បាត់ដំបង៖ ឯកឧត្តម សុខ លូ អភិបាលខេត្តបាត់ដំបង នៅថ្ងៃទី២៨ ខែវិច្ឆិកា ឆ្នាំ២០២២ បានអញ្ជើញចុះពិនិត្យមើលការបង្កបង្កើនផល និងស្ដារឡើងវិញនូវដំណាំស្រូវរបស់ប្រជាកសិករ នៅក្នុងស្រុកថ្មគោល និងស្រុកបវេល ក្រោយទឹកជំនន់បាននិងកំពុងស្រកចុះ។
សូមរំលឹកថា ប្រជាកសិកររងគ្រោះដោយទឹកជំនន់ក្នុងខេត្តបាត់ដំបង ចំនួន១២ ៤៥៤គ្រួសារបានទទួលពូជស្រូវពីរាជរដ្ឋាភិបាលសម្រាប់ស្ដារឡើងវិញ លើផ្ទៃដីខូចខាត ១២ ៤៥៤ ហិកតា។
ថ្លែងក្នុងឱកាសចុះពិនិត្យការស្ដារដំណាំស្រូវ ឯកឧត្តម សុខ លូ បានគូសបញ្ជាក់ថា ពូជស្រូវដែលសម្តេចតេជោ ហ៊ុន សែន នាយករដ្ឋមន្រ្តីបានផ្តល់ជូនបងប្អូនកសិករដែលរងគ្រោះដោយជំនន់ទឹកភ្លៀងកន្លងមក ពិតជាមានដំណុះល្អស្ទើរតែ១០០%។
ប្រជាកសិករ បានឱ្យដឹងថា គ្រាប់ពូជស្រូវដែលរាជរដ្ឋាភិបាលផ្ដល់ជូនមានដំណុះល្អពោល គឺដុះស្ទើរ១០០ភាគរយហើយការបង្កបង្កើនផលស្រូវប្រាំងឆ្នាំនេះ មានលក្ខណៈងាយស្រួលជាងបណ្ដាឆ្នាំមុនៗដោយសារកត្តាអាកាសធាតុអំណោយផលមានភ្លៀងធ្លាក់ច្រើនមានទឹកធ្វើស្រែគ្រប់គ្រាន់។
គួរបញ្ជាក់ថា ផែនការស្ដារស្រូវប្រាំងក្នុងខេត្តបាត់ដំបង សរុបមានចំនួន ៣១ ៣៥៤ ហិកតា ក្នុងនោះការស្ដារដោយប្រើពូជស្រូវរបស់ប្រជាកសិករផ្ទាល់ខ្លួនមានចំនួន ១៨ ៩០០ ហិកតា និងផែនការស្តារឡើងវិញដោយពូជស្រូវដែលរដ្ឋាភិបាលផ្ដល់ជូនមានចំនួន ១២ ៤៥៤ ហិកតា៕អត្ថបទ៖ នឿត សុភ័ក្ត