ព្រះវិហារ៖ នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិ ប្រចាំទិស ភូមិភាគទី៤ និងទី៥ នៅថ្ងៃទី២៤​ ខែវិច្ឆិកា ម្សិលមិញនេះ ​បានអញ្ជើញក្នុងពិធីបើកវគ្គបំប៉ន មុខជំនាញ បញ្ជាការ សេនាធិការ វរសេនាតូចនគរបាលការពារព្រំដែន គោក-ទឹក និងវរសេនាតូចនគរ បាលអន្តរាគមន៍ជាច្រើននាក់ នៅខេត្តព្រះវិហារ។

ថ្លែងនៅក្នុងពិធីនោះ នាយឧត្តមសេនីយ៍ ខេង សុមេធ តំណាងនាយឧត្តមសេនីយ៍សន្តិបណ្ឌិត នេត សាវឿន ​បានលើកឡើងថា ឯកឧត្តម សូមគាំទ្រទាំងស្រុង ​ចំពោះការផ្តល់វគ្គបណ្តុះបណ្តាលបន្ថែម ដល់នគរបាលការពារព្រំដែន ​ដើម្បីឲ្យពួកគេទទួលបាននូវចំណេះដឹងជំនាញថ្មីបន្ថែមទៀត ក្នុងគោល​បំណងបម្រើឲ្យកិច្ចការពារបូរណភាពទឹកដី ​និងអធិបតេយ្យជាតិ ប្រកបដោយប្រសិទ្ធភាពនោះ។

ឯកឧត្តមនាយឧត្តមសេនីយ៍ ខេង សុមេធ ក៏បានជំរុញលើការងារលើកកម្ពស់សមត្ថភាពកងកម្លាំង នគរបាលការពារព្រំដែនជាប់ជាប្រចាំ ដើម្បីឆ្លើយតប​នឹងស្ថានភាពជាក់ស្តែងនៃការរីកចំរើន​របស់​ប្រទេសជាតិ ជាពិសេសស្របតាមគោលការណ៍ដឹកនាំ​របស់សម្តេចក្រឡាហោម ស ខេង ឧបនាយក​រដ្ឋមន្រ្តី ​និងជារដ្ឋមន្រ្តីក្រសួងមហាផ្ទៃ ​និងអនុវត្តតាមផែនការសកម្មភាពប្រចាំឆ្នាំ២០២២ របស់​អគ្គស្នការដ្ឋាននគរបាល ជាតិ ​ដែលយកចិត្តទុកដាក់គិតគូរដល់ការធ្វើកំណែទម្រង់​កងកម្លាំង​នគរបាលការពារព្រំដែនទាំងអស់នោះ។

ជាមួយគ្នានោះដែរ ឯកឧត្តម ខេង សុមេធ ​ក៏បានធ្វើការក្រើនរំលឹកដល់សិក្ខាកាមទាំងអស់ដែល បានចូលរួមនូវវគ្គបណ្តុះបណ្តាលនេះ ​គប្បីត្រូវប្រកាន់ខ្ជាប់នូវវិន័យ បទបញ្ជានានារបស់សាលា​ហ្វឹកហ្វឺន ​ជាពិសេសត្រូវ​មានឥរិយាបថល្អ សេចក្តី​ថ្លៃថ្នូរ​ ស័ក្ដិសម​ជា​កងកម្លាំងឯកភាព សំដៅ​លើកកម្ពស់កិត្តិយស និង​កិត្យានុភាព រ​បស់កងកម្លាំងនគរបាលជាតិយើងផងដែរ។

ឯកឧត្តម ក៏បានជំរុញឲ្យសិក្ខាកាមទាំងអស់ ត្រូវយកចិត្តទុកដា ​ខិតខំក្រេបជញ្ជក់ នូវមុខវិជ្ជា​ដែលក្រុម​គ្រូបង្វឹកបានបង្ហាត់បង្រៀននេះ​ ទៅតាមកម្មវិធី ​ដែលគ្រោងទុក ដើម្បីបង្កើនសមត្ថភាព និង​បំពេញតួនាទី ភារកិច្ចប្រកបដោយវិជ្ជាជីវៈផងដែរ។

យ៉ាងណាក៏ដោយនៅក្នុងកម្មវិធីនោះ ​ឯកឧត្តមនាយឧត្តមសេនីយ៍​ ក៏បានអំពាវនាវដល់សិក្ខាកាម ទាំងអស់​ត្រូវជៀសឲ្យ​ឆ្ងាយពីគ្រឿងញៀនផងដែរ៕