ភ្នំពេញ៖ នៅថ្ងៃទី២៤ ខែវិច្ឆិកានេះ ឯកឧត្តម ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញបើកការដ្ឋានសាងសង់​សាលាជាតិវិជ្ជាជីវៈទេសចរណ៍ចំនួន២ទីតាំង ​នៅរាជធានីភ្នំពេញ ​និងនៅខេត្តព្រះសីហនុ ហើយការសាងសង់​សាលានេះ នឹងបង្កើតបាននូវអ្នកជំនាញក្នុងវិស័យទេសចរណ៍កាន់តែច្រើន និងផ្តល់សេវាជូនភ្ញៀវទេសចរជាតិអន្តរជាតិប្រកបដោយគុណភាព។

ឯកឧត្តមឧបនាយករដ្ឋមន្ត្រី ជា សុផារ៉ា ថ្លែងថា នេះជាលើកដំបូងហើយ ដែលរាជរដ្ឋាភិបាលកម្ពុជា បានបង្កើតឲ្យមានសាលាជាតិវិជ្ជាជីវៈទេសចរណ៍ ដើម្បីជម្រុញកូនខ្មែរ​ដែលមានកម្រិត​សិក្សាចាប់ពី​ថ្នាក់ទី៩ឡើងទៅ​ អាចចូលរៀនបង្កើតជំនាញ ​និងអាចឈានដល់ការបង្កើតមុខរបរ ក្នុងវិស័យ​ទេសចរណ៍ ព្រមទាំងជម្រុញផ្តល់សេវាកម្ម ក្នុងវិស័យទេសចរណ៍ប្រកបដោយគុណភាព និងភាពទាក់ទាញ។

បើតាមបណ្តាសិស្សានុសិស្ស បានបង្ហាញការចាប់អារម្មណ៍ខ្លាំង ក្នុងការចង់សិក្សាជំនាញនានា​នៅក្នុង​សាលាជាតិវិជ្ជាជីវៈទេសចរណ៍ ដើម្បីបង្កើតមុខរបរ​ និងការងារធ្វើក្នុងវិស័យទេសចរណ៍ ដោយ​សារក្រោមម្លប់សន្តិភាពវិស័យទេសចរណ៍កម្ពុជាមានការរីកចំរើនជាបន្តបន្ទាប់ ជាពិសេស​បំផុតនោះ នៅឆ្នាំបន្តបន្ទាប់ខាងមុខនេះនឹងមានភ្ញៀវទេសចរអន្តរជាតិមកទស្សនាកម្ពុជា ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ថ្លែងថា តាមការគ្រោងសាលាជាតិ​វិជ្ជាជីវៈទេស​ចរណ៍​សង់​នឹងផ្តល់ការបណ្តុះបណ្តាលជំនាញវិជ្ជាជីវៈទេសចរណ៍ចំនួន ​០៤ផ្នែក សំខាន់ៗរួមមាន៖ (១)ជំនាញផ្នែកសេវាកម្មសណ្ឋាគារនិងសេវាកម្មស្នាក់នៅទេសចរណ៍ (២)ផ្នែកសេវាកម្មម្ហូបអាហារ និងភេសជ្ជៈ (៣)ផ្នែកសេវាកម្មធ្វើដំណើរ និង(៤)ផ្នែកសេវាកម្មទេសចរណ៍ និងផ្តល់កម្រិតគុណវុឌ្ឍ​វិជ្ជាជីវៈចាប់ពីវិញ្ញាបនបត្រកម្រិត១ ទៅកម្រិត៣ រៀនរយៈពេល១ឆ្នាំ និងឌីប្លូមកម្រិតខ្ពស់រៀន​រយៈពេល​២ឆ្នាំ​ ហើយសាលានេះក៏ជាមជ្ឈមណ្ឌលវាយតម្លៃស្រប​តាមស្តង់ដាជាតិ ​និងអាស៊ាន។

ឯកឧត្តម ថោង ខុន បញ្ជាក់ថា សាលាជាតិទាំង២ទីតាំងនេះ គ្រោងនឹងចំណាយរយៈពេល​សាងសង់​ចំនួន១៥ខែ ​គ្រោងបើកដំណើរការនៅឆ្នាំ២០២៤ ​ដោយចំណាយថវិការាជរដ្ឋាភិបាលសរុប ​២៦,៥ លាន​ដុល្លាអាមេរិក ក្នុងនោះថវិកាជំនួយពីទីភ្នាក់ងារបារាំងសម្រាប់ការអភិវឌ្ឍន៍AFD ប្រមាណ ១២លានដុល្លាអាមេរិក ៕ អត្ថបទ ស៊ុម សុខជា