ភ្នំពេញ៖ អ្នកនាំពាក្យក្រសួងក្រសួងកសិកម្ម បានចេញបំភ្លឺក្រោយមានការរិះគន់អំពីរដ្ឋមន្រ្តីក្រសួង​កសិកម្មមិនបានយកចិត្តទុកដាក់ចំពោះបញ្ហាតម្លៃស្រូវ ​ដោយបង្ហាញនូវយុទ្ធសាស្រ្ត និង​ដំណោះស្រាយ​របស់ក្រសួង ដើម្បីដោះស្រាយបញ្ហាតម្លៃស្រូវនេះ។

បើតាមកញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម ប្រាប់BTVឲ្យដឹងថា នាពេលខាងមុខ ក្រសួងនឹងជួយជ្រោមជ្រែងដល់គ្រប់ភាគីទាំងអស់ ដើម្បីឱ្យវិស័យកសិកម្ម​ដំណាំ​ស្រូវនេះ​ដើរទៅមុខតាមរយៈ៖

- វិធានការផលិតពូជសុទ្ធល្អដែលសម្តេចតេជោនាយករដ្ឋមន្រ្តីបានប្រគល់ឱ្យក្រសួងអនុវត្ត ដែលក្រសួងបាននឹងកំពុងធ្វើការយ៉ាងសស្រាក់សស្រាំជាមួយវិស័យឯកជន។

- វិធានការលក់ចែកចាយពូជក្នុងថ្លៃសមរម្យដែលនៅក្រោមថ្លៃទីផ្សារធម្មតា។

- វិធានការអ្នកទិញពូជនឹងទទួលបានកិច្ចសន្យាផលិតកម្ម។

- វិធានការកម្មវិធីដាំដុះដើម្បីធានាការប្រើប្រាស់ទឹក និងការទិញមកវិញ មិនឱ្យចាល់ដូចការផលិត​ដែល​គ្មានផែនការរួម។

កញ្ញា បន្តថា ចំពោះបញ្ហាធ្លាក់ចុះនៃថ្លៃស្រូវនៅតាមបណ្ដាខេត្តមួយចំនួននាពេលថ្មីៗ ក្រសួង​កសិកម្ម រុក្ខាប្រមាញ់ និងនេសាទ បានកត់សម្គាល់ឃើញថា មានអ្នកប្រើប្រាស់បណ្ដាញសង្គមមួយចំនួនដែលបានអានព័ត៌មាននានាត្រឹមតែចំណងជើង ហើយ​ចោទប្រកាន់ ក្រសួងកសិកម្មថា បន្ទោសប្រជាកសិករដែលប្រមូលផលស្រូវស្របពេលគ្នា ជាហេតុធ្វើ​ឱ្យស្រូវធ្លាក់ថ្លៃ។

ដើម្បីដោះស្រាយបញ្ហាស្រូវធ្លាក់ថ្លៃនៅក្នុងរដូវប្រមូលផល ​កញ្ញា​ បានគូសបញ្ជាក់ថា វាជា​ការងារ​ដែលលំបាកនឹងត្រូវប្រើពេលយូរ.. នេះគឺជាការងារលំបាក ​និងត្រូវប្រើពេលយូរ ប៉ុន្តែជាការងារដែល​ចាំបាច់​ត្រូវតែធ្វើ ហើយអ្នកចាប់ផ្តើមមុនគេ នឹងទទួលបានផលមុនគេដែរ។

កញ្ញា បញ្ជាក់ថា «ក្រសួងកសិកម្មកំពុងតែបំពេញការងារ និងបន្តការងាររបស់ខ្លួនប្រកប​ដោយការ​ទទួលខុសត្រូវខ្ពស់​ និងសូមលើកទឹកចិត្តដល់អ្នកពាក់ព័ន្ធទាំងអស់ក្នុងវិស័យកសិកម្មដំណាំស្រូវ ត្រៀមខ្លួន​ចូលរួមអនុវត្តការងារក្នុងទម្រង់ថ្មីដែលនឹងផ្តល់ផលប្រយោជន៍រួមដល់យើងទាំងអស់គ្នា»។

