ឧត្តរមានជ័យ៖ អាងស្តុកប្រភពទឹកមួយចំនួនក្នុងខេត្ត ត្រូវបានមន្រ្តីជំនាញ ធ្វើការបិទទ្វារទំនប់​បង្ហៀរទឹក ដើម្បីរក្សាប្រភពទឹកទុកសម្រាប់ទុកឱ្យប្រជាកសិករ​ប្រើប្រាស់​នៅរដូវប្រាំង។

លោក ញឺន កួន ប្រធានមន្ទីរធនធានទឹក ​និងឧតុនិយមខេត្តឧត្តរមានជ័យ នៅថ្ងៃទី២៥ខែវិច្ឆិកាឆ្នាំ២០២២នេះ បាន​បញ្ជាក់ថា ខណៈជំនន់ទឹកភ្លៀងបានស្រកអស់ហើយនោះ​ដើម្បីរក្សា​ប្រភពទឹក​សម្រាប់​ទុក​ស្រោចស្រព​​ផល​ដំណាំ​កសិកម្ម​របស់​កសិករ ឱ្យ​បាន​គ្រប់គ្រាន់​នោះ មន្រ្តីជំនាញ​បានធ្វើការបិទទ្វារទឹកមួយចំនួន ក្នុងតំបន់ទំនប់អាងស្តុកទឹកស្ទឹងស្រែង១ ស្ទឹងស្រែង២ អាងទឹកទំនប់ថ្មី អាងទំនប់ទឹក០៥ ស្រុកត្រពាំងប្រាសាទ​ នឹង​អាងស្តុកទឹកត្រពាំងវេង​ ក្រុងសំរោង ក្នុង​ភូមិសាស្រ្តខេត្តឧត្តរមានជ័យ ​ដើម្បីរក្សាប្រភពទឹកទាំង​អស់នេះ​ទុក​ស្រោចស្រព​ដល់​ការងារ​កសិកម្ម​របស់ប្រជាកសិករ ​ក្នុងរដូវប្រាំង​ ។

លោក បានបន្ថែមទៀតថា ទំនប់អាងស្តុកប្រភពទឹកស្ទឹងស្រែង១ ស្ទឹងស្រែង២ នឹង​អាង​ទឹកទំនប់ថ្មី អាងស្តុកប្រភពទឹកទាំង៣ទីតាំងបច្ចុប្បន្នអាចស្តុកប្រភពទឹកបានរហូតដល់ទៅចំនួន ៥៦៤លាន​ម៉ែត្រគីប ក្នុងនោះ​អាងស្តុកទឹកស្ទឹងស្រែង១​ មានប្រភពទឹកចំនួន ១៥៨លានម៉ែត្រគីប អាងស្តុកទឹក​ស្ទឹងស្រែង២ មានចំនួន ១៥៣លានម៉ែត្រគីប និងអាង​ទឹកទំនប់​ថ្មីមានចំនួន ១៥៣លាន​ម៉ែត្រគីប វា​ជាប្រយោជន៍ដ៏សំខាន់​ជួយដល់ប្រជាកសិករធ្វើស្រែចំការ​និង​ផលដំណាំផ្សេងៗ​បាន​ទាំង​រដូវ​ប្រាំ ​និង​វស្សា​ដោយ​មិន​បារម្ភ​ពី​បញ្ហា​កង្វះ​ខាត​ប្រភព​ទឹកនោះឡើយ។

លោក ញឺន កួន បន្តថា ទំនប់​អាងស្តុកប្រភពទឹកទាំង​បីទីតាំងខាងលើនេះ វា​មាន​សក្ដានុពល​អាច​ជួយ​ស្រោចស្រព​លើ​ការងារ​កសិកម្ម​ ​របស់​ប្រជាកសិករ​បាន​ច្រើននៅ​តាម​បណ្តាមូលដ្ឋាន​ក្នុង​ស្រុកចំនួន៣ និងខេត្ត២ រួមមាន៖ ស្រុក ចុងកាល់ ស្រុក​អន្លង់វែង​ ស្រុកត្រពាំងប្រាសាទ។ខេត្តចំនួន២គឺខេត្តសៀមរាប ស្រុកស្រីស្នំ និងខេត្តបន្ទាយមានជ័យ ស្រុកភ្នំស្រុក លើផ្ទៃដីកសិកម្មប្រមាណ៣៥០០០ហិកតា៕ អត្ថបទ៖ សារិទ្ធិ