សៀមរាប៖ អាជ្ញាធរខេត្តសៀមរាប និងអង្គការមូលនិធិទំពាំងស្នងឫស្សី និងអង្គការដៃគូឈ្មោះ Ocean Recovery Alliance​ ចាប់ផ្តើមគាំទ្រសហគមន៍សង្កាត់ចុងឃ្នៀស ឱ្យអនុវត្តន៍​កម្មវិធី​គ្រប់គ្រង​កាកសំណល់ និងប្រមូលយកប្លាស្ទិក នៅតាមផ្ទះបណ្ដែត ដើម្បីបរិស្ថានស្អាត អនាម័យល្អ ក្នុង​តំបន់ទេសចរណ៍ចុងឃ្នៀស ក្រុងសៀមរាប ខេត្ដសៀមរាប។

លោក អ៊ុ សារី ចៅសង្កាត់ចុងឃ្នៀស បានឱ្យដឹងថា ចុងឃ្នៀសជាសហគមន៍មួយ ដែលពលរដ្ឋភាគ​ច្រើន​រស់នៅលើផ្ទះបណ្តែតទឹក ដូច្នេះការរស់នៅប្រចាំថ្ងៃចៀសមិនផុតពីការបោះចោល​សំរាម​ចូល​ទៅ​ក្នុងទឹក ជាពិសេសសំរាមប្លាស្ទិក​ ដែលបង្កផលផលប៉ះពាល់ដល់ធម្មជាតិ ​ជីវៈចម្រុះ និង​សុខភាព​មនុស្ស។

លោកថា ទោះបីយុទ្ធនាការនេះ ​មិនមិន​ជាលើកទី១​ក៏ពិតមែន ​តែអាជ្ញាធរសង្កាត់ ​និងបងប្អូន​ប្រជា​ពលរដ្ឋ​រស់នៅក្នុង​សហគមន៍​ប្តេជ្ញាថា​ នឹងចូលរួមកាន់តែសកម្មបន្ថែមទៀតជាមួយ​ស្ថាប័ន​ពាក់ព័ន្ធ និងអង្គការដៃគូ ​ធ្វើយ៉ាងណាឱ្យសហគមន៍ចុងឃ្នៀស ក្លាយ​ជាសហគមន៍មួយគ្មាន​ការ​បំពុល​ដោយសំរាមប្លាស្ទិក។

លោក ពិន ប្រាកដ អភិបាលរងខេត្តសៀមរាប​ ខេត្តសៀមរាបក្រៅពីការចូលមកទស្សនា​កម្សាន្ត​ប្រាសាទ​អង្គរវត្ត ​និងប្រាសាទបុរាណជាច្រើនហើយនោះ​ ភ្ញៀវទេសចរ តែងចូលមកទស្សនា​បឹងទន្លេសាប​ដែលទីតាំងដ៏ទាក់ទាញមួយ។ ​ដូច្នេះ ​ដើម្បីទាក់ទាញភ្ញៀវទេសចរមកកម្សាន្ត មិនចេះ​ដាច់នោះ ប្រជាសហគមន៍ត្រូវរួមគ្នា ​ថែរក្សាអនាម័យបរិស្ថាន​ ទុកដាក់សំរាមឱ្យបានត្រឹមត្រូវ ជាពិសេស​សំរាមប្លាស្ទិក ​ដើម្បីរក្សាសហគមន៍មួយនេះឱ្យស្រស់ស្អាត​ គ្មានការបំពុលដោយប្លាស្ទិក នោះជីវភាព​ប្រជាសហគមន៍នឹងកាន់តែល្អប្រសើរ​ ដោយសារ​ទទួល​បាន​ចំណូលពីវិស័យទេសចរ។

គួរបញ្ជាក់ថា​ យុទ្ធនាការនេះមានរយៈពេល៣ឆ្នាំ ​ធ្វើឡើងនៅតាមផ្ទះបណ្ដែតទឹកជិត ៧០០គ្រួសារ ដោយ​ប្រើទូក និងឧបករណ៍ដួសសំរាម ​ដោយបែងចែកជាពីរក្រុម ដោយមួយក្រុម សម្រាប់ស្រង់​សំរាមចេញពីទឹក ​និងមួយក្រុមទៀតជាយុវជនស្ម័គ្រចិត្តចុះអប់រំតាមខ្នង​ផ្ទះឱ្យពលរដ្ឋដូរ​ទម្លាប់​ឈប់បោះចោលសំរាមទៅក្នុងទឹក ៕អត្ថបទ៖ ឈិត សាវី