អ្នកនាំពាក្យរូបនេះ ​ឲ្យដឹងថា បើតាមសេចក្ដីប្រកាសព័ត៌មានរបស់ក្រសួងចុះថ្ងៃទី១៥ ខែវិច្ឆិកា ក្រសួងបាន​បញ្ជាក់ច្បាស់លាស់ណាស់ថា​ ការធ្លាក់ចុះនៃថ្លៃស្រូវ កើតឡើងជារៀងរាល់ឆ្នាំ ចាប់ពីដើម​ខែវិច្ឆិកា រហូតដល់ពាក់កណ្ដាលខែធ្នូ ព្រោះវាជារដូវប្រមូលផលរបស់បង​ប្អូន​ប្រជា​កសិករ។​ នេះជាកត្តាសត្យានុម័តដែលមិនអាចប្រកែកបាន ហើយវាពុំមែនជាកំហុសរបស់​ប្រជា​កសិករទាល់តែសោះនៅពេលដែលដំណាំស្រូវរបស់លោកដល់ពេលប្រមូលផល និងត្រូវតែប្រមូលផល​ឱ្យទាន់សភាពការណ៍។

កញ្ញា សង្កត់ធ្ងន់ថា វិធានការឆ្លើយតបបន្ទាន់ គឺជាការ «ស្វែងរកទីផ្សារ» ជូនដល់ប្រជាកសិករដែល​រងផល​ប៉ះពាល់ ក្រោមកិច្ចសហការយ៉ាងជិតស្និទ្ធបំផុតជាមួយគ្រប់​ភាគីពាក់ព័ន្ធទាំងអស់នៅ​ក្នុង​វិស័យស្រូវអង្ករ ដូចជា ក្រសួងសេដ្ឋកិច្ច និងហិរញ្ញវត្ថុ ដែលបានអនុញ្ញាតបន្ថែមថវិកាដល់ធនាគារ​អភិវឌ្ឍន៍ជនបទ ដើម្បីជួយផ្តល់កម្ចីដល់រោងម៉ាស៊ីនកិនស្រូវ ឱ្យទិញស្រូវប្រជាកសិករទាន់​ពេលវេលា​ប្រមូលផល ក៏ដូចជាសហព័ន្ធស្រូវអង្ករកម្ពុជាដែលបានសហការគ្នា​ប្រមូលទិញ​យ៉ាង​សស្រាក់សស្រាំក្នុងតម្លៃដែលអាចទទួលយកបាន។ លើសពីនេះនៅមិនទាន់និយាយដល់ កង​កម្លាំងយោធា ​ដែលបានចំណាយកម្លាំងចូលរួមជួយលើកដាក់ស្រូវបងប្អូន​ប្រជាកសិករពេល​កំពុងប្រមូលលក់​ នៅខេត្តបន្ទាយមានជ័យ ​ខេត្តព្រះវិហារ និងខេត្តដទៃទៀតផងទេ។

យ៉ាងណាក៏ដោយ នៅក្នុងឆ្នាំនេះ ចាប់តាំងពីថ្ងៃទី១៥ ខែវិច្ឆិកាមក ក្រសួងកសិកម្ម រុក្ខាប្រមាញ់ និង​នេសាទ បានចុះដោះស្រាយបញ្ហានេះជូនដល់ប្រជាពលរដ្ឋនៅតាមមូលដ្ឋានផ្ទាល់ តាមរយៈការ​សម្របសម្រួលការទិញដូរស្រូវរវាងរោងម៉ាស៊ីនកិនស្រូវ និងប្រជាកសិករ ក្នុងតម្លៃសមស្រប​មួយដែលអាចទទួលយកបានពីគ្រប់ភាគី។

កញ្ញា បន្តទៀតថា កន្លងមក ឯកឧត្តមរដ្ឋមន្ដ្រី ក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា ធ្លាប់បានពន្យល់អំពីបញ្ហានេះរួចមកហើយថា ដំណោះស្រាយចំពោះវិស័យកសិកម្ម គឺទាមទារឱ្យសម្លឹងមើល​ទាំងមូលនិងឱ្យបានគ្រប់ជ្រុងជ្រោយ មិនមែនមើលត្រឹមតែផ្នែកណា​មួយ​នោះទេ។ ចំពោះដំណោះស្រាយទៀតសោត គឺត្រូវតែជាដំណោះស្រាយដែលមានការចូលរួម​ពីគ្រប់ភាគីពាក់ព័ន្ធ។

កញ្ញា បានឲ្យដឹងថា គិតត្រឹមថ្ងៃទី២៥ ខែវិច្ឆិកា ឆ្នាំ២០២២នេះ រោងម៉ាស៊ីនកិនស្រូវនៅខេត្តបាត់ដំបង និងបន្ទាយមានជ័យ​ បានប្រមូលទិញស្រូវពីប្រជាកសិករបានជាង១៥ម៉ឺនតោនរួចមកហើយ ខណៈទិន្នផល​ស្រូវដែល​នៅសស់មិនទាន់ដល់ពេលប្រមូលផល មានចំនួនប្រមាណ២០ភាគរយ​នៅ​ខេត្តបាត់ដំបង និងជាង ៥០ភាគរយនៅខេត្តបន្ទាយមានជ័យ៕