កំពង់ឆ្នាំង៖ នៅព្រឹកថ្ងៃទី២៥ ខែវិច្ឆិកា ឆ្នាំ២០២២នេះ ឯកឧត្តម ស៊ុន សុវណ្ណារិទ្ធិ អភិបាល​ខេត្តកំពង់ឆ្នាំង​បានអោយដឹងថា ដីលំនៅដ្ឋានរបស់ប្រជាពលរដ្ឋក្នុងតំបន់២ នឹង​ត្រូវ​កាត់​ឆ្វៀល​ជូន​ពួក​គាត់ ដើម្បីអោយមានកម្មសិទ្ធិដីធ្លីនៅក្នុងដៃ ដែលមកដល់ពេលនេះ ក្រុមការងារថ្នាក់ជាតិ ថ្នាក់​ខេត្ត-ស្រុក-ឃុំ កំពុងធ្វើការងារនេះយ៉ាងមមាញឹក។ ក្រោយ​ពីផ្ទៀងផ្ទាត់​ព្រំប្រទល់​ត្រូវ​ហើយ​នោះ ក្រុមការងារ នឹងចេញប័ណ្ណកម្មសិទ្ធិជូន តាមគោលការណ៍របស់ប្រមុខរដ្ឋាភិបាលកម្ពុជា។

ឯកឧត្តមអភិបាលខេត្តបានអោយដឹងថា យោងតាមបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអោយក្រុមការងារថ្នាក់ជាតិ ថ្នាក់ខេត្តស្រុកឃុំ ធ្វើការពិនិត្យ​ផ្ទៀងផ្ទាត់​ទិន្នន័យ​ក្បាលដីលំនៅដ្ឋានប្រជាពលរដ្ឋកំពុងរស់នៅក្នុងតំបន់២ ដែល​ក្នុង​នោះ​មាន​ស្រុក​កំពង់ត្រឡាច ស្រុកជលគីរី ស្រុកកំពង់លែង ស្រុករលាប្អៀរ ក្រុងកំពង់ឆ្នាំង និងស្រុក​បរិបូណ៌ ដើម្បីកាត់ឆ្វៀលជូនប្រជាពលរដ្ឋ និងចេញប័ណ្ណកម្មសិទ្ធិជូនពួកគាត់តែម្តង។ ផ្ទៃដី​ជាង​១០​ម៉ីន​ហិកតា ត្រូវបាន និងកំពុងផ្ទៀងផ្ទាត់ព្រំប្រទល់ដី កាត់ឆ្វៀលចេញពីតំបន់២ មកតំបន់១ ឲ្យ​ប្រជាពលរដ្ឋដែលកំពុងរស់នៅក្នុងតំបន់២ បានប្រើប្រាស់ជាកម្មសិទ្ធិ។

ឯកឧត្តមបានបន្តថា បច្ចុប្បន្ន រដ្ឋបាលខេត្តរួមជាមួយរដ្ឋបាលស្រុកឃុំ មន្ទីរជំនាញ និង​អាជ្ញាធរ​ពាក់ព័ន្ធ​បាន​ចុះពិនិត្យស្រាវជ្រាវប្រមូលទិន្នន័យ និង​គោរព​ស្នើ​សុំការ​កែ​សម្រួល​ផ្ទៃដី​ក្នុង​តំបន់២​ ដែល​ប្រជាពលរដ្ឋកំពុងរស់នៅ ដើម្បី​ស្នើ​សុំ​ទៅ​ប្រមុខ​រាជ​រដ្ឋាភិបាល​កាត់​ឆ្វៀល​ចេញ​ពី​តំបន់​២​មក​តំបន់​១ ជូនប្រជាពលរដ្ឋដែលកំពុងរស់នៅជាក់ស្តែង ឬផ្ទេរមរតកបាន។ ក្រុមការងារបាន និង​កំពុង​ធ្វើ​យ៉ាង​យកចិត្តទុកដាក់ មានតម្លាភាពត្រឹមត្រូវ មិនអោយមានភាពលម្អៀងឡើយ៕ អត្ថបទ៖ ហុង វាស្នា