មនុស្ស​ម្នាក់​ស្លាប់ និងជាង ២០នាក់​របួស​ក្នុង​ការ​បំផ្ទុះ ២លើក​នៅ​ទីក្រុង​ហ្សេរុយសាឡឹម

មនុស្សម្នាក់ស្លាប់ និងជាង ២០នាក់របួសក្នុងការបំផ្ទុះ ២លើកនៅទីក្រុងហ្សេរុយសាឡឹម

អ៊ីស្រាអែល៖ នគរបាលអ៊ីស្រាអែលនិយាយថា ការផ្ទុះ ២លើកដាច់ដោយឡែកពីគ្នានៅទីក្រុងហ្សេរុយសាឡឹម បណ្តាលឲ្យជនជាតិអ៊ីស្រាអែលម្នាក់ស្លាប់ និងរងរបួសជាង ២០នាក់។ គ្មានក្រុមណាអះអាងទទួលខុសត្រូវនៅឡើយទេ ប៉ុន្តែក្រុមអ៊ីស្លាមប៉ាឡេស្ទីន Hamas បានចេញសេចក្តីថ្លែងការណ៍សាទរការបំផ្ទុះនេះ។

ការផ្ទុះលើកដំបូងបានកើតឡើងនៅព្រឹកថ្ងៃពុធនៅចំណតរថយន្តក្រុងមួយកន្លែង ក្នុងតំបន់ដែលមានប្រជាជនអ៊ីស្រាអែលជាច្រើនរស់នៅ។ ការផ្ទុះលើកទី២ ត្រូវបានបំផ្ទុះនៅ ៣០នាទីក្រោយពីការបំផ្ទុះលើកទី១ នៅផ្នែកផ្សេងនៃទីក្រុងហ្សេរុយសាឡឹម។ សារព័ត៌មានក្នុងស្រុករាយការណ៍ថា គ្រឿងផ្ទុះនោះមានផ្ទុកដោយដែកគោល និងវត្ថុផ្សេងៗទៀត។ ក្រុម Hamas បានចាត់ទុកអ្វីដែលបានកើតឡើងនៅទីក្រុងហ្សេរុយសាឡឹមថា ជាលទ្ធផលនៃការចូលគ្រប់គ្រងរបស់អ៊ីស្រាអែល។

ការវាយប្រហារដោយគ្រាប់បែកបានក្លាយជារឿងដ៏កម្រនៅទីក្រុងហ្សេរុយសាឡឹម ក្នុងរយៈពេលប៉ុន្មានឆ្នាំចុងក្រោយនេះ។ ឧបទ្ទវហេតុនេះកើតឡើងនៅពេលដែលកិច្ចពិភាក្សាចម្រុះ កំពុងដំណើរការសម្រាប់អតីតនាយករដ្ឋមន្ត្រីលោក Benjamin Netanyahu ដើម្បីបង្កើតរដ្ឋាភិបាលក្រោយការបោះឆ្នោតជាតិនៅថ្ងៃទី១ ខែវិច្ឆិកា៕

អត្ថបទ៖ ប៊ុនថន