ភ្នំពេញ៖ មន្រ្តីជាន់ខ្ពស់ នៃក្រសួងយុត្តិធម៌ បានថ្លែងថា ប្រទេសកម្ពុជា បាន និង​កំពុង​សិក្សា​រៀបចំ​បង្កើត និងដាក់ឲ្យ​ដំណើរការតុលាការពាណិជ្ជកម្ម នៅតាមសាលាដំបូងរាជធានី-ខេត្ត ដែល​ជាផ្នែកមួយ នៃប្រព័ន្ធតុលាការ ក្នុងការដោះស្រាយវិវាទពាណិជ្ជកម្ម ខណៈវិស័យពាណិជ្ជកម្មនេះ បាន​និងកំពុងមានការរីកចំរើនកាន់តែច្រើនឡើងនៅប្រទេសកម្ពុជា។

ថ្លែងនៅក្នុងពិធីបើកសិក្ខាសាលា ស្តីពីការបង្កើត និងដំណើរការតុលាការពាណិជ្ជកម្ម នៅព្រឹក​ថ្ងៃ​ទី​២៩ ខែវិច្ឆិកា ឆ្នាំ២០២២នេះ នៅសណ្ឋាគារ រ៉ាហ្វាល ឡឺរ៉ូយ៉ាល់ភ្នំពេញ ឯកឧត្តម ជីវ សុងហាក់ រដ្ឋលេខាធិការ​ក្រសួងយុត្តិធម៌ បានបញ្ជាក់ថា ក្រសួងយុត្តិធម៌​បាន​សម្រេច​បង្កើត​គណៈកម្មការ​រៀបចំ​ដំណើរ​ការតុលាការពាណិជ្ជកម្ម កាលពីឆ្នាំ២០២១ កន្លងទៅនេះ ដោយការ​បង្កើត​នេះ​គឺ​ក្នុង​គោលបំណងផ្តល់ភាពងាយស្រួលបន្ថែមទៀតដល់ពាណិជ្ជករ ដែលបាន​មក​ធ្វើ​ពាណិជ្ជកម្ម​នៅ​កម្ពុជា ហើយក៏ជាផ្នែកមួយក្នុងការកាត់បន្ថយនូវអំពើពុករលួយផងដែរ។

ឯកឧត្តមបានថ្លែងបន្តថា បច្ចុប្បន្ន វិស័យពាណិជ្ជកម្មបានរីកចម្រើនយ៉ាងខ្លាំង និងឆាប់រហ័សនៅ ក្នុង​តំបន់ និងសកលលោកជាហេតុដែលនាំឲ្យមានការបង្កើតច្បាប់ទាក់ទងវិស័យពាណិជ្ជកម្ម និង​តុលាការ ពាណិជ្ជកម្ម ដើម្បីគ្រប់គ្រង និងដោះស្រាយវិវាទផ្សេងៗនៅក្នុងវិស័យនេះ។ ទន្ទឹម​នឹង​នេះ វិស័យពាណិជ្ជកម្មនៅកម្ពុជា មានការរីកចម្រើនគួរឲ្យកត់សម្គាល់ តាមរយៈ​ពាណិជ្ជកម្ម​ទីផ្សារ​សេរី​ទ្វេភាគី និង​ពហុភាគីទាំងតំបន់ និង​សកលលោក។​«ប្រទេស​កម្ពុជា​បាននិង​កំពុង​សិក្សា​រៀបចំ​បង្កើត និង​ដាក់ឲ្យដំណើរការតុលាការ​ពាណិជ្ជកម្មនៅតាមសាលាដំបូងរាជធានី-ខេត្ត ដែលជា​ផ្នែក​មួយ​ នៃប្រព័ន្ធតុលាការ ក្នុងការដោះស្រាយវិវាទពាណិជ្ជកម្ម។ តាមរយៈច្បាប់ ស្តីពី​ការ​រៀបចំ​អង្គការ​តុលាការ តុលាការពាណិជ្ជកម្ម នៃសាលាដំបូង​ត្រូវ​បាន​បង្កើត​ឡើង​ដោយ​មាន​សមត្ថកិច្ច​ជំនុំ​ជម្រះ​រឿងក្តីពាណិជ្ជកម្ម ដោយរួមទាំងក្ស័យធន ក្នុងរឿងពាណិជ្ជកម្ម ដោយ​អនុវត្ត​តាម​បទ​ប្បញ្ញត្តិ ស្តីពីនីតិវិធីពាណិជ្ជកម្ម»។

សូមបញ្ជាក់ថា សិក្ខាសាលាដែលបានកំពុងរៀបចំឡើងនាពេលនេះ មានការចូលរួមធ្វើបទបង្ហាញ ដោយ​វាគ្មិនដែលមានបទពិសោធន៍ក្នុងការអនុវត្ត និង​ទ្រឹស្តី​ពាក់ព័ន្ធ​នឹង​វិវាទ​ពាណិជ្ជកម្ម​មក​ពី​ស្ថាប័ន​ជាតិ និងអន្តរជាតិលើបញ្ហាប្រឈម និងដំណោះស្រាយ ការអនុវត្តជាក់ស្តែង និង​កិច្ច​ពិភាក្សា​ផ្លាស់ប្តូរ​ទស្សនៈ យ៉ាងសកម្ម និងផុសផុលពីសំណាក់វាគ្មិនជាតិ អន្តរជាតិ និង​សិក្ខាកាម​ដែល​មាន​វត្ត​នៅ​ទីនេះទាំងអស់៕ អត្ថបទ៖ បាន ចក់