កោះកុង៖ រដ្ឋមន្រ្តីក្រសួងកសិកម្ម បានដឹកនាំក្រុមការងារ​ចុះ​ត្រួតពិនិត្យ ​និងស្វែងយល់ពីសង្វាក់​ផលិតកម្ម​ការប្រមូលផលខ្យងចំពុះទា ​ចិញ្ចឹមត្រីឆ្ពង់ ​និងការលើកដាក់ផលនេសាទនៅកំពង់ផែ ក្នុង​មូលដ្ឋានស្រុកមណ្ឌលសីមា​ ខេត្តកោះកុង នៅថ្ងៃទី២៦ ខែវិច្ឆិកា ឆ្នាំ២០២២។

ក្នុងឱកាសនោះ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បាន​ណែនាំ​ដល់មន្រ្តីបច្ចេកទេស ប្រជាកសិករ និងម្ចាស់វារីវប្បកម្ម ​បន្តពង្រីកការចិញ្ចឹមត្រី និង​ខ្យងចំពុះឱ្យ​បានកាន់តែច្រើនបន្ថែម ​ខណៈក្រសួងកសិកម្មបាននឹងកំពុងគិតគូរយកចិត្តទុកដាក់​ទៅលើការ​ស្វែងរកទីផ្សារ ​ដើម្បីលើកទឹកចិត្តដល់កសិករ។

យោងតាមរបាយការណ៍ផ្តល់ដោយមន្ទីរកសិកម្មខេត្តកោះកុង ​បង្ហាញថា បណ្តុំ​អាជីវកម្មចិញ្ចឹមត្រីឆ្ពង់​ និងត្រីតុកកែ​ នៅឃុំប៉ាក់ខ្លង​ បច្ចុប្បន្នអ្នកចិញ្ចឹមត្រីឆ្ពង់ និងត្រីតុកកែ​១៩គ្រួសារ លើផ្ទៃក្រឡា៨១៦ម៉ែត្រការ៉េស្មើនឹង៥២បែរត្រី។ផលិតកម្មត្រីតុកកែសរុប​មាន​ចំនួន៤.៤តោន ក្នុងនោះត្រីតុកកែចំនួន២,៤តោន​ ត្រូវបានប្រមូល និងលក់ក្នុងតម្លៃពី​២៧.០០០រៀលទៅ ៣៥.០០០ក្នុង១គីឡូក្រាម។ រីឯទិន្នផលត្រីឆ្ពង់វិញ ​ប្រមូលបាន៩តោន ដោយ​ក្នុង១គីឡូក្រាមថ្លៃ ២០០០០រៀលទៅ២៧០០០រៀល។

សហគមន៍នេសាទឃុំពាមក្រសោប មានប្រជានេសាទ​ចិញ្ចឹម​ខ្យងចំពុះទា​ចំនួន១១៥គ្រួសារ​លើផ្ទៃទឹក​ប្រមាណ ៥៨ហិកតា ទទួលបានបរិមាណផលសរុបចំនួន ២៥០០តោនក្នុង១ឆ្នាំ ហើយខ្យង​ប្រភេទអាចលក់បានក្នុង ១គីឡូក្រាមថ្លៃ១៥០០រៀល។

ទិន្នផល​ប្រមូលបាន ​ភាគច្រើននាំចេញទៅលក់នៅឯប្រទេសថៃ គ្រាទីផ្សារក្នុងស្រុកមិនទាន់ទូលំ​ទូលាយ​នៅឡើយទេ។

សម្រាប់ផែប្រមូលទិញផលនេសាទរបស់ឧកញ៉ា ​លី យ៉ុងផាត់ បង្កើតឡើងនៅឆ្នាំ២០១៥​ដោយ​រាជរដ្ឋាភិបាលកម្ពុជា​ក្នុងគោលបំណងជួយប្រជានេសាទ​ឱ្យមានកំពង់ផែសម្រាប់ឡើងត្រី ផ្តង់ការ​ងារដល់ប្រជានេសាទក្នុងមូលដ្ឋានសំដៅកាត់បន្ថយការចំណាកស្រុក។

កំពង់ផែនេះ ទទួលទូកនេសាទក្នុងស្រុកជាមធ្យមពី៦ទៅ៨ទូកក្នុង១ថ្ងៃៗ ហើយផលនេសាទ​ជា​មធ្យម​ពី៤តោនទៅ​១០តោនក្នុង១ថ្ងៃ។ ទិន្នផលទាំងនេះ​ត្រូវបាននាំ​ចេញទៅលក់នៅរាជធានី​ភ្នំពេញ ​ខេត្តមួយចំនួន​ ពិសេសនាំចេញទៅប្រទេសថៃ៕អត្ថបទ៖ឈឹម មករា