ភ្នំពេញ៖ ឯកឧត្តម អៀង មូលី ទេសរដ្ឋមន្រី្ត និងជាប្រធានអាជ្ញាធរជាតិប្រយុទ្ធនឹងជំងឺអេដស៍ ប្រាប់BTV ព័ត៌មាន នាព្រឹកថ្ងៃទី២៨ ខែវិចិ្ឆកា ឆ្នាំ២០២២នេះថា ព្រះរាជាណាចក្រកម្ពុជា នៅតែជាប្រទេសឈានមុខគេ ក្នុងការប្រយុទ្ធប្រឆាំងនឹងជំងឺអេដស៍។

ឯកឧត្តម ទេសរដ្ឋមន្រី្ត បានបន្តទៀតថា ជាទិដ្ឋភាពរួម យើងពិនិត្យទៅឃើញថាប្រទេសកម្ពុជា នៅតែឈានមុខ គេក្នុងការប្រយុទ្ធប្រឆាំងនឹងជំងឺអេដស៍។ ដោយសារនៅក្នុងឆ្នាំ២០២១កន្លងទៅនេះ ការវាយតម្លៃរបស់អង្គការ UNAID (យូអ៊ិនអេដ) បានសំគាល់ថានៅលើគោលដៅ៩៥-៩៥-៩៥ ចង់បង្ហាញថា ​អ្នកផ្ទុកមេរោគអេដស៍៩៥% បានដឹងថា​ខ្លួនឯងមានផ្ទុកមេរោគអេដស៍ ​ហើយដឹងថាខ្លួនឯងបានផ្ទុកមេរោគអេដស៍ បានទៅទទួលសេវាព្យាបាល៩៥%។ ​ហើយក្រោយដែលបានទទួលសេវាព្យាបាលរួចហើយ និង​ពិនិត្យទៅមើល​ឃើញគ្រាប់ មេរោគ ដែលនៅក្នុងខ្លួននោះទាបបំផុត៩៥%។ នេះជាគោលដៅរបស់​អង្គការសហប្រជាជាតិដែលបានកំណត់៩៥-៩៥-៩៥ សម្រាប់ទូទាំងពិភពលោក។

ឯកឧត្តម អៀង មូលី ទេសរដ្ឋ​មន្ត្រី បានបញ្ជាក់ទៀតថា​ ដើម្បីលុបបំបាត់ជំងឺអេដស៍ រដ្ឋាភិបាល​បានដាក់ចេញគោលនយោបាយ ប្រឹងបន្តទៅទៀតក្នុងការបង្ការ កុំឲ្យមានការរីករាលដាល​មេរោគ​អេដស៍។ យើងទាំងអស់គ្នា ក៏បានដឹងផងដែរថា ទិសដៅមុខសញ្ញាដែលត្រូវពង្រឹងកម្មវិធីបង្ការនេះ គឺយុវវ័យ ដែលមានអាយុភាគច្រើនក្រោម៣០ឆ្នាំ​ គឺមនុស្សប្រុស រួមភេទជាមួយមនុស្សប្រុស ដែលមានការឆ្លងមេរោគអេដស៍ខ្លាំង។

ទន្ទឹមនឹងនេះ ឯកឧត្តម អៀង មូលី ក៏សូមអំពាវនាវដល់អង្គការដៃគូអន្តរជាតិ-សូមជួយគាំទ្រការ​ពង្រឹង​ប្រព័ន្ធជាតិ តាមរយៈការបន្តផ្តល់ជំនួយហិរញ្ញវត្ថុ ​និងបច្ចេកទេសក្នុងការឆ្លើយតប នឹង​រោគអេដស៍ និងជំងឺអេដស៍ក្នុងប្រទេស ​ក្រោមការដឹកនាំសម្របសម្រួលរបស់អាជ្ញាធរ​ជាតិ​ប្រយុទ្ធ​នឹងជំងឺអេដស៍ ក៏សូមអំពាវនាវដល់គ្រប់ក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ ឃុំ សង្កាត់ ធ្វើការរួមគ្នាជាពហុវិស័យ ​សហការយ៉ាង​ជិតស្និទ្ធ​ជាមួយកាកបាទក្រហមកម្ពុជា អង្គការមិនមែន​រដ្ឋាភិបាល​ សង្គមស៊ីវិល វិស័យឯកជន ​អ្នកផ្ទុកមេរោគអេដស៍​ ក្រុមប្រជាជនគន្លឹះ ​និងសហគមន៍ ដើម្បី​លុបបំបាត់ ​ការចម្លងរោគអេដស៍ ​និងយកជ័យជម្នះ​លើ​មេរោគអេដស៍ឲ្យ​បានតាម​កាល​កំណត់៕អត្ថបទ៖ រដ្ឋា