ភ្នំពេញ៖ ក្រសួងវប្បធម៌ និងវិចិត្រសិល្បៈ បានរៀបចំសិក្ខាសាលា ស្តីពី ការពង្រឹងស្នាដៃតែង​និពន្ធ​កំណាព្យខ្មែរ ​ក្នុងគោលបំណងលើកកម្ពស់ស្នាដៃតែងនិពន្ធកំណាព្យខ្មែរ ដល់កូនខ្មែរគ្រប់រូបឱ្យ​ចេះថ្លឹងថ្លែងប្រកបដោយគុណតម្លៃ។

ប្រាប់ BTV ក្នុងកម្មវិធីសិក្ខាសាលា ស្តីពី ការពង្រឹងស្នាដៃតែងនិពន្ធកំណាព្យខ្មែរ នៅទីស្តីការក្រសួង លោកជំទាវ​ នេត្រ ភូម៉ារី រដ្ឋលេខាធិការ នៃក្រសួងវប្បធម៌ ​និងវិចិត្រសិល្បៈ បានប្រាប់ថា វគ្គ​សិក្ខាសាលា ស្តីពីការពង្រឹងស្នាដៃតែងនិពន្ធកំណាព្យខ្មែរ នាពេលនេះ ​ពិតជាសំខាន់ណាស់ ដើម្បីលើក​កម្ពស់ស្នាដៃតែងនិពន្ធកំណាព្យខ្មែរ ដល់កូនខ្មែរគ្រប់រូបឱ្យចេះថ្លឹងថ្លែងប្រកបដោយ​គុណតម្លៃ។

លោកជំទាវបន្តថា អ្នកនិពន្ធ ជាវិស្វករនៃព្រលឹង​ និងជាអ្នកបង្វិលចក្រវាល ហើយអ្នកនិពន្ធ ក៏ជា​ស្ថាបត្យករសង្គម ដែល​យក​បញ្ញាញាណ​ និងចុងប៉ាកការបស់ខ្លួនមកធ្វើជាដើមទុន ដោយមិនគ្រាន់​តែប្តូរយកកម្រៃ​ និងកិត្តិយសប៉ុណ្ណោះទេ ថែមទំាងបានបង្សល់ទុកនូវគំនិត​ប្រាជ្ញា​បង្កប់ក្នុង​ស្នាដៃ​របស់ខ្លួន ដែលជាវិភាគទានមួយដ៏ធំធេង និងជាទ្រព្យ​សម្បត្តិ​មហាសាល​ចំពោះមនុស្សជាតិ​ទៀតផង។

ជាមួយគ្នានេះលោកជំទាវបន្ថែមថា អ្នកនិពន្ធ ត្រូវមានចំណេះដឹងពហុជំនាញ មានក្រមសីលធម៌​ក្នុងការបង្កើតស្នាដៃប្រលោមលោក ​កំណាព្យ ចម្រៀង​ និងខ្សែភាពយន្តថ្មីបន្ថែម។

ចំណែក លោក កុក រស់ ប្រធាននាយកដ្ឋានសៀវភៅ និងការអាន នៃក្រសួងវប្បធម៌ បានប្រាប់ដែរថា​ គោលបំណងនៃការរៀបចំសិក្ខាសាលានៅពេលនេះ ស្របតាមស្ថានភាពបច្ចុប្បន្ន​នៃកំណាព្យខ្មែរ កំពុងមានវិការភាព ​និងបញ្ហាប្រឈមមួយចំនួន ដូចជា​ វិការភាពក្នុងរូបសាស្ត្រ ដោយការតែងនិពន្ធកំណាព្យ ​មិន​គោរព​តាម​ក្បួនខ្នាត​នៃ​បទ​កំណាព្យ, វិការភាពក្នុងសូរសាស្ត្រ ដោយការសូត្រ ​និងស្មូត​មិនគោរពតាមពាក្យ ឬព្យាង្គនៃបទនីមួយៗ, ​វិការ​ភាព​ក្នុង​និឃណ្តសាស្ត្រ ដោយការប្រើ​ន័យសេចក្តីក្នុងកំណាព្យ​មិនស្របតាមកាលៈទេសៈជាដើម។

លោកសង្ឃឹមថា​ សិក្ខាសាលានេះ ​នឹងស្រាយចម្ងល់ ​ក៏ដូចជាជួយកាយផ្លូវឱ្យយុវជនមាន​ស្នាដៃ​បង្កើត​កំណាព្យឱ្យត្រូវ​តាម​ក្បួនខ្នាត​ឡើងវិញ ​ពិសេសដើម្បីជំរុញលើកទឹក​ចិត្តឱ្យអ្នកនិពន្ធ និងកវី​និពន្ធបានចូលរួមបង្កើតស្នាដៃនិពន្ធថ្មីៗបន្ថែមទៀត៕ផលិត៖ គង់ រ៉េន