ្រងព័ត៌មានកិច្ចការពារកុមារ​ គឺជាឃ្លាំងទិន្នន័យនៃកិច្ចការពារកុមារ ​មានសូចនាករស្នូលចំនួន ៥០ ​នៃវិស័យចម្បងចំនួន ​៥ ដែលត្រូវរាយការណ៍​ជាប្រចាំដោយមន្ត្រី​បង្គោល​តាមក្រសួង ស្ថាប័ន និងអង្គភាពពាក់ព័ន្ធ។

ឯកឧត្តម បន្តថា ទិន្នន័យដែលមាននៅក្នុងប្រព័ន្ធនេះ គឺជាមូលដ្ឋានដ៏មានសារសំខាន់សម្រាប់ការ​រៀបចំ​គោលនយោបាយ ​ផែនការ កម្មវិធី ​និងការវាយតម្លៃទៅ​លើកម្មវិធីកិច្ចការពារកុមារ សំដៅ​ធ្វើយ៉ាងណាឱ្យសុខុមាលភាពរបស់កុមារកម្ពុជា​ប្រកបដោយភាពសុខដុម ​និង​ទទួលបានសិទ្ធិពេញ​លេញ។

ដោយគិតឃើញពីសារសំខាន់នៃប្រព័ន្ធនេះ​ ក្រសួងសង្គមកិច្ច ​អតីតយុទ្ធជន និងយុវនីតិសម្បទា ដោយ​មាន​កិច្ចសហការជាមួយអង្គការយូនីសេហ្វ និងមានការចូលរួមពីបណ្តាក្រសួង ស្ថាប័ន និង​អង្គភាពពាក់ព័ន្ធផងដែរ បានផ្តួចផ្តើមតាក់តែងផែនការយុទ្ធសាស្ត្រ​ដើម្បីអភិវឌ្ឍ​ប្រព័ន្ធគ្រប់គ្រង​ព័ត៌មាន​កិច្ចការពារកុមារ ​២០២៣-២០២៧នេះឡើង ​ដើម្បីធ្វើជាផែនទីបង្ហាញផ្លូវក្នុងការអនុវត្ត​ប្រព័ន្ធ​គ្រប់គ្រងព័ត៌មានកិច្ចការពារកុមារ (CPIMS) ​ប្រកបដោយប្រសិទ្ធភាព សំដៅលើកកម្ពស់​សុខុមាលភាព​កុមារ​ និងការពារឧត្តមប្រយោជន៍របស់កុមារកម្ពុជាគ្រប់រូប។

ឯកឧត្តម ជឿជាក់ថា កិច្ចប្រជុំនេះ​ នឹងឈានដល់ចំណុចឯកភាពរួមមួយដែលនាំឱ្យផែនការ​យុទ្ធសាស្ត្រ​ដើម្បី​អភិវឌ្ឍប្រព័ន្ធគ្រប់គ្រងព័ត៌មាន​កិច្ចការពារកុមារ ​២០២៣-២០២៧ ក្លាយជា​ឯកសារផ្លូវការពេញលេញ សម្រាប់​ប្រើប្រាស់​ធ្វើ​ជា​មគ្គុទេសតម្រង់​ទិសនូវការអនុវត្តប្រព័ន្ធ​គ្រប់គ្រង​ព័ត៌មានកិច្ចការពារកុមារ៕អត្ថបទ៖ គឹមហុក