ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធាន​គណបក្ស​ប្រជាជនកម្ពុ ​ជានៅថ្ងៃទី២៨ ខែវិច្ឆិកា ឆ្នាំ២០២២នេះ​ បាន​អនុញ្ញាត​ឱ្យ​លោកបណ្ឌិត យ៉ង សាំង កុមារ ​ចូលជួបពិភាក្សាការងារ​នៅឯភូមិគ្រឹះរបស់សម្តេច​ បន្ទាប់ពីអតីតប្រធាន​គណបក្ស​ប្រជាធិបតេយ្យ​មូលដ្ឋានរូបនេះ ​បានសុំចូលរួមជីវភាព ​នយោបាយជាមួយគណបក្សប្រជាជនកម្ពុជា កាលពីពេលថ្មីៗកន្លងទៅនេះ។

តាមរយៈផេកហ្វេសបុកផ្ទាល់​របស់សម្តេចតេជោនាយករដ្ឋមន្រ្តី​ បានបញ្ជាក់ថា «ទើបជួបពិភាក្សាជា​មួយ​រដ្ឋមន្ត្រីកសិកម្ម ឌិត ទីណា និងបណ្ឌិត យ៉ង សាំងកុមារ ព្រមទាំងលោក ​ឡឹក សុធា លើការងារ​កសិកម្ម ​ដែលលោកទាំងពីរនាក់ ​ទើបមករួមរស់ជាមួយគណបក្សប្រជាជនកម្ពុជា»។

សូមបញ្ជាក់ថា​ លោកបណ្ឌិត យ៉ង សាំងកុមារ ប្រធាន​គណបក្សប្រជាធិបតេយ្យមូលដ្ឋាន បាន​ស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា​កាលពីពេលថ្មីៗនេះ។ នៅក្នុងលិខិតស្នើសុំចូលរួមជីវភាពនយោបាយនេះ ​លោកបណ្ឌិត ​យ៉ង សាំងកុមារ បានលើកឡើងពី​មូលហេតុដែលនាំឱ្យលោកស្នើសុំចូលរួមជីវភាពនយោបាយជាមួយ​គណបក្សប្រជាជនកម្ពុជា ដោយ​សារពេញចិត្តនឹងគោលនយោបាយលើវិស័យកសិកម្ម ​ដែល​សម្តេចតេជោ ​បាន​គូសបញ្ជាក់​នាពេលថ្មីៗ​នេះ។

តាមរយៈលិខិតស្នើសុំរបស់លោក យ៉ង សាំងកុមារ បានសង្កត់ធ្ងន់ថា«ដោយឃើញនូវគោល នយោបាយ​របស់សម្តេចតេជោ ​លើវិស័យកសិកម្ម ​ដែលសម្តេចទើបបានប្រកាសថ្មីៗ ក្នុងនោះ​មានគោលនយោបាយ ​លើកកម្ពស់ជីវភាពកសិករប្រកបដោយវិធានការជាក់ស្តែង ដូចជា​គោលនយោបាយផលិតពូជ​ ស្រូវសម្រាប់លក់ចែកជូន​ប្រជាពលរដ្ឋក្នុងតម្លៃសមរម្យ គោល​នយោបាយកាត់បន្ថយថ្លៃដើមផលិត ​គោលនយោបាយ​បង្កើនទុន​ដល់​ធនាគារ​អភិវឌ្ឍន៍​កសិកម្ម និង​ជនបទ ​និងគោលន​យោបាយ​ដោះស្រាយបញ្ហាទី ​ផ្សារកសិផល ​ខ្ញុំ​បាទ​មានទំនុកចិត្តថា ​ការដាក់​ចេញ​នូវគោលនយោបាយ​ប្រាកដ​និយមថ្មីនេះ ​នឹង​អាចនាំ​មក​នូវ​ផ្លែផ្កា និង​ប្រយោជន៍​យ៉ាង​ពិត​ប្រាកដ​ដល់ប្រជាពលរដ្ឋទាំងមូល។ ​​គោលនយោបាយទាំងនេះ ​គឺដូចគ្នាទៅនឹងចំណេះដឹងនិង​ជំនាញ ​ឆន្ទៈ និងបទពិសោធន៍ការងារលើវិស័យកសិកម្មរបស់ខ្ញុំកន្លងមក»។

តាមរយៈលិខិតស្នើសុំនេះ​ លោកបណ្ឌិត យ៉ង សាំងកុមារ ​បានបញ្ជាក់បន្ថែមផងដែរថា ​ការដែល លោក​សម្រេចចូលរួមជីវភាពនយោបាយ​ជាមួយគណបក្សប្រជាជន​កម្ពុជានេះ គឺដើម្បី​ចូល​រួម​អនុវត្តន៍​ គោលនយោបាយខាងលើនេះ ឱ្យ​ជោគជ័យ​និងមាន​ផ្លែផ្កា ក្នុងគោលបំណង​លើក​ស្ទួយជីវភាព​កសិករ​ សន្តិសុខស្បៀង ​បរិស្ថាន ​និងសេដ្ឋកិច្ចជាតិជាដើម៕អត្ថបទ៖ បាន ចក់