​ភ្នំពេញ៖ ឯកឧត្តម ហ៊ុន ម៉ានី ប្រធានគណៈកម្មាធិការនយោបាយ នៃមហាសន្និបាតអន្តរសភាអាស៊ាន (AIPA) លើកទី៤៣ បានលើកឡើងថា ក្នុងនាមជាម្ចាស់ផ្ទះ កម្ពុជា បានសម្រេចនូវជោគជ័យគោលការណ៍ចំនួន ៣ចំណុច នៅក្នុងកិច្ចប្រជុំក្រុមសភាវ័យក្មេង ខណៈកិច្ចប្រជុំនេះ ភាគីទាំងអស់ បានសិក្សាស្វែងយល់ពីគ្នា ទាំងនយោបាយ វប្បធម៌ និងសង្គម-សេដ្ឋកិច្ច ។

ក្នុងសន្និសីទសារព័ត៌មាន ស្តីពីលទ្ធផល នៃមហាសន្និបាតអន្តរសភាអាស៊ាន លើកទី៤៣ នៅថ្ងៃទី២៤ ខែវិច្ឆិកា នេះ ឯកឧត្តម ហ៊ុន ម៉ានី បានបញ្ជាក់ថា សម្រាប់គោលការណ៍ទាំង៣ មានទី១. ការមើលឃើញនូវសក្តានុពលរបស់អាស៊ាន ការខិតខំស្វែងយល់ពីសក្តានុពលនេះ និងប្រឹងប្រែងទាំងអស់គ្នា ធ្វើយ៉ាងណាថែរក្សានូវសុខសន្តិភាព ស្ថិរភាព និងនាំមកនូវវិបុលភាព ដែលជាកត្តាគន្លឹះ នៃការអភិវឌ្ឍជូនដល់សង្គមកម្ពុជា និងអាស៊ានទាំងមូល ។

ឯកឧត្តម បានបន្តថា ទី២. ការសម្រេចបាននូវការថែរក្សាទំនាក់ទំនងរវាងគ្នា ការគោរពគ្នា ការយោគយល់គ្នា ហើយការងារនេះ មិនត្រឹមធ្វើក្នុងកិច្ចប្រជុំក្រុមសភាវ័យក្មេង គឺមានកិច្ចសហការនៅលើវិស័យផ្សេងៗទៀត និងទី៣. គ្រប់មិត្តភក្តិទាំងអស់ បានរួមចំណែកពិគ្រោះយោបល់ ដោយមិនមានភាពតាន តឹង មានការរាប់អានគ្នា ហើយសម្រេចបាននូវសេចក្តីសម្រេច រួមទាំងបានស្ដាប់នូវសមាជិកសភា ជាអ្នកសង្កេតការណ៍ មានប្រទេសអាស៊ែបៃហ្សង់ កាណាដា កូរ៉េខាងត្បូង រុស្ស៊ី និងអ៊ុយក្រែន។

​​ឯកឧត្តម ហ៊ុន ម៉ានី បានបញ្ជាក់ថា ការបង្កើតនូវសភាវ័យក្មេងនេះ មានន័យថា អាស៊ាន បានយកចិត្តទុកដាក់លើតួនាទី និងសំឡេងរបស់ប្រជាជនវ័យក្មេង នៅក្នុងក្រខណ្ឌនៃប្រទេសទាំងអស់ និងសហគមន៍អាស៊ានទាំងមូល៕ អត្ថបទ៖ បាន សុខរិទ្ធិ