កំពង់ស្អឺ៖ នាថ្ងៃទី២៨ ខែវិច្ឆិកា ឆ្នាំ២០២២ យុវជន និង អ្នកស្ម័គ្រចិត្តកាកបាទក្រហមកម្ពុជា ថ្នាក់​កណ្តាល សហការជាមួយសាខាខេត្តកំពង់ស្ពឺ សរុបចំនួន៦០នាក់ បានចុះធ្វើយុទ្ធការ​អប់រំ​ផ្សព្វផ្សាយ កាត់បន្ថយជំងឺគ្រុនឈាម និង បន្សុំាការប្រែប្រួលអាកាសធាតុ ដោយ​ធ្វើឡើង​ចំនួន ៣ ទីតាំង​ផ្សេងៗគ្នា ស្ថិតនៅក្នុងក្រុងច្បារមន ខេត្តកំពង់ស្ពឺ។

ថ្លែងនៅក្នុងពិធីបើកយុទ្ធនាការលោក រឿត សុខុន ប្រធានការិយាល័យអភិវឌ្ឍ នៃកាកបាទក្រហម បាន​អោយ​ដឹងថា ក្រោមការដឹកនាំរបស់សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន ប្រធាន នៅថ្ងៃទី២៨ ខែ​វិច្ឆកានេះ ក្រុមការងារយុវជនកាកបាទក្រហមកម្ពុជា ថ្នាក់កណ្តាល សហការ​ជា​មួយ​សាខា​ខេត្តកំពង់ស្ពឺ សរុបចំនួន៦០នាក់ ចុះធ្វើយុទ្ធការអប់រំផ្សព្វផ្សាយ កាត់​បន្ថយ​ជំងឺ​គ្រុន​ឈាម និងបន្សុំាការប្រែប្រួលអាកាសធាតុ ដោយធ្វើឡើងចំនួន៣ទីតាំងផ្សេងៗគ្នា ទី១​សួន​ច្បារ​សម្តេច​សង្ឃ ជួន ណាត , ទី២នៅផ្សារកំពង់ស្ពឺ និងទី៣នៅភូមិកន្ទាច សង្កាត់សុពរទេព ក្រុង​ច្បារមន ខេត្តកំពង់ស្ពឺ។

លោក សុខុន ឱ្យដឹងទៀតថាដំណើរនៃកម្មវិធីខាងលើនេះ ដោយ​បាន​ថវិកា​ពី​ការ​ទទួល​បាន​ជ័យលាភី ពីក្រុមយុវជនកាកបាទក្រហមកម្ពុជា មួយក្រុម បានចូលរួមប្រឡងប្រគួតប្រជែង សរសេរ​គម្រោងដែលមានឈ្មោះថា «យុវជនចូលរួមសកម្មភាពទប់ស្កាត់ជំងឺ​ឆ្លង និង​ការ​ប្រែប្រួល​អាកាស​ធាតុ» ដោយបានឧបត្ថមគាំទ្រពីកាកបាទក្រហមអ៊ីតាលីចំនួន ២៥០០ ស្វីសហ្រ្វង់ ដើម្បី​យកមកធ្វើយុទ្ធនាការអប់រំផ្សព្វផ្សាយនាឱកាសនេះ សម្រាប់​បញ្ជ្រៀប​ការ​យល់​ដឹង​ទៅ​ប្រជាពលរដ្ឋ​។

លោកស្រី អោម ចន្នា នាយិការសាខាខេត្ត កំពង់ស្ពឺ បានមានប្រសាសន៍ថា សកម្មភាព​ចូលរួម​របស់​យុវជន និងអ្នកស្ម័គ្រចិត្តនាឱកាសនេះ ពិតជាល្អប្រសើរណាស់ ក្នុងការអប់រំផ្សព្វផ្សាយ អំពី​ជំងឺ​គ្រុនឈាម និងបន្សុំាការប្រែប្រួលអាកាសធាតុនៅកម្ពុជា ដើម្បី​អោយ​ប្រជាពលរដ្ឋ​យល់​ដឹង​កាន់​តែ​ច្បាស់ អំពីការប្រែប្រួលអាកាសធាតុ និងកាត់បន្ថយជំងឺគ្រុនឈាម។ ក្នុងឱកាសនោះដែរ ដើម្បី​បញ្ជ្រៀបព័ត៌មានទាំងនេះទៅដល់ប្រជាពលរដ្ឋ ក្រុមយុវជនត្រូវបានបែងចែកគ្នាជា៤ក្រុម ដើម្បីធ្វើសកម្មភាព អប់រំផ្សព្វផ្សាយទៅដល់ប្រជាពលរដ្ឋ។

ដើម្បីបរិស្ថានស្អាត និងសុខភាពល្អរបស់ប្រជាពលរដ្ឋ ក្រុមយុវជន និងអ្នកស្ម័គ្រចិត្ត នៅតាម​ក្រុម​នីមួយ​ៗ​បានកាន់ថង់ កាន់ដង្គៀប ដើររើសសំរាម អ្នកខ្លះកាន់បដាផ្សព្វផ្សាយ អំពីបរិស្ថាន និង​ការ​ទប់​ស្កាត់ជំងឺ​គ្រុនឈាម ទៅដល់ប្រជាពលរដ្ឋទូទៅ និងក្រុមអាជីវករនៅក្នុងផ្សារកំពង់ស្ពឺ ប្រកប​ដោយ​ស្នាមញញឹមគ្រប់គ្រប់គ្នា។

នាយិការសាខាកាកបាទក្រហមខេត្តកំពង់ស្ពឺ បានអោយដឹងទៀតថា ដើម្បីបរិស្ថានស្អាត រស់​នៅ​មាន​អនាម័យ សូមបងប្អូនប្រជាពលរដ្ឋ ចូលរួមសំអាតបរិស្ថាន ទាំងអស់គ្នា កាត់​បន្ថយ​ការ​ប្រើ​ប្រាស់​ថង់ប្លាស្ទិក។ ទាក់ទងនឹងជំងឺគ្រុនឈាម សូមបងប្អូនលប់បំបាត់ទីជម្រកសត្វមូស ដូចជា​វត្ថុ​ដែល​ដក់ទឹក និងកាប់ស្ការព្រៃជុំវិញផ្ទះជាដើម៕ អត្ថបទ៖ សំ ងីម