​កូរ៉េខាងជើង៖ ទីភ្នាក់ងារសារព័ត៌មាន​រដ្ឋ KCNA បាន​រាយការណ៍​កាលពី​ថ្ងៃអាទិត្យ​ថា មេដឹកនាំ​ប្រទេស​កូរ៉េខាងជើង​លោក Kim Jong Un មាន​ផែន​ការ​កសាង​កម្លាំង​នុយក្លេអ៊ែរ​ដ៏​មាន​ឥទ្ធិពល​បំផុត​លើ​ពិភពលោក​។ ​ទីភ្នាក់ងារសារព័ត៌ មាន​នេះ​បាន​រាយការណ៍​ថា គោលដៅ​ចម្បង​នៅ​ពីក្រោយ​កម្មវិធី​នុយក្លេអ៊ែរ​របស់​កូរ៉េខាងជើង​ គឺ​ត្រូវមាន​កម្លាំង​ពេញ​លេញ​ដែល​មិន​ធ្លាប់មាន​ក្នុង​សតវត្សរ៍​នេះ​។

លោក Kim បាន​និយាយ​កាលពី​ថ្ងៃ​សៅរ៍ ជា​ផ្នែក​មួយ​នៃ​បទបញ្ជា​ជំរុញ​ដល់​មន្ត្រី​យោធា​ជាច្រើន​នាក់​។ បទបញ្ជា​នេះ​ធ្វើឡើង​បន្ទាប់ពី​អ្វីដែល​ប្រទេស​កូរ៉េខាងជើង​បាន​និ​យាយថា ​ជាការ​បាញ់​សាកល្បង​មី​ស៊ី​ល​បាលី​ស្ទីក​អន្តរទ្វីប (ICBM) ប្រភេទ​ថ្មីកាលពី​ថ្ងៃទី​18 ខែវិច្ឆិកា​។​ ​យោងតាម​សារព័ត៌មាន KCNA បាន​ឲ្យ​ដឹងថា​ មី​ស៊ី​ល​នេះ​ជា​ប្រភេទ​មី​ស៊ី​ល Hwaseong-17 ជា​គ្រាប់រ៉ុក្កែត​ដ៏​ធំ​មាន​សមត្ថភាព​នាំយក​ក្បាល​គ្រាប់​នុយក្លេអ៊ែរ ​ទៅដល់​ដីគោក​របស់​សហរដ្ឋ អាមេរិក​។ លោក Kim បាន​កោតសរសើរ​មន្ត្រី​ដែល​បាន​ផលិត​មី​ស៊ី​ល​ថ្មី​នេះ នៅក្នុង​ការ​ថ្លែង​របស់លោក​។

លោក​បានចាត់ទុក​មី​ស៊ី​ល​នេះ​ថា​ជា «​អាវុធ​យុទ្ធសាស្ត្រ​ខ្លាំង​បំផុត​លើ​ពិភពលោក​» និង​បាន​និយាយថា វា​បង្ហាញ​ការឈាន​ឆ្ពោះទៅមុខ​ដ៏​អស្ចារ្យ​ ក្នុងការ​អភិវឌ្ឍន៍​បច្ចេក​វិទ្យា​នៃ​ការបំពាក់​ក្បាល​គ្រាប់​នុយក្លេអ៊ែរ​ នៅលើ​មី​ស៊ី​ល​បាលី​ស្ទីក​។ ដោយមាន​ការអភិវឌ្ឍ​ន៍​ស៊ី​ល​បាលី​ស្ទីក​អន្តរទ្វីប (ICBM) ថ្មី​នេះ លោក Kim បាន​និយាយថា ប្រទេស​កូរ៉េខាងជើង​បានបង្ហាញ​ដល់​ពិភពលោក​នូវអនាគត​ដ៏​មាន​ទំនុកចិត្ត និង​ជោគជ័យ​នៃ​រដ្ឋ​របស់​យើង ដោយ​កំពុង​ឈានឆ្ពោះ​ទៅរក​គោលដៅ​នៃ​ការកសាង​កងទ័ព​ដ៏​រឹងមាំ​បំផុត​របស់​ពិភពលោក៕

អត្ថបទ៖ ប៊ុនថន