ភ្នំពេញ៖ លោកបណ្ឌិត យ៉ងសាំងកុមារ អ្នកជំនាញផ្នែកកសិកម្ម ដាក់សំណើមួយចំនួន ដើម្បីពិភាក្សា និងទទួលការឯកភាពជាផ្លូវការពីរាជរដ្ឋាភិបាល ដើម្បីដោះស្រាយបញ្ហាទីផ្សារស្រូវ-អង្ករ របស់ប្រជាពលរដ្ឋ ដែលកំពុងជួបបញ្ហាតម្លៃ និងការប្រើប្រាស់ទុន ក្នុងការផលិតនោះ ។

លោកបណ្ឌិត យ៉ង សាំងកុមារ លើកឡើងថា គ្រួសារខ្មែរភាគច្រើនបំផុតជាកសិករ និង ជួបការលំបាកជាច្រើន ដែលបញ្ហានេះ នាំមកនូវផលប៉ះពាល់អវិជ្ជមានដល់សង្គមជាតិ ហើយបញ្ហានេះ ត្រូវមានការសហការគ្នា ដើម្បីចូលរួមដោះស្រាយ​តាមគោលការណ៍​ទុក្ខវេទនា របស់កសិករជាទុក្ខវេទនារបស់ជាតិទាំងមូល ។

លោកបណ្ឌិតបន្តថា ពាក់ព័ន្ធបញ្ហាខាងលើ លោកមានចំណុចមួយចំនួន ដើម្បីពិភាក្សា និងឯកភាពពីរាជរដ្ឋាភិបាល បើអនុវត្តបាន​ជោគជ័យ នឹងអាចជួយដោះស្រាយបញ្ហាជូនកសិករ ជាង១លានគ្រួសារ បានល្អប្រសើរ ហើយកសិករមានសមត្ថភាពផលិតស្រូវ ដែលមានគុណភាពល្អ សម្រាប់ផ្គត់ផ្គង់ទីផ្សារ ជាមួយថ្លៃដើមទាប និងទទួលបានតម្លៃសមរម្យ ហើយរោងម៉ាស៊ីនកិនស្រូវ ទទួលបានស្រូវល្អក្នុងតម្លៃសមរម្យ សម្រាប់កែច្នៃលក់មកកាន់ទីផ្សារ ។

លោកបន្ថែមថា សំណើរួមមានត្រូវពង្រឹង និងពង្រីកការស្រាវជ្រាវផលិត និងផ្គត់ផ្គង់គ្រាប់ពូជស្រូវសុទ្ធល្អដល់កសិករ, បណ្ដុះបណ្ដាល ណែនាំ និងផ្ដល់យោបល់ដល់កសិករ, រៀបចំឲ្យមានប្រព័ន្ធគ្រប់គ្រងទិន្នន័យកសិករអ្នកផលិតស្រូវ, រៀបចំឲ្យមាន និងពង្រឹងសហគមន៍កសិករ មានកន្លែងប្រមូលផ្ដុំ កន្លែងសម្ងួត និងឃ្លាំងស្តុកស្រូវ, រៀបចំឲ្យមានប្រព័ន្ធទិន្នន័យរោងម៉ាស៊ីនស្រូវ, សម្របសម្រួលឲ្យមានការសហការណ៍ និងកិច្ចសន្យារវាងសហគមន៍កសិករ និងរោងម៉ាស៊ីនកិនស្រូវ ក្រុមហ៊ុនជំនួញស្រូវអង្ករ ។

លោកបណ្ឌិតបន្តទៀតថា ត្រូវកំណត់ស្តង់ដារ និងយន្តការត្រួតពិនិត្យ និងបញ្ជាក់គុណភាពស្រូវ និងការកំណត់តម្លៃអប្បបរមាស្រូវតាមប្រភេទពូជ, ធ្វើការជាមួយធនាគារកសិកម្ម និងអភិវឌ្ឍន៍ជនបទ និងស្ថាប័នហិរញ្ញវត្ថុនានា ដើម្បីបង្កើនទុនដល់រោងម៉ាស៊ីន អ្នកទិញ និងសហគមន៍កសិករ, រៀបចំឲ្យមានគណៈកម្មាធិការដឹកនាំគម្រោង, រៀបចំឲ្យមានអ្នកទទួលខុសត្រូវលើការអនុវត្តគម្រោង, រៀបចំឲ្យមានប្រព័ន្ធត្រួតពិនិត្យ និងប្រើប្រាស់ថវិកាជាតិ និងថវិកាមកពីដៃគូអភិវឌ្ឍន៍នានា ដើម្បីអនុវត្តគម្រោងនេះ ហើយត្រូវការពេលយ៉ាងតិចបំផុត៥ឆ្នាំ ដើម្បីអនុវត្តន៍ផែនការនេះបានទូទាំងប្រទេស ។

បណ្ឌិត យ៉ង សាំងកុមារ បានបញ្ជាក់ថា ក្នុងឱកាសចូលជួបសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៨ ខែវិច្ឆិកា និងមានការចូលរួមពីឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ គឺស្ថិតក្នុងបរិយាកាសល្អអំពីស្ថានភាពកសិកម្ម ទុក្ខលំបាករបស់កសិករ ទស្សនវិស័យ និងវិធានការកែលម្អ ជាពិសេសផ្តោត​លើវិស័យស្រូវអង្ករ និងវិស័យពាក់ព័ន្ធផ្សេងទៀត ដែលជាទូទៅអង្គពិភាក្សាមានទស្សនវិស័យដូចគ្នា ទាក់ទងនឹងបញ្ហាប្រឈម ដំណោះស្រាយក្នុងវិស័យកសិកម្ម ហើយអាចធ្វើការជាមួយគ្នាបាន ៕ អត្ថបទ៖ បាន សុខរិទ្ធិ