ចិន៖ ប្រជាជនទីក្រុងប៉េកាំងបានធ្វើបាតុកម្មប្រឆាំងវិធានការរឹតត្បិតជំងឺ COVID-19 ដ៏តឹងរ៉ឹងរបស់ប្រទេសចិននៅព្រឹកថ្ងៃចន្ទនេះ ខណៈការតវ៉ាបានផ្ទុះឡើងនៅក្នុងប្រទេសចិន។ ក្រុមបាតុករពីរក្រុមដែលមានមនុស្សយ៉ាងហោចណាស់ ១ពាន់នាក់បានប្រមូលផ្តុំគ្នានៅតាមដងផ្លូវនៅរដ្ឋធានីប្រទេសចិនក្បែរទន្លេ Liangma ដោយបដិសេធមិនព្រមបំបែកគ្នា។
អ្នកតវ៉ាម្នាក់និយាយថា «យើងមិនត្រូវការ ការពិនិត្យដ៏ធំបែបនេះនៅបរិវេណទាំងមូល ហើយវាមិនចាំបាច់ត្រូវមានភាពល្អិតល្អន់ពេកនោះទេ»។ ការមិនស្តាប់បង្គាប់របស់ប្រជាជនគឺមិនធ្លាប់មានពីមុនមកនោះទេ នៅប្រទេសចិនដីគោក ចាប់តាំងពីប្រធានាធិបតីលោក Xi Jinping ឡើងកាន់តំណែងក្នុងរយៈពេល ១ទសវត្សរ៍កន្លងទៅនេះ ខណៈការខកចិត្តកើនឡើងជុំវិញការចុះហត្ថលេខាលើគោលនយោបាយគ្មានវីរុស COVID (Zero-Covid) រយៈពេលជិត ៣ឆ្នាំមកនេះ។ ចំណែកនៅទីក្រុងសៀងហៃ កាលពីថ្ងៃអាទិត្យនគរបាលបានឃុំខ្លួនបាតុករ ខណៈមានការតវ៉ាជុំវិញវិធានការរឹតត្បិតជំងឺ COVID-19 តឹងរ៉ឹងរបស់ប្រទេសចិនបានផ្ទុះឡើងចូលដល់ថ្ងៃទី៣ ហើយបានរីករាលដាលដល់ទីក្រុងនានា។
ក្រុមអ្នកតវ៉ាត្រូវបានគេឃើញប្រមូលផ្តុំគ្នានៅតាមដងផ្លូវទីក្រុងសៀងហៃ និងច្រៀងចម្រៀងជាតិ។ នៅក្នុងទីក្រុងសៀងហៃ នគរបាលត្រូវបានដាក់ពង្រាយយ៉ាងច្រើននៅលើផ្លូវ Wulumuqi ជាកន្លែងដែលមានដុតភ្លើងទៀនមុនពេលប្រែក្លាយទៅជាការតវ៉ា។ កាលពីល្ងាចថ្ងៃអាទិត្យ មនុស្សរាប់រយនាក់បានប្រមូលផ្តុំគ្នានៅតំបន់នេះ ដែលមួយចំនួនបានរុញច្រាននគរបាលដែលព្យាយាមបំបែកពួកគេ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
