ភ្នំពេញ ៖ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ជាមួយនិងមន្ទីរពេទ្យព្រះអង្គឌួង និង សមាគមអតីតកម្មសិក្សាការី កម្ពុជា-កូរ៉េ (កាំកា-CAMKAA) បានរៀបចំ “សកម្មភាពសង្គម” នៅសហគមន៍ហ្រ្គីនបឺអែល នៅខណ្ឌដង្កោ រាជធានីភ្នំពេញ នៅថ្ងៃទី២៥ ខែវិច្ឆិកា ឆ្នាំ២០២២នេះ។

​កម្មវិធីនេះត្រូវបានចូលរួមដោយ លោក នោ ហ្យន់ជូន (Rho Hyun-Jun) ប្រធានតំណាងរបស់ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំការិយាល័យប្រទេសកម្ពុជា ឯកឧត្តម អ៊ឹម សួរ ប្រធានសមាគមអតីតកម្មសិក្សាការី កម្ពុជា-កូរ៉េ (CAMKAA) លោក នង ម៉ានិត អនុប្រធានមន្ទីរពេទ្យព្រះអង្គឌួង លោក មូន ក្យុងមីន (Mr. Moon Kyoungmin)ប្រធានក្រុម សុខសប្បាយរបស់អ្នកស្ម័គ្រចិត្តកូរ៉េ កយកា និង លោក ហ្វាង គ្យូឆុល (Mr. Hwang Kyucheol)ប្រធានសហគមន៍ហ្គ្រីន បឺអែល ក្រុមអ្នកស្ម័គ្រចិត្ត KOICAចំនួន២៥នាក់ វេជ្ជបណ្ឌិត និងគិលានុបដ្ឋាក-យិកា មកពីមន្ទីរពេទ្យព្រះអង្គឌួងចំនួន ១៦នាក់ សហគមន៍ហ្គ្រីនបឺអែល សិស្សានុសិស្ស និងប្រជាពលរដ្ឋក្នុងភូមិ ដែលមានអ្នកចូលរួមសរុបប្រមាណ ៣០០នាក់ ក្នុងសកម្មភាពសង្គមនេះ។

សកម្មភាពសង្គមនេះត្រូវបានធ្វើឡើងក្រោមកិច្ចសហការរវាងរដ្ឋបាលមូលដ្ឋាន សាលារាជធានីភ្នំពេញ (PPCH) និងអង្គការក្រៅរដ្ឋាភិបាលកូរ៉េ និងសហគមន៍ហ្គ្រីនបឺអែល ។

នៅក្នុងកម្មវិធីនោះផងដែរ ក្រុមអ្នកស្ម័គ្រចិត្ត KOICA ក្រុមសុខសប្បាយ (Soksabay) និងសមាជិក CAMKAA របស់យើងនឹងធ្វើសកម្មភាពរួមគ្នាដូចជា ផ្តល់អំណោយមួយចំនួន ការគូរគំនូរលើមុខសម្រាប់កុមារ ថតរូបបានភ្លាមៗ លេងជាមួយពពុះសាប៊ូ ជួសជុលអណ្តូងស្នប់ និងគូរគំនូរលើជញ្ជាំង ការប្រកួតកីឡា ការលេងហ្គេមពេញនិយម ការផ្តល់សម្ភារៈសិក្សា ថង់អេកូ និងអាហារសម្រន់ និងផ្តល់ការអប់រំអំពីអនាម័យបរិស្ថាន និងការផ្តល់ប្រអប់អាហារថ្ងៃត្រង់ដល់សិស្ស។ លើសពីនេះ វេជ្ជបណ្ឌិត និងគិលានុបដ្ឋាក-យិកា មកពីមន្ទីរពេទ្យព្រះអង្គឌួង បានផ្តល់ជូនការពិនិត្យ ពិគ្រោះ និងព្យាបាលនូវជំងឺភ្នែក ជំងឺត្រចៀក ច្រមុះ បំពង់ក និងជំងឺទូទៅ ដល់អ្នកជំងឺប្រមាណជាង ១០០នាក់ដែលមានជំងឺ ភ្នែក ត្រចៀក ច្រមុះ និងបំពង់ក (ENT) និងជំងឺទូទៅ នៅក្នុងសហគមន៍ហ្គ្រីនបឺអេលនេះ។

លោក នង ម៉ានិត អនុប្រធានមន្ទីរពេទ្យព្រះអង្គឌួង បានមានប្រសាសន៍ថា នេះជាលើកទីមួយហើយ ដែលមន្ទីរពេទ្យព្រះអង្គឌួង ធ្វើការជាមួយ KOICA លើសកម្មភាពសង្គម។ គាត់សង្ឃឹមរង់ចាំថានឹងមានការសហការជាមួយ KOICA ជាលើកទី ២ និងទី ៣ ទៀតក្នុងការធ្វើ "សកម្មភាពសង្គម" បែបនេះនាពេលអនាគត។

ជាមួយគ្នានោះដែរ លោក នោ ហ្យន់ជូន (Rho Hyun-Jun) ប្រធានតំណាងរបស់ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំការិយាល័យប្រទេសកម្ពុជា បានលើកឡើងថា កយកា-KOICA នឹងបន្តគាំទ្ររដ្ឋាភិបាល និងប្រជាជនកម្ពុជា ដើម្បីធ្វើឱ្យប្រទេសនេះកាន់តែមានសោភ័ណភាព និងកន្លែងរស់នៅកាន់តែប្រសើរឡើង៕អត្ថបទ ៖ រដ្ឋា