​អ៊ុយក្រែន៖ មន្ត្រី​នៅ​ទីក្រុង Kyiv និង​ទីក្រុង​មូ​ស្គូ​បាន​និយាយ​ថា ប្រទេស​រុស្ស៊ី និង​អ៊ុយ​ក្រែ​ន​បាន​អនុវត្ត​ការដោះដូរ​ឈ្លើយសឹក​សង្គ្រាម​ជា​បន្តបន្ទាប់​កាលពី​ថ្ងៃ​ព្រហស្បតិ៍ ដោយ​ភាគី​ទាំងពីរ​បាន​ប្រគល់​មនុស្ស​ចំនួន ៥០​នាក់​។

វីដេអូ​ដែល​ចេញផ្សាយ​ដោយ​ទីបញ្ជាការ​សម្របសម្រួល​ សម្រាប់​ការ​អនុវត្តន៍​ចំពោះ​ឈ្លើយសឹក​សង្គ្រាមបាន​បង្ហាញ ​ពី​មនុស្ស​មួយ​ក្រុម​ដើរ​តាម​ដង​ផ្លូវ​ដែល​រង​ការខូចខាត​ក្នុង​ប្រទេស​អ៊ុយ​ក្រែ​ន ខណៈដែល​គេ​ឮ​អ្នក​មួយចំនួន​និយាយថា​ «​ជោគជ័យ​អ៊ុយ​ក្រែ​ន​»​។ សារព័ត៌មាន Reuters មិនអាច​ផ្ទៀងផ្ទាត់​ដោយ​ឯករាជ្យ​អំពី​កាលបរិច្ឆេទ​ដែល​វីដេអូ​ និង​ទីតាំង​ត្រូវ​បាន​ថត​នោះទេ​។ ក្រសួង​ការពារជាតិ​រុស្ស៊ី​និយាយ​ថា អ៊ុយ​ក្រែ​ន​បាន​ដោះលែង​ទាហាន​រុស្ស៊ី ៥០​នាក់​ដែល​ត្រូវ​បាន​ចាប់ខ្លួន​។​ លោក Andriy Yermak ប្រធាន​រដ្ឋបាល​ប្រធានាធិបតី​អ៊ុយ​ក្រែ​ន​បាន​និយាយ​នៅ​លើ​បណ្ដាញ Telegram ថា ​អ៊ុយ​ក្រែ​ន​បាន​ទទួល​ទាហាន ៤៨​នាក់​ និង​មន្ត្រី​ពីរ​នាក់​ដែល​ក្នុង​នោះ​មាន​ទាហាន​ម៉ា​រី​ន​ទាហាន​ថ្មើរជើង​ឆ្មាំ​ព្រំដែន​ និង​សមាជិក​ការពារ​ទឹកដី​។

លោក Yermak និយាយ​ថា យើង​បាន​រៀបចំ​ដើម្បី​នាំ​យក​អ្នកការពារ​ទីក្រុង Mariupol ១៩​នាក់​មកវិញ ព្រមទាំង​ឈ្លើយ​សឹក​សង្គ្រាម​ ១៥នាក់ពី​រោងចក្រ​ថាមពល​នុយក្លេអ៊ែរ Chornobyl និង ៧​នាក់​មកពី​កោះ Zmiiny​។ ​លោក Denis Pushilin ប្រធាន​ផ្នែក​នៃ​តំបន់ Donetsk របស់​អ៊ុយ​ក្រែ​ន​គាំទ្រ​ដោយ​ទីក្រុង​មូ​ស្គូ ដែល​ស្ថិត​នៅ​ក្រោម​ការគ្រប់គ្រង​របស់​រុស្ស៊ី​បាន​និយាយ​ថា ការដោះដូរ​ឈ្លើយសឹក​ជាមួយ​ទីក្រុង Kyiv បាន​ធ្វើ​ឡើងដោយមាន​អ្នកទោស ៥០​នាក់នៅ​ភាគី​ទាំងសងខាង​។ រហូតមកដល់​ពេលនេះ​ទីក្រុង Kyiv និង​ទីក្រុង​មូ​ស្គូ​បាន​ដោះដូរ​ឈ្លើយ​សឹកសង្គ្រាម​ជាង ១,០០០​នាក់​ចាប់​តាំងពី​ការ​ចាប់ផ្តើម​ជម្លោះ​នៅ​អ៊ុយ​ក្រែ​ន​ក្នុង​ខែ​កុម្ភៈ​៕

អត្ថបទ៖ ប៊ុនថន