ភ្នំពេញ៖ មន្រ្តីជាន់ខ្ពស់ធនាគារជាតិនៃកម្ពុជាថា ការស្ដារសេដ្ឋកិច្ចឡើងវិញប្រកបដោយចីរភាព​និង​បរិយាបន្ន ទាមទារឱ្យមានការដោះស្រាយ គឺមិនត្រឹមតែបញ្ហានៅដក់សល់ពីវិបត្តិកូវីដ-១៩ តែ​ប៉ុណ្ណោះទេ ប៉ុន្តែថែមទាំងបញ្ហាប្រឈមថ្មីៗ​ដែលកំពុងកើតមាន ដើម្បីស្វែងរកវិធីសាស្ត្រ​ដែល​ល្អបំផុត​ ក្នុងការស្ដារសេដ្ឋកិច្ចកម្ពុជាឡើងវិញ។

លោកជំទាវបណ្ឌិត ជា សិរី អគ្គនាយកបច្ចេកទេសនៃធនាគារជាតិនៃកម្ពុជា ថ្លែងលើកឡើង​ក្នុង​ពិធីបើកសន្និសីទម៉ាក្រូសេដ្ឋកិច្ច​ប្រចាំឆ្នាំលើកទី៩ ស្តីពី "ដំណើរឆ្ពោះទៅកាន់ការស្ដារឡើងវិញ​និង​ភាពធន់ក្រោយកូវីដ-១៩ នៅថ្ងៃទី ២៤ ​ខែវិច្ឆិកា ​ឆ្នាំ ២០២២ ​នេះថា សន្និសីទម៉ាក្រូសេដ្ឋកិច្ច​ដែលរៀបចំ​នៅពេលនេះ បានផ្ដោតលើ “បញ្ហាប្រឈម និងគោលនយោបាយអភិវឌ្ឍន៍​សហគ្រាស​ធុនតូច និងមធ្យមនៅកម្ពុជា” នៅពេលនោះលទ្ធផលស្រាវជ្រាវ ​និងអនុសាសន៍ជាច្រើនត្រូវបានផ្ដល់ ដើម្បីដោះស្រាយបញ្ហាប្រឈមរបស់សហគ្រាសធុនតូច ​និងមធ្យមក្នុងអំឡុងវិបត្តិជំងឺកូវីដ-១៩ ស្របពេល​ដែលសក្តានុពលរបស់វិស័យនេះក្នុងការជួយស្ដារកំណើនឡើងវិញ ក៏ត្រូវបានលើកយក​មកពិភាក្សាផងដែរ។

លោកជំទាវ បន្តថា បច្ចុប្បន្ននេះ ​ការឆ្លងរាលដាលនៃជំងឺកូវីដ-១៩ នៅកម្ពុជាមានកម្រិតតិចតួចបំផុត និងមិន​មាន​អ្វីគួរឱ្យព្រួយបារម្ភទៀតនោះទេ ​ដែលការណ៍នេះ បានអនុញ្ញាតឱ្យសកម្មភាពសេដ្ឋកិច្ច​ក្នុង​វិស័យចម្បងៗ បន្តងើបឡើងវិញជាលំដាប់។

ដើម្បីប្រមូលធាតុចូលសម្រាប់ពិចារណាក្នុងការដាក់ចេញគោលនយោបាយថ្មីៗបន្ថែមទៀត នៅ​ក្នុង​បរិការណ៍សេដ្ឋកិច្ចកម្ពុជាកំពុងបន្តងើបឡើង និងដើម្បីបន្តសាបព្រោះវប្បធម៌ស្រាវជ្រាវ​ឱ្យកាន់​តែទូលំទូលាយបន្ថែមទៀត​ ធនាគារជាតិនៃកម្ពុជាបានជ្រើសរើសយកប្រធានបទស្រាវជ្រាវ ស្តីពី "ដំណើរឆ្ពោះទៅ​កាន់ការស្ដារឡើងវិញ ​និងភាពធន់ក្រោយកូវីដ-១៩” ​សម្រាប់ឆ្នាំ២០២២នេះ។

លោកជំទាវ បន្តថា ដើម្បីស្ដារសេដ្ឋកិច្ចឡើងវិញ ​ប្រកបដោយចីរភាពនិងបរិយាបន្ន ទាមទារឱ្យ​មាន​ការដោះស្រាយមិនត្រឹមតែបញ្ហានៅដក់សល់ពីវិបត្តិកូវីដ-១៩​ តែប៉ុណ្ណោះនោះទេ ប៉ុន្តែថែមទាំង​បញ្ហា​ប្រឈមថ្មីៗ ដែលកំពុងកើតមានដូចជា ​បញ្ហាអតិផរណាខ្ពស់ ការថមថយកំណើនសេដ្ឋកិច្ចពិភព​លោក ​និងការប្រែប្រួលអាកាសធាតុជាដើម។

ជាមួយនឹងបញ្ហាប្រឈមដែលមានលក្ខណៈជាពហុវិស័យបែបនេះ ធនាគារជាតិនៃកម្ពុជា បាន​បង្កើតវេទិកាពិភាក្សា ដើម្បីប្រមូលមតិយោបល់ពីគ្រប់​មជ្ឈដ្ឋាន​ទាំងអស់ ក៏ដូចជាដើម្បី​ចែករំលែក​បទពិសោធន៍ឱ្យគ្នាទៅវិញទៅមក ​គឺមានភាពចាំបាច់ជាទីបំផុត ដើម្បីស្វែងវិធីសាស្ត្រ​ដែលល្អបំផុត ក្នុងការស្ដារសេដ្ឋកិច្ចកម្ពុជាឡើងវិញ៕អត្ថបទ៖ សុន រ៉ាឌី