ភ្នំពេញ៖ នៅថ្ងៃទី២៨ ខែវិច្ឆិកានេះ ឯកឧត្តម តុប សំ ប្រធានក្រុមប្រឹក្សាជាតិប្រឆាំងអំពើពុករលួយ បានបើកកិច្ចប្រជុំក្រុមប្រឹក្សាជាតិប្រឆាំងអំពើពុករលួយប្រចាំខែ លើកទី១៧ អាណត្តិទី៣ នៅស្នាក់ការកណ្តាលអង្គភាពប្រឆាំងអំពើពុករលួយ។ តាមរបាយការណ៍កិច្ចប្រជុំ៖ នៅក្នុងដំណើរការប្រឡងប្រសញ្ញាបត្រមធ្យមសិក្សាទុតិយភូមិខាងមុខនេះ អង្គភាពគ្រោងរៀបចំអ្នកសង្កេតការណ៍ប្រឆាំងអំពើពុកលួយក្នុងការប្រឡងបាក់ឌុបជាង៣០០០នាក់។
នៅក្នុងរបាយការណ៍របស់ឯកឧត្តម កិត្តិនីតិកោសលបណ្ឌិត ឱម យិនទៀង ទេសរដ្ឋមន្ត្រី ប្រធានអង្គភាពអំពើពុករលួយបានឲ្យដឹងថា នៅក្នុងចំណោមអ្នកសង្កេតការណ៍ប្រឆាំងអំពើពុករលួយ ៣០០០នាក់ នោះ គឺមានមន្ត្រីអង្គភាពប្រឆាំងអំពើពុករលួយប្រមាណជាង ៣០០នាក់ ដាក់ពង្រាយនៅតាមមណ្ឌលប្រឡងនានានៅទូទាំងប្រទេស។
របាយការណ៍បានសរសេរដែរថា នៅក្នុងដំណើរការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សាឆ្នាំ២០២២ ដែលនឹងប្រព្រឹត្តិទៅនៅថ្ងៃទី៥ និងថ្ងៃទី៦ ខែធ្នូខាងមុខនេះ គឺមានបេក្ខជន បេក្ខនារីប្រឡងប្រមាណជាង ១២ម៉ឺន៨១៣៤នាក់ មានមណ្ឌលប្រឡងចំនួន ២២១មណ្ឌល និងមានបន្ទប់ប្រឡងចំនួន ៥ពាន់១៧៤បន្ទប់ ។
សូមបញ្ជាក់ថា បើតាមឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា ធ្លាប់បានថ្លែងប្រាប់ បណ្តាអ្នកសារព័ត៌មានថា នៅក្នុងការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២២នេះ ក្រសួងអប់រំយុវជន និងកីឡា គ្រោងនឹងចំណាយថវិកាប្រមាណ ២១ពាន់លានរៀល ស្មើនឹង៥លានដុល្លារអាមេរិក ទៅលើការឧបត្ថម្ភគណៈកម្មការនានា។
ឯកឧត្តម បន្តថា ដើម្បីឱ្យដំណើរការប្រឡងឱ្យមានតម្លាភាពយុត្តិធម៌ និងអាចទទួលយកបានទាំងអស់គ្នា ក្រសួងបានរៀបចំគណៈមេប្រយោគ និងគណៈកម្មការផ្សេងៗចំនួន ២៧ ៧៥៣ នាក់ ក្នុងនោះមានគណៈកម្មការមេប្រយោគជាង ១ ម៉ឺននាក់ គណៈកម្មការកំណែជិត ១ម៉ឺននាក់ និងជំនួយការអប្បមាទសម្រាប់ត្រួតពិនិត្យមើលនៅតាមបន្ទប់ប្រឡងចំនួន ២ ៧០០នាក់ និងមានការចូលរួមពីអ្នកសង្កេតការណ៍ប្រឆាំងអំពើពុករលួយ នៅក្នុងដំណើរការប្រឡងនេះផងដែរ៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
