ភ្នំពេញ៖ ស្ថាប័នប្រឆាំងអំពើពុករលួយអាស៊ានផេក (ASEAN-PAC) លើកទី១៨ ថ្ងៃទី២២ ដល់​ថ្ងៃទី២៣ ខែវិច្ឆិកា ឆ្នាំ២០២២ នៅរាជធានីភ្នំពេញ ​បណ្តាថ្នាក់ដឹកនាំស្ថាប័នប្រឆាំងអំពើ​ពុក​រលួយ​អាស៊ាន​១០ប្រទេស ​បានអនុម័តឯកសារសំខាន់ៗ៣ ក្នុងនោះ​ឯកសារអនុសារណៈការយោគយល់​គ្នាអាស៊ាន​ផេកដែលជាឯកសារកំពូលថ្មីមួយក៏ត្រូវបានអនុម័ត​ក្នុងអំឡុងពេលអង្គភាព​ប្រឆាំង​អំពើពុក​រលួយ​ធ្វើជាម្ចាស់​ផ្ទះរៀបចំកិច្ចប្រជុំថ្នាក់ដឹកនាំ ។

ឯកឧត្តមកិត្តិនីតិកោសលបណ្ឌិត ​ទេសរដ្ឋមន្ត្រី ឱម យិនទៀង​ ប្រធានអង្គភាពប្រឆាំងអំពើពុករលួយ បាន​ថ្លែងប្រាប់BTV នៅថ្ងៃទី២៥ ខែវិច្ឆិកា​នេះថា​ ឯកសារសំខាន់ៗបំផុតរបស់អាស៊ាន-ផេកចំនួន៣ ត្រូវបានកិច្ចប្រជុំអាស៊ាន-ផេកលើកទី១៨ ​ដែលកម្ពុជាធ្វើជាប្រធាន​ ត្រូវបានអនុម័តរួមគ្នា ក្នុងនោះ​ឯកសារអនុស្សរណៈនៃការយោគយល់គ្នារបស់អាស៊ាន-ផេក​ASEAN-PAC MoU ដែលបាន​បើកកិច្ច​ពិភាក្សាតាំងពីយូរឆ្នាំមកហើយនោះ ​ក៏ត្រូវបានចុះហត្ថលេខាពីសំណាក់ស្ថាប័នប្រឆាំង​អំពើ​ពុករលួយ​ទាំង ១០នៅភ្នំពេញផងដែរ។

ឯកឧត្តម បញ្ជាក់ថា ការអនុម័តឯកសារ ASEAN-PAC MoU ដែលជាឯកសារថ្មីកំពូលរបស់​អាស៊ាន​ផេក គឺបានរៀបចំថ្មីឡើងវិញ ​ខណៈថ្នាក់ដឹកនាំស្ថាប័នប្រឆាំងអំពើពុករលួយ​អាស៊ាន បានសម្រេច​ឯកភាពគ្នាប្តូរ​ឈ្មោះពី ​ស្ថាប័នប្រឆំាងអំពើពុករលួយអាស៊ីអាគ្នេយ៍ ​មកដាក់ឈ្មោះ ស្ថាប័ន​ប្រឆាំងអំពើ​ពុករលួយអាស៊ានវិញ​ដែល​ហៅកាត់ថា ASEAN-PAC នៅក្នុងអំឡុងពេលដែលប្រទេស​ថៃ​ធ្វើជាម្ចាស់ផ្ទះ។

ឯកឧត្តម ទេសរដ្ឋមន្ត្រី ឱម យិនទៀង បន្តថា អនុស្សរណៈការយោគយល់គ្នារវាងកម្ពុជា និងថៃ និង​រវាងកម្ពុជា និងមីយ៉ាន់ម៉ា ​ដើម្បីពង្រីកកិច្ចទំនាក់ទំនងនិងជួយគ្នាលើសកម្មភាពប្រឆាំង​អំពើពុក​រលួយទ្វេរភាគី ​ក៏ត្រូវបានចុះហត្ថលេខាផងដែរ។

កិច្ចប្រជុំ​ ក៏បានលើកយកឯកសារកូនសៀវភៅអេឡិកត្រូនិកអាស៊ាន-ផេក ASEAN-PAC E-Bookletមួយទៀតយកមក​ពិភាក្សាគ្នាដែរ ដែលឯកសារនេះផ្ដួចផ្ដើមរៀបចំដោយ​អង្គភាព​ប្រឆាំងអំពើពុករលួយកម្ពុជា​ ហើយអាចនឹងទទួលការអនុម័តនៅកិច្ចប្រជុំលើកក្រោយ។

សូមបញ្ជាក់ថា ​អង្គភាពប្រឆាំងអំពើពុក​រលួយ​កម្ពុជា ​នឹងបន្តធ្វើជាម្ចាស់ផ្ទះរៀបចំកិច្ចប្រជុំថ្នាក់​ដឹកនាំ​ស្ថាប័នប្រឆាំងអំពើពុករលួយអាស៊ានផេក ​រហូតដល់ខែវិច្ឆិកាឆ្នាំ២០២៣ ហើយបន្ទាប់ទៅប្រទេស​ឡាវ នឹងទទួលធ្វើជាម្ចាស់ផ្ទះបន្តវេន៕ អត្ថបទ ស៊ុម សុខជា