បាល់ទះ៖ សហព័ន្ធកីឡាបាល់ទះកម្ពុជា បានចាប់ផ្ដើមដំណើរការប្រកួតកីឡាបាល់ទះឆ្នេរខ្សាច់ នៅក្នុងព្រឹត្តិការណ៍កីឡាជាតិលើកទី៣ ហើយកាលពីថ្ងៃទី២៤ ខែវិច្ឆិកា ឆ្នាំ២០២២ គ្រាដែលប្រកួតដំបូងខេត្តព្រះសីហនុបានយកឈ្នះក្រសួងការពារជាតិទាំងលំបាក។
សម្រាប់បាល់ទះឆ្នេរខ្សាច់នេះខុសពីបាល់ទះក្នុងសាល ដោយតម្រូវឲ្យក្រសួង និងរាជធានី-ខេត្តចូលរួមនីមួយៗត្រូវមាន ២ក្រុម មានន័យថា បែងចែកជាក្រុម “ក” និងក្រុម “ខ” ដើម្បីធ្វើការប្រកួតប្រជែង ហើយក្រសួង ឬរាជធានី-ខេត្ត ដែលឈ្នះការប្រកួតទាំង ២ក្រុមនេះទើបទទួលបានជ័យជម្នះតែម្ដង។ តែបើឈ្នះ ១ក្រុមម្នាក់ ក្រុមនោះនឹងត្រូវឈានដល់ការប្រកួតកាត់សេចក្ដីបន្ថែមដែលហៅថា Golden Match។ ជាក់ស្ដែងការប្រកួតរវាងខេត្តព្រះសីហនុ និងក្រសួងការពារជាតិសម្រាប់ជំនួបក្រុម “ក” និងក្រុម “ក” ព្រះសីហនុបានយកឈ្នះ ២-០សិត តែក្រុម “ខ” និងក្រុម “ខ” ក្រសួងការពារជាតិបានវាយបកឈ្នះ ២-១សិតវិញ។ តាមរយៈនេះការប្រកួបានឈានដល់ Golden Match ហើយខេត្តព្រះសីហនុបានយកឈ្នះក្រសួងការពារជាតិ ២-០ ក្នុងពិន្ទុ ២១-១១ និង ២១-១៦ ដើម្បីធានាជ័យជម្នះរបស់ខ្លួនក្នុងជំនួបបើកឆាកពូល A តែម្ដង។
ក្រឡេកទៅមើលការប្រកួតបើកឆាកពូល B និងពូល C វិញ ខេត្តកំពង់ធំ និងខេត្តស្ទឹងត្រែងធ្វើបានយ៉ាងល្អក្នុងនោះទាំងក្រុម “ក” និងក្រុម “ខ” របស់ខេត្តកំពង់ធំសុទ្ធតែទទួលបានជ័យជម្នះ ២-០សិតដូចគ្នាលើខេត្តមណ្ឌលគិរី ក្នុងជំនួបពូល B ខណៈក្រុម “ក” និងក្រុម “ខ” របស់ខេត្តស្ទឹងត្រែងបានយកឈ្នះលើក្រុមទាំង២ របស់ខេត្តកំពង់ឆ្នាំងដោយលទ្ធផល ២-០សិតដូចគ្នាដើម្បីធានាជ័យជម្នះរបស់ខ្លួនក្នុងពូល C។ យ៉ាងណាមិញការប្រកួតបាល់ទះឆ្នេរខ្សាច់នៅបន្ដទៀត ដើម្បីឈានទៅរកបេក្ខភាពឡើងវគ្គបន្ដក៏ដូចជាក្រុមជ័យលាភី ខណៈវិញ្ញាសាមួយនេះគ្រោងនឹងត្រូវបញ្ចប់ការប្រកួតនាថ្ងៃទី៣០ ខែវិច្ឆិកាខាងមុខ ត្រូវនឹងថ្ងៃប្រារព្ធពិធីបិទការប្រកួតកីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២ នេះតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
